Header Nepal rastra bank Adv

किपुली १३ क्वःगु सहिद स्मृतिकप ब्याडमिन्टन कासा न्ह्यात

नेवा: अनलाइन न्युज – ललेन्द्र शाक्य | २०७८ चैत्र २१, सोमबार १५:२८:०६

२०४६ सालया जनआन्दोलय् चैत्र २० गते किपुली शहादत प्राप्त याःपिं प्यम्ह सहिदपिं राजमान माली, राजेन्द्र महर्जन, हिराकाजी महर्जन व लनबहादुर महर्जनया लुमन्तिइ न्ह्यानाच्वंगु सहिद स्मृतिकप ब्याडमिन्टन कासा २०७८ थौंनिसें न्ह्याःगु दु ।

किपुली सहिद दिवसया लसताय् न्ह्याःगु थुगु कासा थौं चैत्र २१ गते सोमवाःनिसें चैत्र २६ गते शनिवाःतक न्ह्याइ ।

‘स्वस्थ, मित्रता व अनुशासनया नितिं खेलकुद’ नारा बियाः न्ह्याःगु थुगु कासा युवा खेलकुद समूहया ग्वसालय् न्ह्याःगु खःसा क्लबं किपू नगरपालिकाया सहकार्यस थुगु कासा न्ह्याकूगु खः ।

थौं सोमवाः उलेज्या जूगु उगु कासाया औपचारिक ज्याझ्वलय् पाहाँ कथं प्रा.डा. रामकृष्ण महर्जन झायादीगु खःसा वय्कलं कासाया उलेज्या यासें रेफ्रीयात ब्याड व कर्क लःल्हानादीगु खः ।

ज्याझ्वलय् कीर्तिपुर ब्याडमिन्टन क्लबया नायः दयाराम डंगोल, किपूया सहिद स्मृति व्यवस्थापन समितिया नायः सिद्धिकुमार मानन्धर, समाजसेवी मानवअधिकारकःमि शिक्षाविद् नन्दकुमारी महर्जन, नेपाल मजदुर किसान पार्टीया नेता हरिकुमार महर्जनलिसें थीथी व्यक्तिपिं पाहाँ कथं उपस्थित जुयादीगु खः ।

२५ गू टीमं ब्वति काःगु थुगु ब्याडमिन्टन कासा छगू जक इभेन्ट कथं ब्याडमिन्टन डबल कासा जक जुइगु जानकारी ग्वसाः खलः युवा खेलकुद समूह नं ब्यूगु दु ।

थुगु कासा येँ क्षेत्र ल्याः १० या कीर्तिपुर नगरपालिका, चन्द्रागिरी नगरपालिका व दक्षिणकाली नगरपालिकाया कासामिपिनिगु दथुइ खुल्ला धेंधेंबल्ला जुइगु जानकारी नं ग्वसाः खलकं ब्यूगु दु ।

कासा किपूया पांगाया जनसेवा स्कूलया ब्याडमिन्टन कोर्टय् न्ह्याःगु खः ।

Categorized in कासा