Header Nepal rastra bank Adv

किपू १० वडाय् नेवाः वसः सुइगु तालिम क्वचाल

नेवा: अनलाइन न्युज – ललेन्द्र शाक्य | २०७८ माघ २०, बिहिबार १६:३१:३९

किपू नगरपालिकां १० वडाया मिसा लक्षित ज्याझ्वः अन्तर्गत न्ह्याकूगु नेवाः वसः सुइगु तालिम ज्याझ्वः क्वचायेकूगु दु । उगु वसः सुइगु ज्याझ्वःया समापन ज्याझ्वः ने.सं. ११४२ सिल्लाथ्व पारु (माघ १९ गते) बुधवाः ६ वडा क्वय्नाय् जूगु खः ।

परम्परागत नेवाः वसः पुनेगु लोप जुयावनीगु ग्याःचिकु ब्वलनाच्वंगु इलय् किपू नगरपालिकां थुकियात विशेष ध्यान बिया ज्या यानाच्वंगु दु । नेवाः वसः नेवाःतय्गु पहिचान खःसा राष्ट्रया हे म्हसीका दुगु थुगु वसःयात ल्यंका तयेगु जक मखुसें थुकियात लजगाः कथं हे ज्या यायेजिइक किपू नगरपालिकां थीथी ज्याझ्वः यानाच्वंगु खः । थ्वहे झ्वलय् किपू नगरपालिका वडा नं. १० य् नेवाः वसः सुइगु तालिम हे न्ह्याकाच्वंगु खःसा म्हिगः बुधवाः थुगु तालिमया समापन ज्याझ्वः जूगु खः ।

स्वलायंकं जूगु थुगु नेवाः वसः सुइगु तालिमया क्वचायेके (समापन) ज्याझ्वःया उलेज्या किपू नगरपालिकाया प्रमुख रमेश महर्जनं यानादीगु खः । किपूमिपिं छुं नं भिंगु ज्या यायेबलय् क्वय्ना गनेद्यः पुज्यायेगुु चलनयात निरन्तरता बीकथं क्वय्ना गनेद्यःयाथाय् वनां लिक्कच्वंगु वडा नंं ६ ज्याकूया हलय् थुगु ज्याझ्वः जूगु खः ।

ज्याझ्वलय् न्ववानादिसें मूपाहाँ नगर प्रमुख रमेश महर्जनं थुगु नेवाः वसः सुइगु सयेकेगु तालिमया समापन जूगु खःसां धात्थेंया ज्या यायेगु शुरु जूगु कनादिल । स्वला जक सयेकाः पूवनी मखुगु धयादिसें नगर प्रमुख महर्जनं बांलाक सयेकेत अझं निपाः प्यपाः लं सुइबलय् स्यनेफुगु व अथे स्यन धकाः नुगः मछिंके मज्यूगु धयादिसें मेहनत याना वंवं वनकि अथें हे बांलाक सयेके फइगु कनादिल । थुगु सयेकाःगु ज्यायात थःगु ल्हाःज्या कथं हे याना झीगु म्हसीका नं ल्यंनीगु व आम्दानी नं जुइगु जूगुलिं थुकियात निरन्तरता बियाः ज्या यानादीत सकल ब्वति कयादीपिंत इनाप यानादिल ।

ज्याझ्वलय् नगरपालिकाया उप–प्रमुखलिसें प्रवक्ता सरस्वती रिजाल खड्कां विशेष याना परिवारय् मिसापिं उद्यमशील जुल धाःसा छेँजः बांलाइगु धयादिसें सकल नगरबासीयात ल्हाःतय् सीप तयाबीगु नगरपालिकाया दायित्व हे नं जूगुलिं नगरपालिकां थुगु ज्या मद्दिक्क यानाच्वनागु न्ह्यथनादिल । उप–प्रमुख खड्कां नेपाल सरकारं सन् २०३० तकया दुने दिगो विकासया लक्ष्य पूवकेगु धकाः अन्तर्राष्ट्रिय प्रतिवद्धता यानातःगु खँय् वाःचायेका सकलसित उगु नेपाल सरकारया प्रतिवद्धतायात थःथःगु थासं ग्वहालि यायेमाःगु खँय् बः बियादिल । सकलसिनं थःके दुगु सीपयात व्यवहारय् छ्यलाः आम्दानी यायेफत धाःसा सुंनं द्यांमलाइगु व वहे नं छगू कथं दीगो विकासया लक्ष्य पूवनीगु धयादिसें उप–प्रमुख खड्कां सकलसिनं सयेकागु ज्या सीपयात छ्यला ज्या यानादीत इनाप यानादिल ।

ज्याझ्वलय् वडा नं. ६ या वडानायः न्हुच्छेबहादुर महर्जनं थःगु नुगःखँ तयादीगु खःसा प्रशिक्षार्थिपिनिपाखें हिसिला महर्जनं थःगु नुगः खँ तयादीगु खः । ज्याझ्वलय् गुम्ह प्रशिक्षार्थीपिन्त नगर प्रमुख महर्जन, उप–प्रमुख खड्का, वडा नं. १ या वडानायः लिसें नगरपालिकाया स्वास्थ्य सरसफाई विभाग कजि हर्ष महर्जन, वडा नं. २ या वडानायः लिसें संस्कृति सम्पदा पर्यटन विभाग कजि रमेशमान डंगोल, वडा नं. ३ या वडानायः राजेन्द्र महर्जन, वडा नं. ४ या वडानायः राजेन्द्र बानियाँ, वडा नं. ९ या वडानायः गंगाराम महर्जनपिन्सं दसि पौ लःल्हानादीगु खः ।

ज्याझ्वलय् प्रशिक्षण बियादीम्ह नारायण कपालीयात प्रशिक्षार्थीपिनिपाखें मतिनाया चिंकथं इलचं (घडी) देछाःगु खः । वडा नं. १० या वडानायः अमन महर्जनया सभापतित्वय् जूगु ज्याझ्वः वडा नं. १० या वडादुजः चिनीकाजी श्रेष्ठं लसकुस यानादीगु खःसा वडा नं. १० या मिसा वडादुजः संगीता उप्रेती श्रेष्ठं ज्याझ्वः न्ह्याकादीगु खः ।

किपाः ज्ञानकुमार महर्जन

Categorized in लजगाः