coved ad

कीर्तिपुर सिंगिङ आइडल ११४२ य् प्रशान्त न्हाप, अतुल ल्यू व जोन लियांल्यू

नेवा: अनलाइन न्युज – ललेन्द्र शाक्य | २०७८ पौष १५, बिहिबार २३:१५:१४

किपू नगरपालिकां किपू नगर दुनेया न्हूप्रतिभा म्येहालामिपिनिगु प्रतिभा उजागर यायेगु आज्जुं थनि निला न्ह्यःनिसें नेपाल संवत ११४२ न्हूदँया लसताय् ग्वसाः ग्वयाः वयाच्वंगु कीर्तिपुर सिंगिङ आइडल ११४२ थौं बिहिवाः क्वचाःगु दु ।

किपूया पांगाय् च्वंगु कीर्तिपुर सिनेप्लेक्स हलय् जूगु उगु बिजं कासा (फाइनल कासा)य् किपू नगरपालिका ४ वडा सल्यानस्थानया प्रशान्त सुवेदी न्हाप, किपू नगरपालिका ३ वडा कुतिसा त्वाःया अतुल मानन्धर ल्यू व किपू नगरपालिका ५ वडा पांगाया जोन महर्जन लियांल्यू लानाः कीर्तिपुर सिंगिङ आइडल ११४२ जुइत ताःलाःगु दु ।

उगु कासाय् न्हाप, ल्यू व लियांल्यू लायेत ताःलाःपिं स्वम्ह कीर्तिपुर सिंगिङ आइडलपिन्त किपू नगरपालिकाया प्रमुख रमेश महर्जनं ट्रफी व मेडल लःल्हानादीगु खःसा उपप्रमुख सरस्वती रिजाल खड्कां खादां न्ययेकाः दसिपौ लःल्हानादीगु खः ।

अथेहे, नगरपालिकाया प्रशासकीय अधिकृत कृष्णप्रसाद सापकोटां सिन्हः तिकादीगु खःसा आइडलया कजि हरिशरण सायमिं स्वां देछानादीगु खः ।

कासाय् न्हाप लाःम्ह कीर्तिपुर सिंगिङ आइडल प्रशान्त सुवेदीयात नगद न्ययद्वः तका व ट्रफी, ल्यू लाःम्ह आइडल अतुल मानन्धरयात पीद्वः तका व ट्रफी व लियांल्यू लायेत ताःलाःम्ह आइडल जोन महर्जनयात स्वीद्वः तका व ट्रफी लःल्हाःगु खः ।

कीर्तिपुर सिंगिङ आइडल ११४२ य् उत्कृष्ट झिम्ह टपटेन दथुइ धेंधेंबल्ला जूगु खःसा उपिं झिम्ह कासामिपाखें स्वम्ह उत्कृष्टपिं ल्यःगु खः ।

आइडलया निर्णायक मण्डलय् संगीतकःमिपिं तीर्थ माली, ज्ञानेश्वर निभाः, न्हुच्छे दर्शन, सन्तोष महर्जन, सतीश महर्जन, राजु महर्जन (कटुम्ब), रुविन श्रेष्ठ (कुटुम्ब), कृष्णहरि महर्जन, रत्नशोभा महर्जन, दिपा महर्जनलिसें स्वयं आइडल कजि हरिशरण सायमि च्वनादीगु खः ।

ज्याझ्वलय् किपूया बरिष्ठ संगीतकःमि ज्ञानेश्वर निभाःयात श्रष्टा साधना सम्मानपाखें हनेज्या नं जूगु खः ।

ज्याझ्वलय् किपू नगरपालिकाया प्रमुख रमेश महर्जनं नगरपालिकाया ज्या धः दयेकेगु, सम्पदा पुनःनिर्माण व निर्माण, लँ दयेकेगु व विकासया ज्या जक यायेगु मखु कि नगर दुनेया युवावर्गपिनिगु प्रतिभायात कदर यानाः इमिगु प्रतिभायात उजागर यायेगु नं स्थानीय सरकार नगरपालिकाया कर्तव्य व दायित्व खः धकाः धयादिसें उगु कर्तव्य व दायित्वया दसि धैगु कीर्तिपुर सिंगिङ आइडल खः धकाः धयादिल । प्रमुख महर्जनं कासाय् न्हाप, ल्यू, लियांल्यू लाइ तर व छुं नं मखु, कीर्तिपुर आइडलय् ब्वति काःपिं सकल कलाकारपिं व टप टेनय् लायेत ताःलाःपिं सकल कलाकारपिं कीर्तिपुर आइडल खः, उकिं थःगु प्रतिभायात निरन्तर रुपं न्ह्याकेत आग्रह यासें सकलसित भिंतुना देछानादिल ।

ज्याझ्वलय् कुटुम्ब ब्याण्डया राजु महर्जन, रुविन श्रेष्ठलिसें इन्द्रमान महर्जन व भुपेन्द्र बज्राचार्यं सांगितिक ज्याझ्वः ब्वज्या याःगु खःसा सतीश महर्जन, दीपा महर्जन, रत्नशोभा महर्जन, हरिशरण महर्जनपिन्सं नं म्ये न्ह्यब्वयादीगु खःसा किपू नगरपालिका १० वडाया वडाध्यक्ष अमन महर्जनं हाँस्यव्यंग्य ब्वज्या यानादीगु खः ।

ज्याझ्वलय् ग्वाहालि यानादीपिं सकल ग्वाहालिमि, संचारमाध्यमलिसें कलाकार, निर्णायक मण्डल, आइडलया लाईभ ब्याण्ड संगीतकःमिपिन्त सुभाय् पौ लःल्हाःगु खःसा निर्णायक मण्डलपिन्त मतिनाया चिं नं लःल्हाःगु खः ।

Categorized in कला