zero media family planning adv

किपू कोरोनापाखें प्रभावित, विदेशं वःपिं सेल्फ क्वारेन्टाइनय्

नेवा: अनलाइन न्युज – ललेन्द्र शाक्य | २०७६ चैत्र १३, बिहिबार ०७:५४:४५

किपुली ५० बेडया क्वारेन्टाइन आइसोलेशन वार्ड, नागरिकपिं सजग जुइत किपू नगरपालिकाया आह्वान

किपू नगर दुने नं कोभिड १९ नांया कोरोना भाइरस संक्रमणया ग्याःचिकुं आपालं थाय् कयाहःगु दु । किपू लागाया मनूत विदेशं लिहाँ वयेधुंकाः थःगु हे छेँय् सेल्फ क्वारेन्टाइनय् च्वनाच्वंगु दु ।

थ्वहे झ्वलय् किपू नगरपालिका २ वडाया वडाध्यक्ष लिसें किपू नगरपालिकाया सम्पदा, पर्यटन संस्कृति विभागया प्रमुख रमेशमान डंगोलं थःगु वडा दुने मेक्सिको, यूके व मकाउपाखें लिहाँ वःपिं स्वम्ह नागरिक सेल्फ क्वारेन्टाइनय् च्वनाच्वंगु जानकारी ब्यूगु दु ।

अथेहे, किपू नगरपालिका १ वडाया वडाध्यक्ष लिसें नगरपालिकाया सुचुपिचु विभागया प्रमुख हर्ष महर्जनं नं थःगु वडा दुने भारतया ब्यांग्लोरं चैत्र ६ गते लिहाँ वःम्ह नागरिक थःगु हे छेँय् सेल्फ क्वारेन्टाइनय् च्वनाच्वंगु दु धकाः जानकारी ब्यूगु दु ।

थ्वहे झ्वलय् किपू नगरपालिका १० वडाया वडाध्यक्ष अमन महर्जनं नं थःगु वडाया नागरिक चैत्र ६ गते ब्यांग्लोरं लिहाँ वःम्ह विद्यार्थी नागरिक थःगु हे छेँय् सेल्फ क्वारेन्टाइनय् च्वनाच्वंगु व चैत्र ४ गते कतार एयरवेजं लिहाँ वःम्ह थःगु हे वडाया नागरिक चेकअफया नितिं अस्पताल यंकाः माःगु जाँच जुयाच्वंगु जानकारी बियादीगु दु ।

थथे किपू नगरपालिका दुने विदेशं लिहाँ वःपिं आपालं दूगु व उपिं सेल्फ क्वारेन्टाइनय् च्वनाच्वंगुयात कयाः सचेत जनसमुदायपिन्सं छेँय् हे सेल्फ क्वारेन्टाइनय् मखुसे इमित अस्पतालय् हे यंकाः माःगु चेकजाँच यायेमाःगु खँय् बः बियाः वयाच्वंगु दु । थथे सम्बन्धित अस्पतालय् यंकाः इमिगु परीक्षण मयात धाःसा किपू लागाय् भयावह स्थिति ब्वलने फइगुलि नं सचेत याःगु दुसा थुकिया भाला नगरपालिकां क्वबिइमाःगु व नगरपालिका सक्रिय जुइमाःगुलि बः ब्यूगु दु ।

किपू नगरपालिकां नं आः बिदेशं लिहाँ वःपिनिगु जानकारी कायेगु व विदेशं लिहाँ वःपिन्सं थःथःगु वडाय् लिहाँ वयेधुनागु खँया जानकारी बिइत आह्वान याःगु दुसा आः किपू नगरपालिकाया नेतृत्वय् कीर्तिपुर अस्पताललिसे सहकार्य यानाः किपूया त्रिभुवन विश्वविद्यालयया खाली जुयाच्वंगु भवनय् क्वारेन्टाइन व आइसोलेशन वार्ड दयेकूगु दु ।

नगरपालिकां जानकारी ब्यूकथं उगु क्वारेन्टाइन व आइसोलेशन वार्ड ५० बेडया खःसा थौं चैत्र १३ गते बिहिवाःनिसें उगु क्वारेन्टाइन आइसोलेशन संचालन जुइगु जानकारी ब्यूगु दु ।

किपू नगरपालिकां आः सरकारं याःगु लकडाउनया इलय् सकल नागरिकपिन्त थःगु हे छेँ च्वनेत इनाप याःगु दुसा मजिमगाःगु इलय् जक पिहाँ वयेत धाःगु दु । नगरपालिकां किपू लागाय् च्वंपिं व विदेशं लिहाँ वःपिं आपालं दूगु व उपिं छेँय् दुने सेल्फ क्वारेन्टाइनय् च्वनाच्वंगुलिं कोरोना भाइरस संक्रमणपाखें तापाक्क च्वनेगु नितिं नं थःथःगु छेँ दुने हे च्वनेत सकल नगरवासीपिन्त अपिल यासें सजग व सतर्कताय् च्वनेत नं आह्वान याःगु दु ।

Categorized in स्थानिय-समाज