nepal life 2076 3 18

किपुली बुंगद्यःया ल्यासे करुणामय देगः निर्माणया नितिं क्षमापूजा

नेवा: अनलाइन न्युज – ललेन्द्र शाक्य | २०७८ मङ्सिर ९, बिहिबार १२:१४:५२

किपू नगरपालिका २ वडाय् लाःगु प्यंगःथां गःछेँ त्वाःया सुखी गःछेँ समाज किपूया ग्वसालय् बुंगद्यः (रातो मच्छिन्द्रनाथ) या ल्यासे कथं कयातःगु करुणामय देगःया क्षमापूजा ज्याझ्वः ने.सं. ११४२ कछलागा पंचमी (मंसीर ८ गते) बुधवाः याःगु दु ।

उगु क्षमापूजाय् गुरुजु सुरेश बज्राचार्यं पूजा न्ह्याकादीगु खःसा मूपाहाँ कथं झायादीम्ह किपू नगरपालिकाया मेयर रमेश महर्जन व विशेष पाहाँ कथं झायादीम्ह किपू नगरपालिकाया उपमेयर लिसें प्रवक्ता सरस्वती रिजाल खड्का पूजाय् च्वनादीगु खः । अथेहे, ज्याझ्वलय् किपू नगरपालिका १ वडाया वडाध्यक्ष हर्ष महर्जन पाहाँ कथं उपस्थित जुयादीगु खः ।

किपू नगरपालिका २ वडा गःछेँ प्यंगःथांया उगु करुणामयया ल्यासेया देगः निर्माणया नितिं रातो मच्छिन्द्रनाथ अधुरो मन्दिर निर्माण कथं योजनाया नां छुनातःगु दु ।

अथेहे, आयोजना संचालन यायेगु ज्याकू व ज्याझ्वः कीर्तिपुर नगरपालिका, सुखी गःछेँ समाज किपू व उ.सं.या नायःया नां रामकुमारी महर्जन जुयादीगु दु ।

देगः निर्माणया कुल लागत २०,५७,२८३.६८ तका दां क्वःछिनातःगु दुसा आयोजना ज्याकूपाखें ब्यहोरे याइगु लागत रकम १४,४०,००० तका दां जनसहभागितापाखें ब्यहोरे याइगु लागत रकम ६,१७,२८३.६८ तका दां क्वःछिनातःगु दु ।

अथेहे, आयोजना सम्झौता २०७८ कार्तिक २२ गते जूगु खःसा आयोजना क्वचायेकेगु तिथि २०७८ माघ ३० गते क्वछिनातःगु दु ।

क्षमापूजा ज्याझ्वलय् किपू नगरपालिकाया मेयर रमेश महर्जनं बुंगद्यःया ल्यासे करुणामय देगः निर्माणया झ्वलय् सुयात नं बाधा अडचन पंगः मजुइमा धैगु ताःतुनाः पूजाविधि कथं ज्याभः छ्यलाः देगः निर्माणया ज्या न्ह्याकादीगु खः ।

वय्कः मेयर रमेश महर्जनं किपूया २ वडाया गःछेँया प्यंगःथां धार्मिक रुपं अतिकं महत्वं जाःगु धार्मिकस्थल जूगुलिं व बुंगद्यःनाप स्वानाच्वंगु थाय् जूगुलिं धार्मिक ऐतिहास कुबियाच्वंगु देगः जूगु खँ तयादिसें देगः निर्माणया नितिं किपू नगरपालिकां माक्व व फक्व ग्वाहालि यायेगु बचं बियादिल ।

अथेहे, उपमेयर सरस्वती रिजाल खड्कां बुंगद्यःया जात्रालिसे सम्बन्धित थाय् व देगः जूगुलिं व देगः निर्माण यानाः संरक्षण यायेत्यंगुलि लसता पिज्वयेकादीगु दुसा उगु प्यंगःथांया करुणामय द्यःया ल्यासेया देगः किपू नगरया नितिं छगू ऐतिहासिक सम्पदा जूगु विचाः प्वंकादिलसा वय्कलं नं उगु देगः निर्माणया नितिं किपू नगरपालिका सकारात्मक रुपं न्ह्यज्यनाः ग्वाहालि यायेगु बचं बियादिल ।

