zero media family planning adv

किपूया एरोन महर्जनं विश्व मातृभाषा दिवसय् ...हायेकाः नइगु ई...हाल

नेवा: अनलाइन न्युज – ललेन्द्र शाक्य | २०७७ फाल्गुण १०, सोमबार १६:३८:१९

किपूया नवोदित मचा म्येहालामि एरोन महर्जन विश्व मातृभाषा दिवसया विशेष ज्याझ्वलय् थःगु मांभाय् नेपालभाषाया म्ये हालाः दबुली दंगु दु ।

येँ महानगरपालिकाया २५ वडाय् च्वंगु जनबहाः देगः परिसर दुने फेब्रुअरी २१ तारिख आइतवाः केलत्वाःया नेपाःमिपिं पुचःया ग्वसालय् विश्व मातृभाषा दिवसया लसताय् ग्वसाः ग्वःगु नेपालभाषा साहित्य व म्ये ब्वज्या ज्याझ्वलय् किपूया नवोदित मचा म्येहालामि एरोन महर्जनं नं मेमेपिं नांजाःपिं म्येहालामिपिन्सं थें तुं थःगु मांभाय्या म्ये न्ह्यब्वःगु खः ।

किपूया हे संगीतकःमि भुवन महर्जनं च्वयादीगु व लसय् हनादीगु लिसें नांजाःम्ह संगीत संयोजक जीवित जल्मीं संगीत संयोजन यानादीगु ई शीर्षकया ...हायेकाः नइगु ई, म्हिताः नइगु ई...बोलया म्ये एरोन महर्जनं आकर्षक बांलाःगु सलं हालादीगु खः ।

भुवन महर्जनया हे च्वसाय् व लसय् एरोन महर्जनया मां शीर्षकया नेपालभाषाया म्ये रिकर्ड क्वचायेधुंकूगु दुसा याकनं हे म्यूजिक भिडियो निर्माणया नितिं पलाः न्ह्याकाच्वंगु दु ।

आः म्यूजिक भिडियोया रुपं पिदनेत्यंगु एरोनया मां शीर्षकया म्ये किपूया हे नांजाःम्ह संगीतकःमि श्याम नेपालीया काय् प्रिन्स नेपालीं संगीत संयोजन यानादीगु दुसा उगु म्येय् थीथी बाजात लोकंह्वाःगु फ्युजन ब्याण्ड कुटुम्ब ब्याण्डया दुजःपिन्सं थानादीगु दुसा किपूया हे नांजाःम्ह संगीतकःमि राजेश महर्जन नेवाः नं विशेष ग्वाहालि यानादीगु दु ।

१२ दँया एरोन महर्जन थौंकन्हय् आइडियल मोडल स्कूलय् खुगू तगिमय् ब्वनाच्वंगु दु । किपू नगरपालिका ९ वडा तःगःवपि बादेगां न्हूबजारया निवासी एरोनया छेँजः दुने थः बाज्या नं भजन क्षेत्रपाखेया संगीतकःमि खः ।

अथेहे, एरोनया मां राज्यलक्ष्मी व अबु जनक महर्जनया नुगः दुनेनिसेंया हे आज्जु धैगु थः काय् एरोनयात छम्ह कुशल बांलाःम्ह म्येहालामिया रुपं संगीत ख्यलय् स्थापित यायेगु खः धैगु भाव एरोनया मांअबुं पिज्वयेकाः दीगु दु ।

थौंकन्हय् एरोन महर्जनयात संगीतकःमि राजेश महर्जन नेवाः व भुवन महर्जनं सांगितिक यात्राय् ग्वाहालि यानाः वयाच्वनादीगु दु ।

Categorized in कला