1142 nhoo dan adv

कीर्तिपुर सिंगिङ आइडल ११४२ या कासामिपिं फुक्कं एक से एक !

नेवा: अनलाइन न्युज – निश्चल | २०७८ कार्तिक ३०, मंगलबार १४:२५:२२

किपू नगरपालिकाया ग्वसालय् नगर दुनेया प्रतिभावान् १५ दँनिसें ३० दँ उमेर समूहया न्हूप्रतिभा कलाकारपिनिगु दथुइ न्ह्यानाच्वंगु कीर्तिपुर सिंगिङ आइडल ११४२ या सहभागी कासामिपिं फुक्क हे एक से एक खनेदूगु दु । 

किपू नगरपालिका दुनेया मुक्कं १ निसें १० वडा दुनेया १९ म्ह न्हूप्रतिभा कलाकारपिन्सं ब्वति काःगु उगु कासाय् आः १८ म्ह जक जूगु दु । किपू नगरपालिका ४ वडाया छम्ह कासामि विशेष हुनिं विदेश वनेमाःगु हुनिं विदेश वंगु व आः १८ म्ह जक कासामि जूगु ग्वसाः खलः किपू नगरपालिकां जानकारी ब्यूगु दु ।

थौं ने.सं. ११४१ कछलाथ्व द्वादसी (कार्तिक ३० गते) मंगलवाः किपूया नेपालभाषा एकेदेमिया हलय् १८ म्ह सहभागी कासामि व ग्वसाः खलः दथुइ छगू मुँज्या जूगु खःसा उगु मुँज्याय् कासाय् सहभागी कलाकारपिन्सं गुकथं रियाज यानाच्वंगु दु धैगु विषययात कयाः सकलसित दबुली थनाः म्ये हायेकूगु खः । लिसें कासामिपिन्सं निगूगु चरणय् हालीगु म्ये ल्ययेगु ज्याझ्वः नं जूगु खः ।

उगु म्ये हालेगु झ्वलय् १८ म्ह कासामिपिं फुक्क हे बांलाःगु व सुसिबें सु कम मजू, सकले एक से एक जू धकाः ग्वसाः खलः दुनेया दुजःपिन्सं धाःगु दु ।

आइडलया कजि हरिशरण सायमिलिसें ग्वसाः खलःया निर्णायक दुजःपिन्सं थौं जूगु रिहर्सल ज्याझ्वःया मूल्यांकन याःगु खःसा ज्याझ्वः ग्वसाः खलःया दुजः ललेन्द्र शाक्यं न्ह्याकादीगु खः ।

ज्याझ्वलय् ग्वसाः खलःया दुजःपिं किपूया नांजाःपिं संगीतकःमिपिं ज्ञानेश्वर निभाः, वीरप्रसाद भन्सारी, गुज्ये मालाकार, न्हुच्छे दर्शन, तीर्थ माली, सतीश महर्जन, कृष्णहरी महर्जनलिसें थीथी संगीतकःमि दुजःपिनिगु उपस्थिति दूगु खःसा प्रचारप्रसार विभागया दुजःपिं ज्ञानकुमार महर्जन, नविन जोशी, दुर्गालाल शाही, प्रताप महर्जनपिनिगु नं उपस्थिति दूगु खः । 

आः याकनं हे निगूगु चरणया ज्याझ्वः क्वःछीगु धासें निगूगु चरणया नितिं तयारी जुयाच्वंगु जानकारी कजि सायमिं जानकारी बियादीगु दु । वय्कलं निगूगु चरणया कासा नेपालभाषा एकेदेमिया हलय् हे जुइगु व उगु कासापाखें टप १० कथं झिम्ह कासामि ल्ययेगु जानकारी बियादीगु दुसा दकलें लिपांगु स्वंगूगु चरणया ग्राण्ड फिनाले कासा किपू लागा दुने खुल्ला थासय् जुइगु जानकारी नं बियादीगु दु ।

उगु ग्राण्ड फिनालेय् झिम्ह कासामिया दथुइ धेंधेंबल्ला याकाः स्वम्ह आइडलपिं ल्ययेगु व उपिं स्वम्ह आइडल दुने न्हाप, ल्यू व लियांल्यू लाःपिं कासामिपिन्त छसिंकथं न्ययद्वः तका, पीद्वः तका व स्वीद्वः तका सिरपाःलिसें ट्रफी मेडल व मेमेगु थीथी बम्पर उपहार बिइगु ग्वसाः किपू नगरपालिकां ग्वःगु दु ।

निगूगु चरणया नितिं १८ म्ह कासामिपिन्त हाकनं थीथी कथंया सांगितिक लिसें मेमेग तालिम बिइमानीगु व वधुंकाः निगूगु चरणया ज्याझ्वः जुइगु जूगु जानकारी बिसें कीर्तिपुर सिंगिङ आइडल ११४२ या प्रचारात्मक ज्याझ्वः कथं किपूया थीथी थासय् कासामिपिं पाखें सांगितिक ज्याझ्वः न्ह्यब्वयेगु जानकारी नं कजि हरिशरण सायमिं जानकारी बियादीगु दु ।

    

 

Categorized in कला