nepal life 2076 3 18

किपू २ वडाय् झोल साबुं व दालमोठ दयेकेगु तालिम क्वचाल

नेवा: अनलाइन न्युज – ललेन्द्र शाक्य | २०७८ श्रावण २४, आइतबार १७:४९:३४

मिसा स्वरोजगार व दक्ष जनशक्ति उत्पादनया नितिं सिपमूलक तालिम अन्तर्गत किपू नगरपालिका २ वडाय् झोल साबुं व दालमोठ दयेकेगु तालिम शनिवाः क्वचाःगु दु ।

ने.सं. ११४१ दिल्लागा त्रयोदसि व चतुर्दसि (श्रावण २२ व २३ गते) निन्हुयंकं न्ह्याःगु उगु झोल साबुं व दालमोठ दयेकेगु तालिम ज्याझ्वः किपू नगरपालिका २ वडाया ग्वसालय् न्ह्याःगु खः ।

मुक्कं पीम्ह (४० म्ह) स्थानीय मिसापिं सहभागी जूगु उगु तालिम किपू नगरपालिका २ वडा गःछेँया चपाःछेँय् न्ह्याःगु खः ।

शनिवाः जूगु समापन ज्याझ्वलय् किपू नगरपालिकाया मेयर रमेश महर्जन मूपाहाँ कथं झाःगु खःसा उपमेयर सरस्वती रिजाल खड्का विशेष पाहाँ कथं झाःगु खः ।

अथेहे, समापन ज्याझ्वलय् पाहाँ कथं गःछेँ गुथिया दुजः नेवाः न्ह्यलुवा बुद्धिलाल ज्यापु उपस्थित जूगु खः ।

ग्वसाः खलः किपू नगरपालिका २ वडाया वडा नायः लिसें किपू नगरपालिकाया संस्कृति पर्यटन सम्पदा विभागया कजि रमेशमान डंगोलया सभानायःसुइ न्ह्याःगु उगु ज्याझ्वलय् तालिम काःपिन्त दसिपौ लःल्हाःगु खः ।

किपू २ वडाया हे बासिन्दा छाँया कार्की महर्जनं उगु झोल साबुं व दालमोठ दयेकेगु तालिम बियादीगु खः ।

ज्याझ्वलय् विशेष पाहाँ किपूया उपमेयर सरस्वती रिजाल खड्कां तालिम कायेधुंकाः समूहगत रुपं आपालं आपाः झोल साबुं व दालमोठ उत्पादन यानाः आर्थिक लाभ यायेगु ज्याय् न्ह्यचिलेमाःगु विचाः प्वंकादीगु खः । 

अथेहे, मूपाहाँ किपूया मेयर रमेश महर्जनं तालिम काःपिनिगु उत्तरोत्तर प्रगतिया कामना यासें गुगु तालिम काःगु विधा खः, तालिम जक कायेगु मखुसे व्यवहारय् नं छ्यलेमाःगुलि बः बियादीगु खः । मेयर महर्जनं तालिमं सयेकूगु ज्यायात लाज्या जक मयाःसे ल्हाज्याय् हिलेमाःगु विचाः नं तयादीगु खः ।

झोल साबुं व दालमोठ दयेकेगु तालिम समापन ज्याझ्वलय् सभानायः किपू २ वडाया वडा नायःलिसें किपू नगरपालिकाया सम्पदा संस्कृति पर्यटन विभागया कजि रमेशमान डंगोलं थःगु वडाया मिसापिन्सं थुकथं तालिम कयाः पूवंकूगुलिं लसता पिज्वयेकूसें तालिम काःगु ज्यायात निरन्तरता बिइगु नितिं थःगु वडां सदां ग्वाहालि यायेत तयार दूगु विचाः प्वंकादिल । लिसें वडा नायः डंगोलं आः मेमेगु थीथी विधाया तालिम बियाः थःगु वडापाखें जनशक्ति तयार यायां वनेगु विचाः नं तयादिल ।

किपाः ज्ञानकुमार महर्जन

Categorized in बजाः