prabhu baink new

किपूया इन्द्रायणी परिवार क्लबं हाकनं मीमकुमारयात हे नायः ल्यल

नेवा: अनलाइन न्युज – ललेन्द्र शाक्य | २०७७ आश्विन १८, आइतबार १३:४४:०४

नायः महर्जनं किपूया मचांनिसें युवावर्गपिन्त थीथी कासाया तालिम केन्द्र दयेकाः इन्द्रायणी परिवार क्लबं पलाः न्ह्याकेगु योजना दुगु जानकारी बियादिसें किपूपाखें थीथी कासाया राष्ट्रिय खेलाडी जन्मे यायेगु हे इन्द्रायणी परिवार क्लबया आज्जु खः, थ्व आज्जु पूवंकेगु नितिं क्लबया जः दुजःपिनिगु लिसेलिसें सकल किपू नगरया खेलप्रेमी जनसमुदायपिनिगु ग्वाहालिया आवश्यकता दूगु विचाः प्वंकादीगु दु ।

सुनां निष्पक्ष ढंगं समाजया हित व विकासया नितिं बांलाःगु ज्या याइ, उम्ह मनूयात समाजं हाकनं हाकनं लिसा कयाः उगु ज्याया नितिं उत्तराधिकारी कथं न्ह्यःने हइ... थ्व धापूया उदाहरणया रुपं इन्द्रायणी परिवार क्लबया साधारण सभाय् नायः पदया नितिं जूगु निर्वाचनय् हाकनं नायः पदय् त्याकेत ताःलाःम्ह नायः मीमकुमार महर्जनं स्पष्ट यानादीगु दु ।

बि.सं. २०३५ सालय् पलिस्था जूगु इन्द्रायणी परिवार क्लब किपूया २ वडा द्यःध्वाखा त्वालय् दु । उगु क्लबय् तःक्वःमछि हे द्यःध्वाखा त्वाःया मीमकुमार महर्जन नायः जुयादी धुंकल ।

२०७७ असोज १७ गते शनिवाः किपूया २ वडा माःक्वाचाय् क्लबया साधारण सभालिसें नायः पदया नितिं निर्वाचन जूगु खः । उगु निर्वाचनय् पुलांम्ह नायः मीमकुमार महर्जनयात हे बहुमतं हे हाकनं निर्वाचित यानाः नायः पदया भाला ब्यूगु खः ।

किपू लागाय् थौंकन्हय् सक्रिय क्लबत मध्ये २ वडा द्यःध्वाखा त्वाःया इन्द्रायणी परिवार क्लब नं न्ह्यःने लानाच्वंगु दु । विशेष रुपं उगु क्लबं खेलकुदयात प्राथमिकता बियाः खेलकुद ख्यःया विकास व खेलाडीपिन्त हःपाः बियाः न्ह्यःने वनाच्वंगु दु । उगु क्लबं निरन्तर रुपं दँय् दसं भलिबल कासा, ब्याडमिन्टन कासाया लिसेलिसें थीथी कासाया ग्वसाः ग्वयाः कासाका विकास व किपू व किपू लागां पिनेच्वंपिं खेलाडीपिन्त हःपाः बियाः वयाच्वंगु दु ।

इन्द्रायणी परिवार क्लबं कासा ख्यःया जक मखु थीथी इलय् आपालं सामाजिक जनचेतनामूलक लिसें सामाजिक हिउपाः व हितया ज्याझ्वःत नं न्ह्यब्वयाः वयाच्वंगु दु ।  

अथेहे, इन्द्रायणी परिवार क्लबं कासा ख्यःयात निरन्तरता बियावनेगु नितिं हल हे निर्माण यानाः वयाच्वंगु दु । उगु हलया मुक्कं निर्माण ज्या थुगु हे दँय् क्वचाइगु जानकारी क्लबं ब्यूगु दु ।

हाकनं निवार्चित जुयादीम्ह उगु क्लबया नायः मीमकुमार महर्जनं उगु हलया निर्माण ज्या क्वचायेधुंकाः सकल किपूमिपिनिगु नितिं कासा हब अर्थात् स्पोर्टस् हब दयेकेगु विचाः प्वंकादीगु दु ।

नायः महर्जनं किपूया मचांनिसें युवावर्गपिन्त थीथी कासाया तालिम केन्द्र दयेकाः इन्द्रायणी परिवार क्लबं पलाः न्ह्याकेगु योजना दुगु जानकारी बियादिसें किपूपाखें थीथी कासाया राष्ट्रिय खेलाडी जन्मे यायेगु हे इन्द्रायणी परिवार क्लबया आज्जु खः, थ्व आज्जु पूवंकेगु नितिं क्लबया जः दुजःपिनिगु लिसेलिसें सकल किपू नगरया खेलप्रेमी जनसमुदायपिनिगु ग्वाहालिया आवश्यकता दूगु विचाः प्वंकादीगु दु ।

वास्तवय् मीम कुमार महर्जन नायः जुयाः क्लबय् दुहाँ वयेधुंकाः निरन्तर रुपं थीथी कासा ख्यःया गतिविधि न्ह्यानाः वयाच्वंगु खः धासें आः किपू लागां राष्ट्रिय कासामि जन्मे यायेगु इन्द्रायणी परिवार क्लबया आज्जु नं अवश्यं पूवनी धकाः क्लबया दुजःपिन्सं जानकारी ब्यूगु दु ।

Categorized in कासा