zero media family planning adv

किपूया मेयरया ल्हाःतं किपू बस सेवाया मेट्रो कार्ड उलेज्या

नेवा: अनलाइन न्युज – ललेन्द्र शाक्य | २०७७ माघ ३०, शुक्रबार १२:१७:३३

...झीगु किपू, समृद्ध किपू...मेट्रो कार्ड किपू बस सेवा...श्लोगान थ्वयेकाः किपू बस सेवां नेपालय् हे न्हापांगुखुसि नगद रहित यात्रा यायेगु पलाः न्ह्याकूगु दु ।

किपुली न्ह्यानाः वयाच्वंगु किपू बस सेवा प्रा.लिं म्हिगः बिहिवाः आधुनिक प्रविधि छ्यलाः मेट्रो कार्ड प्रणाली न्ह्याकूगु खः । उगु कार्डपाखें भुक्तानी जुइगु जुयाः यातायातय् यात्रा यायेबलय् दां पुलेम्वाःगु व्यवस्था याःगु खः । ज्याझ्वः बिहिवाः किपू नगरपालिका ९ वडा न्हूबजारय् च्वंगु कृष्ण क्याटरिंगया हलय् जूगु खः ।

किपू नगरपालिका संरक्षक कथं दूगु किपू बस सेवाया मेट्रो कार्डया उलेज्या किपू नगरपालिकाया मेयर रमेश महर्जनं त्वाःदेवाय् मत च्याकाः यानादीगु खः ।

उलेज्या लिपा मेयर रमेश महर्जनं किपू बस सेवां संचालनय् हःगु मेट्रो कार्ड आधुनिक विश्व समाजलिसे भेलेपुइगु छगू नमूना किपूपाखें न्ह्याःगु खँ कनादिसें उगु कार्डपाखें किपू नगरपालिकालिसेया कालबिल लिसेलिसें फुक्क ख्यलय् कालबिल यायेगु कार्ड जुइगुलि नं बिश्वास प्वंकादीगु दु ।

मेयर महर्जनं थौंकन्हयया आधुनिक जमानालिसे ताय् तिति यानाः वनेगु नितिं किपू नगरपालिका किपू लागा दुने ६५ गू थासय् फ्रि इन्टरनेटया रुपं विकास यायेगु खँया जानकारी बियादिसें नगरपालिकाया सकतां वडाय् अफलाइनय् नं ज्या यायेजिइगु कथंया प्रविधि विकास यायेत्यनागु जानकारी नं बियादीगु दु । वय्कलं आः न्ह्याग्गु वडाया बासिन्दा जूसां न्ह्याग्गु वडाय् वनाः थःगु ज्या यायेफइगु ब्यवस्था नं किपू नगरपालिकाय् जुइगु जानकारी नं बियादीगु दु ।

मेयर महर्जनं आः किपू बस सेवा प्रा.लिं थुकथं मेट्रो कार्ड प्रणाली लागू यायेधुंकाः किपूया जनजीवनय् सकारात्मक रुपं हिउपाः वइगु खँय् नं बियादिल ।

किपू बस सेवा प्रा.लि.या नायः अर्जुन सिंहया सभापतित्वय् न्ह्याःगु उगु ज्याझ्वलय् किपू नगरपालिकाया मेयर मूपाहाँ कथं उपस्थित जुयादीगु खः ।

अथेहे, ज्याझ्वलय् पाहाँ कथं महानगरीय प्रहरी वृत्त किपूया डिएसपी रुकेश तण्डुकार, वी पे प्रा.लि.या नायः डा. शंकरप्रसाद आचार्य, एन क्लाउड प्रा.लि.या प्रमुख कार्यकारी अधिकृत दीपेन्द्र नारायण श्रेष्ठ, सार्वजनिक यातायात प्रा.लि. महासंघया नायः होमप्रसाद अधिकारी, सार्वजनिक यातायात प्रा.लि. महासंघया बरिष्ठ न्वकू किरण रिमालपिं मंचय् च्वनादीगु खः ।

वी पे प्रा.लि. व एन क्लाउड प्रा.लि.या सहकार्यस हे किपू बस सेवां उगु मेट्रो कार्ड प्रणाली छ्यलाबुलाय् हःगु खःसा स्वंगू कथंया उगु मेट्रो कार्ड लागू जुइगु जानकारी नं ब्युगु दु । विद्यार्थीपिनिगु नितिं स्टुडेन्ट कार्ड, सर्वसाधारणया नितिं नर्मल कार्ड व ज्येष्ठ नागरिक अपांग असहायपिनिगु नितिं ब्यागलं कार्डया ब्यवस्था जुइगु जानकारी ज्याझ्वलय् ब्युगु दु ।

ज्याझ्वलय् किपू बस सेवाया नायः लिसें ज्याझ्वःया सभापति अर्जुन सिंह व किपू नगरपािलकाया मेयर लिसें ज्याझ्वःया मूपाहाँ रमेश महर्जनं पाहाँपिन्त व ग्वाहालिमिपिन्त मतिनाया चिं लःल्हानादीगु खः ।

ज्याझ्वः सभापति लिसें किपू बस सेवाया नायः अर्जुन सिंहं क्वचायेकादीगु खःसा ज्याझ्वः किपू बस सेवाया व्यवस्थापक लिसें सार्वजनिक यातायात प्रा.लि. महासंघया छ्याञ्जे महेश्वर महर्जनं न्ह्याकादीगु खः ।

किपाः ज्ञानकुमार महर्जन, किपू

Categorized in बजाः