zero media family planning adv

किपूया सनस्टार क्लबं न्हापांगु लकडाउन फ्रेन्डसिप ब्याडमिन्टन कप कासा क्वचायेकल

नेवा: अनलाइन न्युज – ललेन्द्र शाक्य | २०७७ भाद्र २०, शनिबार १३:३३:३०

किपू नगरपालिका १० वडा चिथु त्वालय् च्वंगु सनस्टार क्लबं न्हापांगु लकडाउन फ्रेन्डसिप ब्याडमिन्टन कप २०७७ कासा ग्वसाः ग्वयाः क्वचायेकूगु दु ।

ग्वसाः खलः सनस्टार क्लबया दुजःपिनिगु दथुइ जूगु उगु कासाय् मुक्कं नीप्यम्ह (२४ म्ह) कासामिपिन्सं ब्वति काःगु खः ।

क्लबया दुजः कविन महर्जनया संयोजनय् जूगु उगु कासाय् रमित महर्जन व सन्तोष महर्जनं रेफ्रीया भूमिका म्हितूगु खः ।

शनिवाः क्वचाःगु फाइनल कासाय् राजन महर्जन व हिराकाजीया जोडीलिसे सुमन श्रेष्ठ व रविन्द्र महर्जनया जोडी म्हितूगु खः । उगु फाइनल कासाय् न्हाप राजन महर्जन व हिराकाजी महर्जनया जोडी जूगु दु ।

कासाय् ल्यू सुमन श्रेष्ठ व रविन्द्र महर्जनया जोडी, लियांल्यू मनकेश महर्जन व सजन महर्जनया जोडी लिसलिसें उदिप महर्जन व रोनित महर्जनया जोडी जूगु दु ।

अथेहे, कासाय् फेयर प्लेयर शिवराम महर्जन व विष्णुहरी महर्जन घोषित जूगु दुसा राइजिंग प्लेयर मुकेश महर्जन व बेष्ट डिफेन्स नहिन्द्र महर्जन जूगु दु ।

फाइनल कासा क्वचायेकाः बःचाधंगु ज्याझ्वः यासें सिरपाः लःल्हायेगु ज्याझ्वः जूगु खः । उगु ज्याझ्वलय् ग्वसाः खलः सनस्टार क्लबया नायः हिराकाजी महर्जन व छ्याञ्जे राजकुमार महर्जन मूपाहाँ कथं उपस्थित जूगु खः ।

कासा एनआर इन्टरप्राइजेज, बाघभैरव प्रिन्टिंग, फ्रेन्ज स्पोर्टस् सेन्टर, उत्सव लिक्वेयरया ग्वाहालि जूगु जानकारी कासाया कजि (संयोजक) कविन महर्जनं जानकारी ब्यूगु दु ।

त्याःपिं उत्कृष्ट कासामिपिन्त खादां न्ययेकाः सम्मान यासें मूपाहाँपिन्सं शिल्ड, दसिपौ लःल्हाःगु खः ।

सिरपाः लःल्हाये क्वचायेधुंकाः कासाया कजि कविन महर्जनं कासा मैत्रीपूर्ण जूगु जानकारी बिसें शारिरीक व मानसिक रुपं स्वस्थ जुइगु आज्जुं क्लबं क्लबया दुजःपिनिगु दथुइ कासा ग्वसाः ग्वयागु जानकारी बिसें सकल ग्वाहालिमिपिन्त सुभाय् देछाःगु खः ।

अथेहे, ग्वसाः खलः क्लबया नायः हिराकाजी महर्जनं सकल ग्वाहालिमिपिन्त सुभाय् देछाःसें फुक्कसिगु साथ व ग्वाहालि दत धाःसा थुगु कासायात निरन्तरता बियाः वनेगु बचं ब्यूगु दुसा कासा शारिरीक व मानसिक रुपं स्वस्थ जुइगु ज्याझ्वः जूगुलिं निरन्तरता बिइमाःगु खँय् बः ब्यूगु दु ।

कासा १० वडाया चिथु त्वालय् च्वंगु मैत्री बोधिसत्व विहार ( बहिलीइ) जूगु खः ।

Categorized in कासा