prabhu baink new

किपूया बुँख्याः ...छ्वय्ला बजि...ज्वनाः सेप्टेम्बर १ मंगलवाः वइगु

नेवा: अनलाइन न्युज – ललेन्द्र शाक्य | २०७७ भाद्र १३, शनिबार १०:५९:०४

ललेन्द्र शाक्य

...जिमि बाज्यां धाःगु थौं छ्वय्ला बजि नयेगु दिन, भुतुलिइ सु दुयाः थौं छ्वय्ला छुइगु दिन । मल्ता चि हाः यानाः चिकं क्वयेकाः झ्वाँय् याना, मूसःगु अय्लाःनाप नल नल नल छ्वय्ला बजि...।

थ्व म्ये नेपालभाषा संगीत ख्यलय् न्हूगु प्रयोग कथं दकले न्हापांगुखुसिया मेटल म्ये खः । थ्व म्ये युवापुस्ता दथुइ अतिकं लोकं ह्वाइगुलि निगू मत मदु । मेटल संगीत यःपिं युवापुस्ता दथुइ अवश्यं लोकं ह्वा हे ह्वाइ ।

मेटल संगीत धैगु हे म्येग्वःपाखें ब्यंग्य प्रहार यायेगु संगीत खः । हलिंन्यंकं मेटल संगीत थुकथं हे ब्वलनाच्वंगु दु । किपूया बुँख्याः ब्याण्डं नं ब्याण्डया न्हापांगु म्यूजिक भिडियो कथं ...छ्वय्ला बजि... मेटल संगीतपाखें समाजय् ब्वलनाच्वंगु यथार्थ परिवेश व सामाजिक चित्रणयात ब्यंग्य यानातःगु दु ।

नेवाः समाजय् दुसां मदुसां सकल मनूतय्गुु दथुइ छ्वय्ला बजि नये हे माःगु बाध्यात्मक रहर ब्वलनाच्वंगु दु । थुगु हे बाध्यात्मक रहरयात स्यल्लाक्क यथार्थ ब्यंग्य प्रहार यानातःगु दु किपूया बुँख्याः ब्याण्डया न्हापांगु मेटल म्येया म्यूजिक भिडियो ...छ्वय्ला बजि...दुने ।

थुगु मेटल म्ये ...छ्वय्ला बजि...वइगु सेप्टेम्बर १ तारिख मंगलवाः बुँख्याःया यूट्युब च्यानलपाखें सार्वजनिक जुइगु जानकारी बुँख्याः ब्याण्डया भोकलिष्ट लिसें म्यूजिक भिडियोया निर्देशक निर्गमन महर्जनं जानकारी बियादीगु दु ।

म्ये मेटल, म्यूजिक भिडियोया सकतां लू नेवाः परिवेशया यथार्थ चित्रण दुथ्याःगु खँया जानकारी थुगु ...छ्वय्ला बजि...म्यूजिक भिडियोया सम्पादक, कलर एनिमेटर राजेश शाक्यं बियादीगु दु । वय्कलं थुगु म्येया म्यूजिक भिडियो मचांनिसें बुरातकं नं य्येकीगु विचाः प्वंकादीगु दु ।

अथेहे, बुँख्याः ब्याण्डया ब्याण्ड म्यानेजरलिसें ...छ्वय्ला बजि...म्यूजिक भिडियोया व्यवस्थापक सुबन जोशीं नेवाः समाज दुने बांलाःगु पक्षत आपालं दूगु व उगु बांलाःगु पक्षय् नं नकारात्मक लिच्वः लाइगु कथं परम्परा व चलनयात कःघाये हे माःगु यथार्थतायात ...छ्वय्ला बजि...म्यूजिक भिडियों कुतः यानागु जानकारी बियादीगु दु ।

 

ने.सं. ११२२ स नीस्वंगु किपूया बुँख्याः ब्याण्डं मेटल संगीत दुने नेवाः मेटल संगीत सिर्जना यायेगु यानाः वयाच्वंगु दु । बुँख्याः ब्याण्डया भोकलिष्ट निर्गमन महर्जनं थुगु विषयस धयादी, पाश्चात्य सांगितिक मेटल ब्याण्ड मेटालिकापाखें हे प्रभावित जुयाः मेटल संगीतपाखे नुगः क्वसाःगु खः । थः नेवाः जुयागु हुनिं नेवाः भासं नं मेटल संगीत सिर्जना यायेज्यू व थःगु हे मांभासं मेटल म्येत निर्माण यायेगु सोंचं हे थुगु ...छ्वय्ला बजि...मेटल संगीत सिर्जना जूगु खः । जिमिगु बुँख्याः ब्याण्डं नं नेवाः भाषायात अप्वः प्राथमिकता बियाः नेवाः मेटल संगीत सिर्जना यानागु खः । सम्भवतः थ्व ...छ्वय्ला बजि...मेटल म्येया म्यूजिक भिडियो नेपालभाषा ख्यलय् दकले न्हापांगु नेवाः मेटल संगीत जुइ ।

आपालं स्टेजय् कन्सर्ट बिइधुंकूगु बुँख्याः ब्याण्ड मेटल संगीत ख्यलय् लोकंह्वाःगु ब्याण्ड खः । थुगु ब्याण्डय् आः निर्गमन महर्जन भोकलिष्ट व गितारिष्टया रुपं दुसा सजिव महर्जन ड्रमय्, अनिल महर्जन बास गितारय् व सुवन जोशी ब्याण्ड म्यानेजरया रुपं दु ।

बुँख्याः ब्याण्डया ...छ्वय्ला बजि...म्यूजिक भिडियो निर्माणया नितिं कीर्ति इभेन्ट्सं संयोजन याःगु खःसा रोयल इन्टरटेन्टमेन्टं विशेष ग्वाहालि याःगु दु । अथेहे, थुगु म्यूजिक भिडियोय् दिपु कुमार महर्जन, गणेश रोजर्स व सम्राट महर्जनपिन्सं सिनेम्याटोग्राफरया भूमिका म्हितादीगु दुसा मेकअप आर्टिष्टया रुपं सोफी गुरुंग व शान्ति गुरुंगं भूमिका म्हितादीगु दु । व्यवस्थापनया भाला सुवन जोशी व विजेन महर्जनं यानादीगु थुगु म्येया निर्देशन निर्गमन महर्जन व सम्पादनलिसें कलर एनिमेशन राजेश शाक्यं यानादीगु दु ।

नेपालभाषा संगीत ख्यलय् दकले न्हापांगुखुसि नेवाः मेटल संगीतया सिर्जना व नेवाः मेटल म्यूजिक भिडियोया निर्माण किपूया बुँँख्याः ब्याण्डं याःगु दु । नेवाः संगीत ख्यलय् नेवाः मेटल संगीत सिर्जना यानाः सांगितिक इतिहासय् लुँ आखलं दकले न्हापांगु मेटल म्ये व म्यूजिक भिडियो निर्माण याःगु धलखय् च्वयेगुलि किपूया बुँख्याः ब्याण्ड अग्रपंक्तिइ लाःगु दु ।

बुँख्याः ...यूट्युब च्यानल

Categorized in कला