nepal life 2076 3 18

किपूया धर्म महर्जन बर्लिन म्याराथनया नितिं बिहिवाः जर्मनी प्रस्थान

नेवा: अनलाइन न्युज – ललेन्द्र शाक्य | २०७८ भाद्र ३१, बिहिबार ०९:४६:४९

विश्व प्रसिद्ध म्याराथन मध्येया छगू बर्लिन म्याराथनय् किपूया धावक धर्म महर्जनं सहभागिता प्वंकीगु जूगु दु । उकिया नितिं धावक महर्जन बिहिवाः जर्मनीया बर्लिन प्रस्थान याःगु दु ।

बैकुण्ठ मानन्धर खेलकुद नेपाल व गजराज जोशी मेमोरियल ट्रष्टया मंकाः ग्वसालय् धावक धर्म महर्जनयात विदाई ज्याझ्वः याःगु दु ।

धावक धर्म महर्जनयात अखिल नेपाल फुटबल संघ (एन्फा)या पुलांम्ह नायः गणेश थापा, दक्षिण एसियाली खेलकुद (साग)या कीर्तिमानी म्याराथन धावक बैकुण्ठ मानन्धर , पुलांम्ह धावक लिसें म्येच्वमि साहित्यकार बुद्धवीर लामा, ट्रष्टया नायः मनिषराज जोशी लिसेंयापिन्सं बिदाई याःगु खः ।

धावक महर्जनं सेप्टेम्बर २६ तारिखय् जुइगु ४२.१९५ किलोमिटरया बर्लिन म्याराथनय् धेंधेंबल्ला याइ । धावक धर्म महर्जन सहभागी जुइगु ४५ द च्वय् उमेर समूहया म्याराथनय् थ्यंमथ्यं झिद्वःम्ह ( १० हजारम्ह) धावकपिनिगु सहभागिता दइगु जानकारी ब्यूगु दु ।

धावक महर्जनया थ्व समग्रय् गुक्वःगु अन्तर्राष्ट्रिय सहभागिता खः । थ्वसिबें न्ह्यः महर्जनं अमेरिका, थाइल्याण्ड, जापान, नेदरल्याण्ड व चीनय् थीथी दूरीया ब्वाकासाय् सहभागिता क्यनेधुंकूगु दु ।

उकी जापानय् जूगु १८ क्वःगु एसियाली मास्टर्स च्याम्पियनसिपय् धावक धर्म महर्जनं कास्य पदक त्याकूगु खः । गुगु महर्जनया करियरय् हे दकले तःधंगु उपलब्धी खः । महर्जनं स्वंगू राष्ट्रिय एथ्लेटिक्स कासाया फूल म्याराथनपाखे सहभागिता प्वंकेधुंकूगु दु ।

धावक धर्म महर्जनं बर्लिन म्याराथनय् २ घण्टा ४५ मिनेटय् ब्वाकासा पूवंकेगु आज्जू दूगु धासें सहभागिताया नितिं ग्वाहालिमिपिन्त सुभाय् देछाःगु दु । महर्जनया कथं बर्लिन म्याराथनय् ब्वति कायेगु नितिं किपू नगरपालिकां ५० हजार, कीर्तिपुर खेलकुद विकास समाजं २१ हजारलिसें व्यक्तिगत रुपं नं आपालं ग्वाहालि वःगु जानकारी ब्यूगु दु ।

विदाई ज्याझ्वलय् एन्फा पुलांम्ह नायः गणेश थापां २५ हजार व ट्रष्ट या नायः जोशीपाखें ५ हजार तका आर्थिक ग्वाहालि उपलब्ध याकूगु खः । बैकुण्ठ मानन्धर खेलकुद नेपालं नं धावक धर्म महर्जनयात आर्थिक ग्वाहालि ब्यूगु दु । ट्रष्टया नायः जोशीं धावक धर्म महर्जनं बर्लिन म्याराथनय् उत्कृष्ट प्रदर्शन याःगु खण्डय्  नगद सिरपाः लिसें पुरस्कृत यायेगु प्रतिबद्धता प्वंकूगु दु ।

धावक धर्म महर्जनयात थःगु गृहनगर किपू नगरपालिका दुने छुं दिं न्ह्यः कीर्तिपुर खेलकुद विकास समाजं भिंतुना व विदाई ज्याझ्वःया ग्वसाः ग्वयाः महर्जनयात बर्लिन म्याराथय् सफलताया नितिं भिंतुना व विदाई बिइधुंकूगु दु ।

Categorized in कासा