swastha 3

किपूया ब्वाकासामि धर्म महर्जनयात कीर्तिपुर खेलकुद विकास समाजपाखें भिंतुना व विदाई

नेवा: अनलाइन न्युज – ललेन्द्र शाक्य | २०७८ भाद्र २४, बिहिबार ११:४७:४७

किपूया गौरव नेपाःया शान कथं म्हस्यूम्ह किपूया १ वडा सलिंछेँ त्वाःया ब्वाकासामि म्याराथन धावक धर्म महर्जनयात थौं यँलाथ्व दुतिया (भाद्र २४ गते) बिहिवाः तःजिक भिंतुना व विदाई ज्याझ्वःया ग्वसाः ग्वःगु दु ।

म्याराथन धावक धर्म महर्जन वइगु सेप्टेम्बर २६ तारिखय् जुइगुृ बर्लिन म्याराथनय् ब्वति कायेत थ्वहे वइगु भाद्र ३१ गते उखेपाखे वनेत्यंगु दु ।

धावक महर्जनया बर्लिनय् जुइगु म्याराथनय् सफलताया कामना यासें कीर्तिपुर खेलकुद विकास समाजं थौं बिहिवाः तःजिक भिंतुना व विदाई ज्याझ्वःया ग्वसाः ग्वःगु खः । 

किपूया ९ वडा न्हूबजाः पांगा वनेगु दुपातय् च्वंगु कृष्ण क्याटरिङया हलय् जूगु उगु भिंतुना व विदाई ज्याझ्वलय् प्रदेश ३ या सांसद पुकार महर्जनलिसें किपू नगरपालिकाया उपमेयर लिसें प्रवक्ता सरस्वती रिजाल खड्का, अन्तर्राष्ट्रिय धावक बैकुण्ठ मानन्धरपिनिगु विशेष उपस्थिति दूगु खः ।

अथेहे, ज्याझ्वलय् भिंतुना व विदाई ज्याझ्वःया ग्वसाः खलः कीर्तिपुर खेलकुद विकास समाजया प्रदीप महर्जन, वडा ल्याः १० या वडाध्यक्ष अमन महर्जन, समाजसेवी शिवशरण महर्जन, खेलकुदविज्ञ प्रा.डा. रामकृष्ण महर्जन लिसेलिसें खेलकुदह्यःमि थीथी व्यक्तित्वपिनिगु उपस्थिति दूगु खः ।

उगु भिंतुना व विदाई ज्याझ्वलय् धावक धर्म महर्जनयात उपस्थित सकलसिनं खादा न्ययेकाः स्वां सिन्हः देछानाः सफलताया कामना यासें भिंतुना व विदाई लःल्हाःगु खः ।

किपूया धावक धर्म महर्जनं बेस्टन म्याराथनय् ब्वति कयाः ३ घण्टा ५ मिनेटय् ब्वाकासा पूवंकूगु खः ।

अथेहे, हलिमय् तःधंगु चर्चित मेमेगु प्यंगू ब्वाकासा म्याराथन दौड सिकागो, लण्डन, टोकिया व न्यूयोर्क म्याराथन दौडय् ब्वति कायेगु आज्जु दूगु जानकारी ब्वाकासामि धर्म महर्जनं ब्यूगु दु ।

Categorized in कासा