Mohanai 2078 KTM

किपू नगरपालिका अन्तर वडा यू–१९ फुटसल कासाया उपाधि ६ वडायात

नेवा: अनलाइन न्युज – ललेन्द्र शाक्य | २०७८ आश्विन १५, शुक्रबार ०९:१३:१५

असोज १३ गते बुधवाःनिसें असोज १४ गते बिहिवाःतक निन्हुयंकं न्ह्याःगु किपू नगरपालिका अन्तर वडा अण्डर १९ फुटसल कासा क्वचाःगु दु ।

किपू नगरपालिका ३ वडा ज्याकुथि व बाल संजाल ३ वडा किपूया मंकाः ग्वसालय् जूगु उगु फुटसल कासा किपूया मेयर रमेश महर्जनं उलेज्या यानाः न्ह्याःगु खःसा बिहिवाः फाइनल कासा क्वचाःगु खः ।

असोज १४ गते बिहिवाः किपू नगरपालिका ४ वडा बि व किपू नगरपालिका वडा ६ या दथुइ फाइनल कासा जूगु खः । कासाय् ६ वडा विजयी जुयाः उपाधि कप ल्ह्वनेत ताःलाःगु खः । ६ वडां ४ वडा बि यात ५–० गोल अन्तरं बुकूगु खः ।

कासाय् न्हाप लाःगु टिम किपू ६ वडा व ल्यू लाःगु ४ वडा बि या कासामिपिन्त किपू नगर मेयर रमेश महर्जन, उपमेयर लिसें प्रवक्ता सरस्वती रिजाल खड्का नापनापं नगरया वडाध्यक्ष जनप्रतिनिधिपिं, प्रशासकीय अधिकृतया ल्हाःतं ट्रफी, दसिपौ, मेडललिसें नगद सिरपाः लःल्हायेगु ज्याझ्वः जूगु खः । कासा किपू नगरपालिका १० वडा ट्यांग्लाफाँटय् च्वंगु क्रीनगर फुटसल मैदानय् जूगु खः ।

ग्वसाः खलः किपू नगरपालिका ३ वडाया वडाध्यक्ष राजेन्द्र महर्जनया सभापतित्वय् न्ह्याःगु उगु ज्याझ्वलय् मेगु ग्वसाः खलः बाल संजाल ३ वडा किपूया नायः रिविका श्रेष्ठं लसकुस न्वचू बियादीगु खः ।

अण्डर १९ फुटसल कासाया रेफ्रीपिं साजन महर्जन, राम महर्जन, इची महर्जन व सिकन्दर महर्जनपिन्त नं मतिनाया चिं लःल्हाःगु उगु ज्याझ्वलय् विजयी टिम ६ वडाया बेष्ट प्लेयर ११ नम्बर जर्सीया सुमित थापा, ७ गोल यायेत ताःलाःम्ह हाई स्कोरर १० नम्बर जर्सीया क्रिजल थापा व १ नम्बर जर्सीया बेष्ट किपर विनोद दनुवारयात नं ट्रफी लःल्हाःगु खः ।

ज्याझ्वलय् पाहाँ कथं वडा ल्याः १ या वडाध्यक्ष हर्ष महर्जन, २ वडाया रमेशमान डंगोल, ४ वडाया कार्यवाहक वडाध्यक्ष सुरेन्द्र खनाल, ६ वडाया वडाध्यक्ष न्हुच्छेबहादुर महर्जन, ७ वडाया वडा सदस्य प्रकाश सिंह महर्जन, ८ वडाया वडाध्यक्ष विनोद महर्जन, ९ वडाया वडाध्यक्ष गंगाराम महर्जन, १० वडाया वडाध्यक्ष अमन महर्जनलिसें किपू नगरपालिकाया कार्यपालिका दुजःलिसें ३ वडाया मिसा वडा सदस्य नन्ददेवी महर्जन, किपू नगरपालिकाया प्रशासकीय अधिकृत कृष्णप्रसाद सापकोटा, किपू नगरपालिका न्यायिक समिति दुजः नगरसभा दुजः लिसें ३ वडाया वडा सदस्य व ज्याझ्वः कजि मिलन महर्जन, ३ वडा दुजः ज्ञानप्रसाद महर्जन, ३ वडा सचिव काजिराम मालाकार, बाल संजाल ३ वडाया नायः रिविका श्रेष्ठ, फुटसल कासा कजि निश्चल श्रेष्ठपिं पाहाँ कथं उपस्थित जुयादीगु खः ।

रसिक मालाकारं न्ह्याकादीगु उगु फुटसल सिरपाः लःल्हायेगु ज्याझ्वः ग्वसाः खलः किपू नगरपालिका ३ वडाया वडाध्यक्ष राजेन्द्र महर्जनं सुभाय् बिसें ज्याझ्वः क्वचायेकादीगु खः ।

Categorized in कासा