नेवा: अनलाइन न्युज – ललेन्द्र शाक्य | २०८० आश्विन २, मंगलबार १४:०१:५०

किपूया १० वडाया म्वाःनः त्वालय् च्वंगु म्वाःनःत्वाः आःखा खलःया मुँज्या च्वनाः उगु बैठकया क्वःछिना कथं धिमेबाजा प्रशिक्षण ज्याझ्वः न्ह्याःगु जानकारी धिमे प्रशिक्षया ल्यू कजि रमित महर्जनं जानकारी बियादीगु दु । उगु धिमे प्रशिक्षणया मू कजि बच्चुराम महर्जन खः ।

उगु धिमे प्रशिक्षण वंगु श्रावण १ गतेनिसें विधिवत रुपं नासःद्यः पूजा यानाः न्ह्याःगु खः ।

किपू नगरपालिका १० वडाया वडाध्यक्ष नरेश महर्जन व म्वाःनःत्वाः आःखा खलःया धिमेगुरु महन्त महर्जनपाखें धिमेबाजा प्रशिक्षक व गुरुपिं शान्तकुमार महर्जन, हरिप्रसाद महर्जन, कविन महर्जन  व राजन महर्जनपिन्त धिमेबाजा वधिमेबोल लःल्हानाः धिमेबाजा प्रशिक्षण न्ह्याकूगु खः ।

युवापुस्तापिन्त धिमेबाजा प्रति आकर्षित यानाः धिमेबाजाया संरक्षण  व युवापुस्ताय् धिमेबाजाया पुस्ता हस्तान्तरण यायेगु मू आज्जु दूगुजानकारी नं उगु धिमेबाजा प्रशिक्षणया ल्यू कजि रमित महर्जनं जानकारी बियादीगु दु ।

वंगु भाद्र ३१ गते उगु धिमेबाजा प्रशिक्षणया झ्वलय् बाःपूजा याःगु खःसा आः वइगु किपूया दकले तःधंगु जात्रा इन्द्रायणी जात्राया लसताय् पिथनेगु ग्वसाः दूगु नं ल्यूकजि महर्जनं जानकारी बियादीगु दु ।

किपूया १० वडाया म्वाःनःत्वालय् जुयाच्वंगु उगु धिमेबाजा प्रशिक्षणय् मुक्कं न्ययेन्याम्ह (५५ म्ह) प्रशिक्षार्थीपिन्सं ब्वति कयाच्वंगु दु ।

Categorized in कला