swastha 3

किपूया रुक्सानाया ‘सुला सुला ...वा’ न्हूगु म्यूजिक भिडियो थौं सार्वजनिक जुइगु

नेवा: अनलाइन न्युज – ललेन्द्र शाक्य | २०७८ भाद्र २४, बिहिबार १२:५३:५५

कलाकारिता ख्यलय् संकिपा व म्यूजिक भिडियोय् थीथी भूमिकाय् अभिनय यानाः थःगु प्रतिभा न्ह्यब्वयाः वयाच्वनादीम्ह किपूया प्रतिभावान् कलाकार रुक्साना महर्जनया मू भूमिका दूगु न्हूगु म्यूजिक भिडियो ‘सुला सुला...वा’ थौं बिहिवाः सार्वजनिक जुइत्यंगु दु ।

यूटुयुब च्यानलपाखें सार्वजनिक जुइगु उगु म्यूजिक भिडियो नांजाःम्ह म्येहालामि सानुबाबु महर्जन व सबनम थापाया सलय् थ्वयाच्वंगु म्ये खःसा रोहितया च्वसां पिज्वःगु व नांजाःम्ह संगीतकःमि जुगल डंगोलं लसय् हनादीगु लिसें संगीत संयोजन यानादीगु म्ये खः ।

थौं बिहिवाः सार्वजनिक जुइगु न्हूगु म्यूजिक भिडियो ‘सुला सुला...वा’य् कलाकार रुक्साना महर्जनयात लोकंह्वाःम्ह कलाकार सुरज व्यञ्जनकारं मू भूमिकाय् साथ बियादीगु दु । अथेहे, म्यूजिक भिडियो दुने मचाकलाकार निश्लिति बज्राचार्य व सोन शाक्यपिन्सं अभिनय यानादीगु दु ।

नांजाःम्ह संगीतकःमि अमर चित्रकारया सम्पादन व छायांकनय् पिदनीगु थुगु म्यूजिक भिडियोया निर्देशन थौंकन्हय् लिमलाःम्ह निर्देशक राजन शाहीं यानादीगु दुसा समाः उमेश (उमिशा) पाण्डें यानादीगु दु ।

म्यूजिक भिडियो बिहिवाः बहनी ७ ता इलय् सार्वजनिक जुइगु जानकारी कलाकार रुक्साना महर्जनं बियादीगु दु ।

किपूया म्येच्वमि कवि रामभक्त रमझम महर्जनं च्वयादीगु व बरिष्ठ संगीतकार गुज्ये मालाकारं लसय् हनादीगु  अथेहे किपूया हे म्येहालामि नारायणदेवी महर्जनया सलं थ्वयाच्वंगु ‘बसन्त वल...’ बोलया म्येया म्यूजिक भिडियो म्हिताः थुगु कलाकारिता ख्यलय् पलाः न्ह्याकादीम्ह कलाकार रुक्साना महर्जनं वधुंकाः निरन्तर रुपं थीथी म्यूजिक भिडियो व संकिपाय् अभिनय यानाः वयाच्वनादीगु दु ।

थःके सुलाच्वंगु प्रतिभा न्ह्यब्वया कलाकारिता ख्यलय् जीवन अर्पण यायेगु तातुनाः थुगु ख्यलय् नुगः क्वसाःगु विचाः प्वंकादीम्ह कलाकार रुक्साना महर्जनं छम्ह कलाकार जुइधुंकाः न्ह्याग्गु कथंया अभिनय यायेफयेमाः धकाः धयादीगु दु । वय्कलं उज्वःगु जोखिमयुक्तं एक्सनंलिसें वियोगं जाःगु दुःखान्त अभिनय यायेत थः तयार दूगु विचाः नं प्वंकादीगु दु ।

थौं बिहिवाः पिदनीगु रुक्सानाया न्हूगु म्यूजिक भिडियो स्वये, वय्कलं गुज्वःगु कथं अभिनय यानादीगु दु ।

Categorized in कला