नेवा: अनलाइन न्युज – ललेन्द्र शाक्य | २०७९ माघ २२, आइतबार १२:३८:११

किपूया गःछेँ प्यंगःथां धैगु थासय् पलिस्था याःगु बुंगद्यःया मूर्ति चिइकेगु नितिं पुरातत्व विभागं पौ छ्वयाहयेवं बुंगद्यः सम्बन्धी थ्व विवाद अझ हे तच्वः जुयावनीगु संकेत खनेदयावःगु दु ।

पुरातत्व विभागं येँ महानगरपालिकाया सम्पदा व पर्यटन विभागयात पौ च्वयाः किपुली पलिस्था याःगु बुंगद्यःया उगु मूर्ति धार्मिक व सामाजिक सदभाव स्यनीगु खनेदयाः वःगुलिं उगु मूर्ति चिइकेगु ज्या यायेमाली धकाः इनाप यानाहःगु खः ।

येँ महानगरपालिकाया सम्पदा विभागं थःत पुरातत्व विभागपाखें अज्याःगु पौ वयाच्वंगु दु धकाः किपूया द्यः पलिस्था याःपिन्त जानकारी यायेधुंकूगु दु । किपुली बुंगद्यः व याकः मिसाया मूर्ति पलिस्था यायेगु ज्या स्थानीय गःछेँ प्यंगःथां त्वाःया सुखी समाजया पहलय् जूगु खः ।

पुरातत्व विभाागं भूर्मि लिकाये माली धकाः अज्याःगु पौ छ्वयाहःगु खँय् किपूया सुखी समाज धाःसा दुःखी जूगु दु । समाजया छ्याञ्जे नारायण महर्जनं यदि किपुली मूर्ति तःगु खँय् सामाजिक सदभाव स्यनीगु खःसा मूर्ति लिकात धाःसां नं सदभाव स्यनेफइगु खँ कनादीगु दु ।

मूर्ति तःगु खँय् तम्वःपिं बुंगया पानेजुपिन्सं आवंलि किपुली स्वां हे तःवये मखु धकाः ख्याच्वः ब्यूथें किपूया याकः मिसां नं आवंलि पानेजुपिन्सं बिइहःगु स्वां लःल्हानाः कायेमखु धाल धाःसा छु जुइ धकाः नं महर्जनं न्ह्यसः थनादीगु दु ।

सुखी समाजया छ्याञ्जे नारायण महर्जनं धयादी, ‘किपुली बुंगद्यःया मूर्ति तयातल धाःसा पानेजुपिन्सं किपुली स्वां हे तःवयेमखु धयादिल । आः बुंगद्यःया मूर्ति लिकयाः यंकल धाःसा किपूया याकः मिसां नं पानेजुपिनि ल्हाःतिं स्वां लःल्हानाः कायेमखु धायेफु । व थथे धाल धाःसा थुकिं परम्परा ला स्यनीगु हे जुल ।’

महर्जनं न्ह्यसः तयादी, ‘उलिमछि मनूतसें जात्रा यानाः पलिस्था याःम्ह बुंगद्यःयात अनं चिइकेमाल धाःसा किपूमित ला तसकं हे खिन्न जुइमाली । किपूमित अथे खिन्न जुइकाः किपूया याकः मिसां जक गथे स्वां लःल्हानाः कायेफइ ?’

थज्याःगु अवस्थाय् थःपिन्सं द्यः छता लितयंकेगु खँ धयादी मते, मेगु न्ह्याग्गु याःसां नं जिउ धकाः प्रस्ताव तयागु खँ नं छ्याञ्जे महर्जनं कनादिल ।

बुंगया ३२ पानेजु खलःपाखें धाःसा किपुली बुंगद्यःया मूर्ति पलिस्था याःबलय् जात्रा सम्बन्धी परम्परा हे स्यनीगु जूगुलिं थ्व मूर्ति लिकायेमाःगु माग यानाः वयाच्वंगु दु ।

किपूया याकः मिसायात बुंगद्यःया मतिनामि माने यासें दँय् दसं लगंख्यलं जावला ख्यलय् रथ सालीकुन्हु पानेजुपिं किपूया गःछेँ प्यंगः थामय् वयाः बुंगद्यःया स्वां लःल्हायेगु परम्परा दु । किपुली याकः मिसा जीवित हे दयेक दयेकं वयागु मूर्ति तःगु खँय् नं पानेजुपिन्सं आपत्ति प्वंकूगु दु ।

थ्व सम्बन्धी सचेत नागरिकपिन्सं वास्तवय् याकः मिसा बुंगद्यःया ल्यासे या मतिनामि मखु धकाः नं धयाहःगु दु । बुगद्यः छम्ह करुणाया द्यः खः, उकिं उगु इलय् किपूया गःछेँ प्यंगःथां त्वाःया छम्ह मिसा दुःखी जुयाच्वंगु इलय् बुगद्यवं उम्ह मिसायात करुणा तया उद्धार याःगु खः । थौंकन्हय् तक नं सुं नं याकःचा च्वनाच्वंम्ह मिसायात समाजं कुदृष्टिं स्वयेगु चलन दनि । उगु इलय् नं समाजं उम्ह याकः मिसायात कुदृष्टिं स्वयाः नुगः ख्वयेकाच्वंगु इलय् बुंगद्यवं उद्धार याःगु खः । करुणा तःगु खः । तर, उगु करुणायात मतिनाया दाग लाकाः बुंगद्यःया मतिनामि धकाः बय् बय् याःगु व थौंतक नं याकः मिसा बुंगद्यःया मतिनामि धकाः धयाः हयाच्वंगु खः धकाः धाःगु दु ।

मेखे, किपुली पलिस्था यायेधुंकूगु बुंगद्यःया मूर्ति लितबिइमखु धासें सुखी समाजपाखें किपुली ल्हाःचिं मुंकेगु अभियान नं न्ह्याकूगु दु ।

नेपालभाषा टाइम्स न्हिपौ

Categorized in पत्रपत्रिका