ad prabhu

किपुली न्हूदँ पाःब्व : थांबहाः दाफा खलकं इछेँ ह्वाकुचां दाफा खलःयात लःल्हात

नेवा: अनलाइन न्युज – ललेन्द्र शाक्य | २०७७ मङ्सिर ३, बुधबार १४:२८:०३

कोरोना महामारी संक्रमणया हुनिं किपुली नं थुगुसीया न्हूदँ ११४१ या भिंतुना जुलुस स्थगित जुल ।

किपू लागाय् प्रत्येक त्वाःया दाफा खलःया संयोजनय् न्हूदँ भिंतुना जुलुस व सभा न्ह्यानाः वयाच्वंगु खः । थ्वहे झ्वलय् थुगुसीया ने.सं. ११४१ या न्हूदँया ग्वसाः ग्वयेगु पाः किपू नगरपालिका १ वडा थांबहाः त्वाःया थांबहाः दाफा खलःया पाः लाःगु खः । तर कोरोना संक्रमणया हुनिं थांबहाः दाफा खलकं भिंतुना जुलुस व सभा याये मखन । तर, मेगु दँया नितिं थांबहाः दाफा खलकं न्हूदँया दिं किपू नगरपालिका १ वडाया बाघभैरव लागाय् लाःगु इछेँ त्वाः व ह्वाकुँचा त्वाःया इछेँ ह्वाकुँचा दाफा खलःयात पाःब्वः लःल्हाःगु दु ।

कोरोना संक्रमणयात ध्यानय् तया ने.सं. ११४१ कछलाथ्व पारुया दिं थौंबहाः दाफा खलःया सीमित जक मनूत वनाः किपू नगरपालिका ज्याकुथिइ नेपाल संवतया प्रवर्तक शंखधर साख्वाःया मूर्ति काः वंगु खःसा उगु मूर्तियात बाघभैरव लागाः परिक्रमा याकाः थांबहाः त्वालय् यंकूगु खःसा वधुंकाः इछेँ ह्वाकुँचा दाफा खलःया नं सीमित मनूत जक थांबहाः त्वालय् वनाः मेगु दँया न्हूदँ न्यायेकेगु नितिं पाःब्व लःल्हाना काःगु खः ।

थुगुसीया किपूया न्हूदँ ग्वसाः खलः थांबहाः दाफा खलकं न्हूदँया छन्हु न्ह्यः लक्ष्मीपूजा दिंकुन्हु न्हूदँ इभ कथं बःचाधंगु सांस्कृतिक ज्याझ्वः याःगु खः ।

थःगु त्वाःबाःया जःपिं जक मुनाः याःगु इभ ज्याझ्वलय् मन्दः च्वयेगु ज्याझ्वः नं जूगु खः ।

न्हूदँ इभ ज्याझ्लय् थांबहाः त्वाःया कलाकारपिन्सं थीथी नेवाः म्येया हुलाप्याखं न्ह्यब्वःगु खःसा थांबहाः त्वाःया नांजाःम्ह संगीतकःमि राजेन्द्र महर्जनलिसें वय्कःया काय् व काय्चापिन्सं सांगितिक ब्वज्या याःगु खः । ज्याझ्वलय् अतिथि कलाकारया रुपं नांजाःम्ह सारंगीबादक हरिशरण नेपाली झायादीगु खः ।

 

बःचाधंगु न्हूदँ इभ ज्याझ्वलय् किपू नगरपालिकाया मेयर लिसें थांबहाः त्वाःया हे रमेश महर्जनं भिंतुना न्वचू बियादीगु खःसा थांबहाः त्वाःया हे विश्व सरसफाई अभियानया अभियन्ता लिसें सुन्दर कीर्तिपुरया न्ह्यलुवाः राजमान मानवं सुन्दर कीर्तिपुरया विषयस लिसें किपूया त्वाःबाः विकासया विषयस न्वचू बियादीगु खः ।

ज्याझ्वः थांबहाः त्वाःया हे राजु श्रेष्ठं न्ह्याकादीगु खः ।

Categorized in स्थानिय-समाज