Mohanai 2078 KTM

किपूया शुभकामना ब्यांक्वेटय् थौं १४ गतेनिसें निक्वःगु मोहनी (दशैं) मेला

नेवा: अनलाइन न्युज – ललेन्द्र शाक्य | २०७८ आश्विन १४, बिहिबार ०८:०३:५३

किपूया ७ वडा टाउन प्लानिङ्ग भाजंगलय् च्वंगु शुभकामना ब्यांक्वेटय् थौं असोज १४ गते बिहिवाःनिसें २१ गते बिहिवाःतक च्यान्हु यंकंया नितिं निक्वःगु मोहनी (दशैं) मेला २०७८ न्ह्याःगु दु । थुगु ब्यांक्वेटं न्हापा नं न्हापांगु मेला ग्वसाः ग्वयेधुंकूगु दु ।

बुधवाः छगू पत्रकार सम्मेलन यानाः निक्वःगु मोहनी (दशैं) मेला २०७८ या जानकारी ग्वसाः खलः शुभकामना ब्यांक्वेटं ब्यूगु खः । थौं बिहिवाः असोज १४ गते किपू नगरपालिकाया मेयर उपमेयरपिनिगु मूपाहाँसुइ मेलाया उलेज्या जुइगु जानकारी बिसें ग्वसाः खलकं मेला न्हिथं सुथसिया १० ता ईनिसें बहनीसिया ८ ता ईतक न्ह्याइगु जानकारी नं ब्यूगु दु ।

पत्रकार सम्मेलनय् मेलाया ग्वसाः खलः शुभकामना ब्यांक्वेटया ऋसु नेपालीं सांस्कृतिक व लोप जुइत्यंगु बाजागाजाया जगेर्ना यायेगु लिसें किपूया सकतां सांस्कृतिक सम्पदाया महत्वया म्हसीका बिइगु आज्जु उगु मेला ग्वसाः ग्वयागु जानकारी ब्यूगु दु ।

पत्रकार सम्मेलनय् नेपालीं धाःगु दु, ‘किपू नगर दुनेया मिसा उद्यमशील तःकेहेँपिन्सं निर्माण यानादीगु हलंज्वलंया बजारीकरणय् टेवा बिइगु आज्जु हे थुगु मेलाया मू आज्जु खः । कोरोनाया प्याण्डेमिकया ट्रोमा चिइकेत रिफ्रेशमेन्ट प्रोग्रामया रुपं नं थुगु मेला ग्वसाः ग्वयागु खः । अथेहे, मेलाय् नेवाः समुदायया कला संस्कृति व नसाज्वलंया ब्वज्या जुइ ।’

ब्यांक्वेटया भाजु नेपालीं धयादी, ‘युवापिं जानाः पलाः न्ह्याकल धाःसा अवश्य नं थुज्वःगु ज्याझ्वःत सुथांलाक्क न्ह्याकेफइगु दसू हे थुगु मेला खः । मेलाय् किपू नगरं पिनेच्वंपिं ब्यापारीपिनिगु हलंज्वलं बहिष्कार यानाः झीगु स्थानीय किपू नगरया ब्यापारी लिसें समूह समुदायपाखें निर्माण जूगु हलंज्वलंया उपभोग याकेगु मेलाया आज्जु खः ।’ 

ग्वसाः खलः शुभकामना ब्यांक्वेटया ऋसु नेपालीं असोज १४ गते बिहिवाःनिसें २१ गते बिहिवाःतक न्ह्याइगु मेलाय् अवलोकन यायेगु नितिं सकलसित ब्वनाच्वना धासें मेलाय् सहभागी जुइत सकलसित इनाप याःगु दु ।

पत्रकार सम्मेलनय् किपूया थीथी संचारमाध्यममा पत्रकारपिनिगु उपस्थिति दूगु खः ।

Categorized in बजाः