nepal life 2076 3 18

कीर्तिपुर नगरपालिकां न्हूदँया लसताय् ‘कीर्तिपुर सिङ्गिङ आइडल ११४२’ याइगु

नेवा: अनलाइन न्युज – ललेन्द्र शाक्य | २०७८ आश्विन ४, सोमबार १६:१६:५३

म्ये दुथ्याकेगु लिपांगु तिथि थ्वहे वइगु कौलाथ्व अमासी पुन्ही (कार्तिक ३ गते) चान्हय् १२ ता ईतकया दुने

नेपाःया मौलिक संवत् न्हूदँ ने.सं. ११४२ या लसताय् किपू नगरपालिकां सांगितिक धेंधेंबल्ला ज्याझ्वः ‘कीर्तिपुर सिङ्गिग आइडल ११४२’ ग्वसाः ग्वःगु दु ।

किपू नगर दुनेया सुलाच्वंपिं प्रतिभापिनिगु प्रतिभा उजागर यायेगु आज्जुं थुगु ज्याझ्वःया ग्वसाः ग्वयागु जानकारी किपू नगरपालिकाया मेयर रमेश महर्जनं जानकारी बियादीगु दु ।

थुगु ‘कीर्तिपुर सिङ्गिङ आइडल ११४२’ ज्याझ्वः ग्वसाः ग्वयेगु नितिं शनिवाः किपू नगरपालिकाय् किपूया दिग्गज संगीतकःमिपिनिगु दथुइ सहलह मुँज्या च्वंगु खः । उगु सहलह मुँज्यां ‘कीर्तिपुर सिङ्गिङ आइडल ११४२’ ज्याझ्वः ताःलाकेगु नितिं किपूया नांजाःम्ह संगीतकःमि हरिशरण सायमिया कजिसुइ तदर्थ समिति नीस्वंगु दु । उगु तदर्थ समितिइ किपूया हनेबहःपिं संगीतकःमिपिं ज्ञानेश्वर निभाः, गुज्ये मालाकार, तीर्थ माली, विश्व नेपाली, सतीश महर्जन, राजु महर्जन (कुतुम्ब), दीपा महर्जनलिसें नांजाःम्ह साहित्यकार रजनी मिला, संचारकःमिपिं ज्ञानकुमार महर्जन व ललेन्द्र शाक्य लिसें किपू नगरपालिकाया अनुज प्रधान च्वनादीगु दु ।

‘कीर्तिपुर सिङ्गिङ आइडल ११४२’ ज्याझ्वः स्वंगू चरणय् क्वचायेकेगु उगु सहलह मुँज्यां क्वःछिउगु दु । न्हापांगु चरण कथं ‘कीर्तिपुर सिङ्गिङ आइडल ११४२’य् ब्वति काइपिं नवोदित प्रतिभापिन्सं इफेक्ट मतःसे कराओके (ट्रायक)य् म्ये हालाः वाइड स्क्रीन भिडियो ग्वसाः खलः कीर्तिपुर नगरपालिकाया आधिकारिक ईमेल :  nagarsandes@gmail.com /Nagar Sandesh Facebook Massenger / viber : 9860762800 (Lalendra Shakya), 9841353751(Gyan Kumar Maharjan)  स छ्वयाहयेगु नितिं आह्वान याःगु दु ।

बैठकं न्हापांगु चरणया नितिं थ्वहे वइगु कौलाथ्व अमासी पुन्ही (कार्तिक ३ गते) चान्हय् १२ ता ईतकया दुने ब्वति काइम्ह म्येहालामि थःगु म्ये छ्वयाहयेमाःगु प्रावधान तःगु दु ।

बैठकं न्हापांगु चरण क्वचायेकेगु ज्याझ्वः न्हूदँया इलय् जुइगु जानकारी ब्यूगु दुसा निगूगु चरणया ज्याझ्वलय् न्हापांगु चरणं छनौट जूपिं कलाकारपिन्सं निर्णायक मण्डलया न्ह्यःने कराओकेय् थःपिनिगु म्ये प्रत्यक्ष हालेमाःगु नियम तःगु दुसा स्वंगूगु चरणया ज्याझ्वय् निगूगु चरणं छनौट जूपिं कलाकारपिन्सं लाईभ म्यूजिकय् हलय् थःपिनिगु प्रतिभा न्ह्यब्वयेमाःगु नियम तःगु दु । थुगु हे स्वंगूगु चरणया ज्याझ्वः ‘कीर्तिपुर सिङ्गिङ आइडल ११४२’या लिपांगु ग्राण्ड फिनाले ज्याझ्वः जुइगु व थुगु ज्याझ्वलं हे ‘कीर्तिपुर सिङ्गिङ आइडल ११४२’ या उपाधि लःल्हायेगु जानकारी ब्यूगु दु । 

अथेहे, ग्वसाः खलकं ‘कीर्तिपुर सिङ्गिङ आइडल ११४२’य् ब्वति काइपिं किपू नगरया स्थानीय बासिन्दा जुइमाःगु प्रावधान तःगु दुसा नेपालभाषा, खस नेपाली भाषा व तामाङ भाषायात प्राथमिकता ब्यूगु दु ।

Categorized in कला