ad prabhu

किपुली राहत सुचुकातःम्ह थापाया समर्थन याःम्ह विद्यार्थीयात दाल

नेवा: अनलाइन न्युज – ललेन्द्र शाक्य | २०७७ बैशाख १३, शनिबार १५:५६:३४

किपुली थौं चैत्र १३ गते शनिवाः छुं दिं न्ह्यः किपूया भाजंगः वनेगु लँपुइ राहतया खाद्यान्न हलंज्वलं थःगु कोथाय् तयातःम्ह हेमराज थापाया समर्थन याःम्ह विद्यार्थीयात अज्ञात पुचलं दाःगु दु ।

ल्हाः नःम्ह किपुली च्वंगु त्रिभुवन विश्वविद्यालयया विद्यार्थी ललितजंग रावत जूगु व समाजवादी विद्यार्थी युनियनया दुजः जूगु खँ सीदूगु दु । राहत सुचुकातःम्ह हेमराज थापा नं समाजवादी विद्यार्थी युनियनया दुजः खः ।

छुं दिं न्ह्यः राहत वितरणया विषयस जूगु विवाद लिपा ल्हाः नःम्ह ललितजंग रावतलिसें विद्यार्थीपिं राहत सुचुकातःम्ह हेम थापाया सुरक्षाया माग यासें महानगरीय प्रहरी वृत्त किपुली थ्यंकूगु समाजवादी विद्यार्थी युनियनया नायः रुपनारायण श्रेष्ठं जानकारी ब्यूगु दुसा प्रहरी परिसरं लिहाँ वयाच्वंगु झ्वलय् रावतयात थौं शनिवाः सुथय् अज्ञात पुचलं दाःगु खँ नं युनियनया नायः श्रेष्ठं धाःगु दु ।

किपू प्रहरीया डिएसपी छेदिलाल कामतीं लकडाउन उल्लंघन यासें सुंसुं मनूत सतकय् पिहाँ वःगु व थःथवय् ल्वापु जूगु खँया जानकारी ब्यूगु दु । डिएसपी कामतीं धाःगु दु, “स्थानीय बासिन्दां ल्वापु जूगु खबर बिइखतं जिपिं घटनास्थल थ्यंकागु खःसा जिपिं थ्यंबलय् अन सुं नं मदुगु खः ।”

किपुली स्थानीय सरकार नगरपालिका दुसां नं हेम थापा नांया छम्ह विद्यार्थीं थः यत्थें स्थानीय सरकारयात जानकारी हे मब्यूसे ग्वाहालि वःगु राहत थःगु कोथाय् सुचुकातःगु सुराकीया आधारय् किपूया प्रहरी व स्थानीयपिं जानाः छुं दिं न्ह्यः राहत खाद्यान्न हलंज्वलं बरामद याःगु खः ।

Categorized in दुर्घटना-अपराध