Mohanai 2078 KTM

किपू नगरपालिका अन्तर वडा यू १९ फुटसल कासाया थौं फाइनल

नेवा: अनलाइन न्युज – ललेन्द्र शाक्य | २०७८ आश्विन १४, बिहिबार ०९:०२:३१

‘सांस्कृतिक व प्राकृतिक सम्पदां जाःगु शैक्षिक व पर्यटकीय शहर : स्वच्छ, हराभरा, समावेशी व समुन्नत झीगु किपू नगर : जिगु किपू, समृद्ध किपू’ नारा थ्वयेकाः किपू नगरपालिका ३ वडा व बाल संजाल ३ वडा किपूया मंकाः ग्वसालय् बुधवाः कीर्तिपुर नगरपालिका अन्तर वडा यू–१९ फुटसल कासाया उलेज्या जूगु दु ।

किपूया १० वडा ट्यांग्लाफाँटय् च्वंगु कीरनगर फुटसल मैदानय् जूगु उगु ज्याझ्वलय् किपू नगरपालिकाया मेयर रमेश महर्जन मूपाहाँ कथं झाःगु खःसा उपमेयर लिसें नगरपालिकाया प्रवक्ता सरस्वती रिजाल खड्का विशेष पाहाँ कथं झाःगु खः ।

ग्वसाः खलः किपू नगरपालिका ३ वडाया वडाध्यक्ष राजेन्द्र महर्जनया सभानायःसुइ न्ह्याःगु उगु ज्याझ्वलय् किपू नगरपालिका १ वडाया वडाध्यक्ष हर्ष महर्जन, ६ वडाया वडाध्यक्ष न्हुच्छेबहादुर महर्जन, ९ वडाया वडाध्यक्ष गंगाराम महर्जन, १० वडाया वडाध्यक्ष अमन महर्जनलिसें कीर्तिपुर नगरपालिका कार्यपालिका दुजः लिसें ३ वडाया मिसा वडा दुजः नन्ददेवी महर्जन, ३ वडाया हे वडा दुजः किपू नगरपालिका न्यायिक समितिया दुजः व नगरसभा दुजःलिसें फुटसल ज्याझ्वः व्यवस्थापक मिलन महर्जन, ३ वडाया मेम्ह वडा दुजः ज्ञानप्रसाद महर्जनपिं पाहाँ कथं उपस्थित जूगु खः ।

ज्याझ्वलय् कीर्तिपुर बास्केटबल एसोसिएसनया नायः बिकु महर्जनलिसें बाल संजाल ३ वडा नायः रिबिका श्रेष्ठ व फुटसल कासा कजि निश्चल श्रेष्ठपिं नं पाहाँकथं उपस्थित जूगु खः ।

ज्याझ्वःया सभानायः लिसें ग्वसाः खलः किपू नगरपालिका ३ वडाया वडाध्यक्ष राजेन्द्र महर्जनया लसकुस न्वचूपाखें न्ह्याःगु फुटसल उलेज्या ज्याझ्वलय् किपूया मेयर रमेश महर्जनं फुटसल कासाया ब्यानरय् च्वयातःगु आखः वाचन यानाः कासाया औपचारिक रुपं उलेज्या यानादीगु खः ।

ज्याझ्वलय् मूपाहाँ मेयर रमेश महर्जनं किपू नगरदुने फुक्क वडां थीथी कासाया ग्वसाः ग्वयेमाःगु व ग्वसाः ग्वयेत आह्वान यासें कासा जीवन सुथां लाकेगु छगू स्यल्लाःगु पक्ष जूगु विचाः प्वंकादिल । 

अथेहे, विशेष पाहाँ किपू नगरया उपमेयर लिसें नगरपालिकाया प्रवक्ता सरस्वती रिजाल खड्कां यू १९ या कासा धैगु किशोरावस्थाया कासा जूसां नं किशोरावस्थाया कासां हे कासामिपिनिगु जीवन सफलताया निर्धारण याइगु जूगुलिं दुनुगलंनिसें अनुशासित जुयाः लक्ष्य प्राप्तिया नितिं उपलब्धीमूलक ढंगं कासा म्हितेत कासामिपिन्त इनाप यासें कासामिपिनिगु सफलताया नितिं भिंतुना देछानादीगु खः ।

ज्याझ्वलय् फुटसल कासाया रेफ्रीयात मूपाहाँ मेयर रमेश महर्जनं बल लःल्हानाः कासाया शुभारम्भ यानादीगु खःसा ज्याझ्वः किपू ३ वडाया न्हूप्रतिभा ज्याझ्वः न्ह्याकामि रितिका मानन्धरं न्ह्याकादीगु खः ।

किपू नगरपालिकाया झिगू वडा दुनेया मुक्कं झिंनिगू पुचलं ब्वति काःगु कीर्तिपुर नगरपालिका अन्तर वडा यू १९ फुटसल कासाया बिजं कासा (फाइनल कासा) थौं असोज १४ गते जुइ ।

लिग कम नकआउट बेसिसं जूगु उगु यू १९ फुटसल कासापाखें किपू लागाय् न्हून्हूपिं प्रतिभावान् कासामिपिं पिहाँ वइगु आज्जु काःगु दु ।

 

Categorized in कासा