nepal life 2076 3 18

किपुली सनस्टार क्लबं शुक्रवाः विशेष सम्मान व समेबजि ज्याझ्वः याइगु

नेवा: अनलाइन न्युज – ललेन्द्र शाक्य | २०७८ मङ्सिर ९, बिहिबार १०:१५:५६

किपूया १० वडा चिथु विहारय् च्वंगु सनस्टार क्लबं ने.सं. ११४२ कछलागा सप्तमी (मंसीर १० गते) शुक्रवाः बहनी ६ ता इलय् १० वडा भवनया क्लब न्ह्यःने चिथु गणेद्यः फल्चाय् विशेष सम्मान व समेबजि ग्रहण ज्याझ्वःया ग्वसाः ग्वःगु दु ।

वंगु शनिवाः किपूया २ वडा द्यःध्वाखाय् च्वंगु इन्द्रायणी परिवार क्लब व किपू नगरपालिका २ वडा ज्याकूया मंकाः ग्वसालय् जूगु किपू नगर स्तरीय भलिबल कासा २०७८ या फाइनल कासाय् कासामिपिन्सं उत्कृष्ट कासा प्रदर्शन यासें १० वडा न्हाप लायेत ताःलाःगु खः ।

उगु भलिबल कासाय् १० वडाया नितिं सनस्टार क्लबया दुजः कासामिपिं दुथ्याःगु खः । उगु भलिबल कासाय् न्हाप लाःगु लसताय् सनस्टार क्लबं भलिबल कासामि व कासा टोलीया दुजःपिन्त विशेष सम्मान व समेबजि ज्याझ्वःया ग्वसाः ग्वःगु खः ।

भलिबल कासाय् न्हाप लायेधुंकाः उगु कासाया माध्यमं सनस्टार क्लब लिसेलिसें सकल १० वडा लागायात गौरव व लसता जूगुलिं फुक्क कासामि व  कासा टोलीया दुजःपिन्त  विशेष सम्मान व समेबजि ज्याझ्वःया ग्वसाः ग्वयागु जानकारी सनस्टार क्लबया नायः हिराकाजी महर्जनं जानकारी बियादीगु दु । वय्कलं उगु ज्याझ्वलय् कासा टोलीयात बधाई व हःपाः बियादीगु नितिं सकल वडाबासीपिन्त उपस्थितिया नितिं इनाप यानादीगु दु ।

सनस्टार क्लब कासा ख्यलय् जक उत्कृष्ट क्लब मखुसे सांस्कृतिक सम्पदा, संगीत, तजिलजि म्वाकातयेगु ज्याय् नं अतिकं सक्रिय जुयाः वयाच्वंगु ल्यायम्ह जः दुजःपिं दुथ्याःगु क्लब खः ।

अथेहे, दँय् दसं नेपाल संवत न्हूदँया लसताय् जुइगु मन्दः च्वज्या कासाय् नं मदिक्क न्हाप लानाः वयाच्वंगु क्लब खःसा थुगु दँ ११४२ न्हूदँया लसताय् जूगु मन्दः च्वज्या कासाय् नं किपू नगरपालिका १० वडा चिथु बिहारया सनस्टार क्लब हे न्हाप लाःगु खः ।

Categorized in स्थानिय-समाज