–ललेन्द्र शाक्य

सामुदायिक सेवा केन्द्र किपू, किपू नगरपालिका व महानगरीय प्रहरी वृत्त किपूया मंकाः ग्वसालय् ६१ क्वःगु प्रहरी दिवसया लसताय् किपू नगरय् तःजिक सुरक्षा सचेतना सप्ताह ज्याझ्वः क्वचाल ।

वंगु असोज १ गतेनिसें ७ गतेतक न्ह्याःगु उगु सप्ताह ज्याझ्वः वंगु शुक्रवाः असोज ७ गते सुथय् तःजिक सचेतना म्याराथुन ब्वा कासा (दौड) यासें न्हिनय् बृहत सांस्कृतिक ज्याझ्वःया लिसें क्वचायेकूगु खः ।

उगु सचेतना म्याराथुन दौडया मूपाहाँ नेपाःया राष्ट्रिय ब्वाकासामिलिसें दक्षिण एसियाली कासाय् स्वर्णपदक विजेता बैकुण्ठ मानन्धर मूपाहाँ कथं झायाः उगु सचेतना दौडया नेतृत्व वय्कलं हे यानादीगु खः ।

अथेहे असोज ७ गते शुक्रवाः हे न्हिनय् किपूया ३ वडाय् च्वंगु बसपार्कया बास्केटबल कोर्टय् बृहत्त सांस्कृतिक ज्याझ्वः यानाः समापन ज्याझ्वः जूगु खः ।

समापन ज्याझ्वलय् क्षेत्र ल्याः १० या सांसद राजनकुमार केसी झायादीगु खःसा मेम्ह मूपाहाँ कथं प्रहरी अतिरिक्त महानिरीक्षक महानगरीय प्रहरी ज्याकूया प्रतापसिंह थापा झायादीगु खः ।

ज्याझ्वलय् पाहाँ कथं किपू नगरपालिकाया कार्यकारिणी अधिकृत उद्धवप्रसाद रिजाल झायादीगु खःसा ज्याझ्वलय् सुभाय् न्वचू ग्वसाः खलः सामुदायिक सेवा केन्द्रया नायः रविन्द्रबहादुर प्रधानं बियादीगु खः ।

किपूया १ वडाय् च्वंगु बाघभैरव भजन मण्डलपाखें परम्परागत भजन व बाघभैरवया म्ये हालाः न्ह्याःगु उगु सांस्कृतिक ज्याझ्वलय् किपू नगर दुनेया थीथी स्कुलया कलाकार विद्यार्थीपिन्सं ब्वति काःगु उगु ज्याझ्वलय् किपूया थीथी नांजाःपिं कलाकारपिंलिसें न्हूप्रतिभा कलाकारपिन्सं सांगितिक ज्याझ्वः न्ह्यब्वयादीगु खः ।

समापन ज्याझ्वःया झ्वलय् असोज ७ गते सुथय् जूगु सचेतना म्याराथुन दौडय् सिरपाः त्याकेत ताःलाःपिं ब्वाकासामिपिन्त उगु सांस्कृतिक ज्याझ्वलय् सिरपाः नं लःल्हाःगु खः ।

ज्याझ्वलय् किपूया नांजाःम्ह सारंगीवादक हरिशरण नेपालीं सारंगीया धून न्ह्यब्वयादीगु खःसा किपूया नांजाःम्ह म्येहालामिलिसें ने.सं. ११३३ स पेजथ्री म्यूजिक अवार्डय् बेष्ट न्यूट्यालेन्ट सिंगर अवार्ड त्याकेत ताःलाःम्ह राजेश महर्जनलिसें न्हूप्रतिभापिन्सं सांगितिक ज्याझ्वः न्ह्यब्वःगु खःसा किपूया तेजिना महर्जनं कुमारी हुलाप्याखं न्ह्यब्वःगु खः ।

किपाः राजेन्द्र अधिकारी (acdigistudio)