1142 nhoo dan adv

किपू वडा ल्याः ३ पाखें ज्याथःजिथिपिंत समर्पित “कीर्तिमान” संकिपा दयेकीगु

नेवा: अनलाइन न्युज | २०७८ मङ्सिर ८, बुधबार ०९:१२:३५

किपू नगरपालिका ३ वडा ज्याकूया ग्वसालय् न्याक्वःखुसि देश दर्शन भ्रमण ज्याझ्वः न्ह्याकूगु दु । ने.सं. ११४२ कछलाथ्व पुन्ही (मंसीर ३ गते) शुक्रवाः ३ वडा दुनेया थ्यंमथ्यं सच्छि व झिम्ह ज्येष्ठ नागरिकपिं मुंकाः लुम्बिनी व भारतया गोरखपुर भ्रमणय् यंकूगु खः ।

थ्वहे झ्वलय् किपू नगरपालिका ३ वडा ज्याकूया हे निर्माण व्यवस्थापनय् कीर्तिपुर मिडिया हाउसया न्ह्यब्वया कथं ज्येष्ठ नागरिकपिन्त समर्पित यथार्थ बाखंया लिधंंसाय् नेपालभाषाया चिहाः संकिपा ‘कीर्तिमान’या भिं–साईत ज्याझ्वः नं याःगु दु ।

किपू नगरपालिका प्रमुख रमेश महर्जनं त्वाःदेवाय् मत च्याकाः ज्याझ्वःया उलेज्या यानादिसें ज्येष्ठ नागरिकपिं धैपिं सकलसिगु नितिं द्यः सम्मान जूगु खँ न्ह्यथनादिल । नगर प्रमुख महर्जनं चिहाः संकिपा ‘कीर्तिमान’ निर्माण पुचःयात सफलताया कामना यानादिल ।

अथेहे, मेयर रमेश महर्जन व उपमेयर सरस्वती रिजाल खड्कां मंकाः कथं चिहाः संकिपा ‘कीर्तिमान’या ब्यानर उलेज्या यासें चिहाः संकिपाया भिं–साईत ज्याझ्वः यानादीगु खः ।

किपू नगरपालिका ३ वडा ज्याकू न्ह्यःने धःपा दुपातय् शुक्रवाः सुथय् ६ ता इलय् किपू नगरपालिकाया प्रमुख रमेश महर्जनया मूपाहाँसुइ व उप–प्रमुखलिसें सरस्वती  खड्काया विशेष पाहाँसुइ नगरपालिकाया १ वडाया अध्यक्ष हर्ष महर्जन, २ वडाया अध्यक्ष रमेशमान डंगोल पाहाँ कथं उपस्थित जुयादीगु खः ।

भिं–साईत ज्याझ्वलय् किपू नगरपालिका ३ वडाया वडाध्यक्ष राजेन्द्र महर्जनं ज्येष्ठ नागरिकपिन्त लुम्बिनी व गोरखपुर देश दर्शन भ्रमणया आज्जुया विषयस ध्वाथुइकादीगु खः ।

ज्याझ्वलय् उप–प्रमुख खड्कां देश दर्शन भ्रमणया पुचःयात भिं यात्राया कामनाया यासें चिहाः संकिपा याकनं पूवंकाः स्वयेदयेमा धकाः कामना यानादिल ।

किपू नगरपालिका ३ वडाया वडासचिव काजिराम मालाकारं न्ह्याकादीगु उगु ज्याझ्वलय् संकिपा निर्माण पुचःया बाखंच्वमि जुजुभाइ महर्जन, परिकल्पनाकार ज्ञानकुमार महर्जन, क्यामेरा पर्सन प्रताप महर्जन व निर्देशक ललेन्द्र शाक्ययात खादा क्वखायेकाः भिंतुना देछाःगु खः । चिहाः संकिपा ‘कीर्तिमान’य् ३ वडाया हे कुतिसा त्वाःया नांजाःम्ह संगीतकःमि ज्ञानेश्वर निभाः नं दयेकादीगु ज्येष्ठ नागरिक समर्पित म्ये नं दुथ्याइगु जूगु दु ।

चिहाः संकिपा ‘कीर्तिमान’ भिं–साईत लिपा देश दर्शन भ्रमणय् सहभागी ज्येष्ठ नागरिकपिन्त नगर प्रमुुख महर्जन, उप–प्रमुख खड्का, १ वडा नायः हर्ष महर्जन, २ वडा नायः रमेशमान डंगोल, ३ वडा नायः राजेन्द्र महर्जनपिन्सं थीथी हलंज्वलं लःल्हानादीगु खः ।

किपू नगरपालिकाय् जनप्रतिनिधिपिं वयेधुंकाः दकलें न्हापां किपू नगरपालिका ३ वडा पाखें ज्येष्ठ नागरिकपिन्त देश दर्शन भ्रमण ज्याझ्वः न्ह्याकूगु खः । थुगु वडां दँयदसं थीथी थासय् ज्येष्ठ नागरिकपिन्त मदिक्क देश दर्शन भ्रमणया ज्याझ्वः न्ह्याकाः वयाच्वंगु दु । न्यादँया दुने थुगुसीया लुम्बिनी व गोरखपुर दकलें लिपांगु  भ्रमण खः ।

३ वडा ज्याकुथिं न्ह्याकूगु ज्येष्ठ नागरिक देश दर्शन भ्रमणयात हे कयाः किपू नगरपालिकाया थीथी वडां थुकथं हे ज्येष्ठ नागरिक देश दर्शन भ्रमण यंकेगु ज्याभ्वः न्ह्याकूगु खः ।

Categorized in कला