थ्वहे झ्वलय् देगः निर्माणय् न्ह्यचिलाच्वंगु सुखी गःछेँ समाज किपूया छ्याञ्जे नारायण महर्जनं किपूया गौरव कथं धस्वानाच्वंगु प्यंगःथांया करुणामय द्यःया ल्यासेया देगः कलात्मक कथं निर्माण यानाः संरक्षित यायेगु खँ कनादिसें त्वाःबाःलिसें सकलसिगु ग्वाहालिं देगः निर्माण यायेगु खँ कनादिल ।

सुखी गःछेँ समाज किपूया नायः महिला अधिकारकःमि नेतृ रामकुमारी महर्जनं थः मिसा अधिकारकःमिया न्ह्यलुवाः जूगु हुनिं करुणामय व उगु ईया छम्ह मिसालिसे स्वापू दूगु प्यंगःथांया धार्मिक व ऐतिहासिक द्यःकथं कयातःगु थासय् देगः निर्माण यायेगु पलाः न्ह्याकेखंगु धयागु छगू अधिकार प्राप्त जूगुथें ताःगु विचाः प्वंकादिल । वय्कलं स्थानीय सरकार किपू नगरपालिकालिसें त्वाःबाःया जनसमुदायपिनिगु ग्वाहालिं देगः निर्माणया ज्याझ्वः न्ह्याःगु खँ नं कनादिल ।

अथेहे, उगु सुखी गःछेँ समाज किपूया दांभरी फिरोज महर्जनं करुणामय द्यःया ल्यासेया देगः कलात्मक शैलीं निर्माण यानाः उगु देगः परिसरयात धार्मिक, सांस्कृतिक व पर्यटकीय लागाया रुपं विकास यायेगु योजना दूगु खँ कनादिल । थथे धार्मिक, सांस्कृतिक व पर्यटकीय लागाया रुपं विकास यायेत किपू नगरपालिकालिसें किपूया सकल समुदायया ग्वाहालि मदयेकं मगाःगु विचाः दांभरी फिरोज महर्जनं कनादिल ।

किपूया २ वडाया गःछेँ प्यंगःथामय् करुणामय द्यःया ल्यासेया प्रतिक कथं छगः ल्वहँ दु । उकियात स्थानीय बासिन्दापिन्सं ‘याकः मिसा’ नं धायेगु याः । बुंगद्यः करुणामय (रातो मच्छिन्द्रनाथ) द्यःया जात्राया झ्वलय् दकले न्हापां जात्रा यायेगु प्यन्हु न्ह्यः उगु करुणामय द्यःया ल्यासेया प्रतिक कथं कयातःगु ल्वहँतय् बुंगद्यःया पांजुपिं बिज्यानाः लःस्वां छायेमाःगु चलन आःतकं न्ह्यानाः वयाच्वंगु दुसा थथे करुणामय द्यःया ल्यासेया ल्वहँतय् लःस्वां छायेधुंकाः किपूबासीपिनिगुपाखें लःकी कयाः यलया पूच्वय् रथय् विराजमान जुयाच्वंम्ह करुणामय द्यःयात छायेमाःगु चलन व परम्परा थौंतक नं ल्यनाच्वंगु दनि । थ्व ल्याखं धायेबलय्, किपूया प्यंगः थामय् करुणामय द्यःया ल्यासेयात लःस्वां मछायेकं बुंगद्यःया रथजात्रा न्ह्याइमखु धैगु जनधारणा दु ।

थुज्वःगु धार्मिक, सांस्कृतिक व ऐतिहासिक महत्वं जाःगु धार्मिकस्थल आःतकं नं पर्यटकीय लागाया रुपं म्हसीका बिइमफूगु छाय् धैगु विषयस छगू न्ह्यसःचिं ब्वलनाच्वंगु दु । आः स्थानीय सरकार किपू नगरपालिकां किपूया उगु लागायात धार्मिक, सांस्कृतिक लिसें ऐतिहासिक महत्वयात उजागर यानाः छगू धिसिलाःगु पर्यटकीय लागाया रुपं विकास यायेफत धाःसा किपू नगर व किपूया जनताया नितिं गौरव व गर्वया विषय जुइगुलि निगू मत मदु ।

Categorized in स्थानिय-समाज