kmc bidya

किपुली आरडिटी टेष्ट पोजेटिभ जूपिं थौंया टेष्टय् नेगेटिभ, किपूबासीया ग्याःचिकु तन !

नेवा: अनलाइन न्युज – ललेन्द्र शाक्य | २०७७ जेठ ९, शुक्रबार १९:२०:५४

किपू नगरपालिकाया मेयर रमेश महर्जनं आरडिटी परीक्षणय् पोजेटिभ पिहाँ वःसां पीसीआर परीक्षणय् नं नेगेटिभ हे पिहाँ वःगुलिं किपू नगरपालिका कोरोना भाइरस संक्रमणपाखें मुक्त जूगु विचाः प्वंकूसें सकल जनसमुदाययात सचेत व सतर्क जुयाः लकडाउनयात पूर्ण रुपं पालना यानाः कोरोना संक्रमण रोकथामया नितिं थःथवय् छप्पं जुयाः ग्वाहालि यायेत इनाप

थौं शुक्रवाः नं किपू नगरपालिकां कर्मचारी, थीथी स्वास्थ्य संस्थाया प्रतिनिधिलिसें थीथी संचार ख्यःया संचारकःमिपिनिगु कोरोना परीक्षण याःगु दु ।

किपू नगरपालिकां दयेकातःगु किपू नगरपालिका १० वडा दुने त्रिभुवन विश्वविद्यालयया न्हूगु भवनय् दयेकातःगु क्वारेन्टाइन परिसरय् कोरोना परीक्षण याःगु खः ।

थौं ३३ म्हेस्यां उगु कोरोना परीक्षण याःगु खःसा जेष्ठ ५ गते याःगु परीक्षणय् आरडिटी रिपोर्टय् पोजेटिभ पिहाँ वयाः क्वारेन्टाइनय् च्वनाच्वंपिं फोहोर मैला व्यवस्थापनया क्लीन नेपालया प्यम्ह कर्मचारीपिनिगु नं हाकनं आरडिटी परीक्षण याःगु खः । थ्व ल्याखं थौं शुक्रवाः ३७ म्हेसिगु आरिडिटी परीक्षण जूगु खः । उगु परीक्षणय् ३३ म्हेसिगु आरडिटी रिपोर्ट नेगेटिभ पिहाँ वःगु खःसा क्वारेन्टाइनय् च्वनाच्वंपिं फोहरमैला व्यवस्थापनया प्यम्ह कर्मचारीपिनिगु नं आरिडिटी रिपोर्ट नेगेटिभ पिहाँ वःगु खः ।

जेष्ठ ५ गतेनिसें क्वारेन्टाइनय् च्वनाच्वंपिं उपिं प्यम्ह कमचारीपिनिगु हाकनं आरडिटी परीक्षण याःबलय् नेगेटिभ रिपोर्ट पिहाँ वयेधुंकाः आः इमित छेँय् छ्वयेगु कि अन क्वारेन्टाइनय् हे तयेगु धैगु विषयस नगरपालिकाया उच्च पदाधिकारीलिसे सहलह ब्याकेधुंकाः जक छु यायेगु धैगु निर्णय जुइ धकाः किपू नगरपालिका १० वडाया वडाध्यक्ष अमन महर्जनं जानकारी बियादीगु दु ।
वडाध्यक्ष महर्जनं संचारमाध्यमयात थुगु विषयस जानकारी बिसें धयादी, “जेष्ठ ५ गतेया आरडिटी रिपोर्ट पोजेटिभ वयेधुंकाः उपिं प्यम्ह फोहरमैलाया कर्मचारीपिन्त पीसीआर पद्धतिपाखें स्वाब मुंकाः परीक्षणया नितिं टेकु अस्पतालया प्रयोगशालाय् रिपोर्टया नितिं छ्वयातयागु दु । टेकु अस्पतालपाखें पीसीआर रिपोर्ट मवःतले छु यायेगु धैगु विषयस नगरपालिकाया सम्बन्धित पदाधिकारीलिसे सहलह ब्याकाः जक क्वारेन्टाइनय् च्वनाच्वंपिं प्यम्हेसित छु यायेगु धैगु खँ क्वःछीगु जुइ ।”

अथेहे, किपू नगरपालिकाया स्वास्थ्य विभागया प्रमुख सन्तमान मानन्धरं जेष्ठ ५ गतेया पीसीआर रिपोर्ट थौं नं मवःगु जानकारी बिसें धयादी, “किपू नगरपालिकाया प्यम्ह फोहर मैला व्यवस्थापनया कर्मचारीपिनिगु पीसीआर रिपोर्ट सार्वजनिकया नितिं कुतः यानाच्वनागु दु । टेकु अस्पतालया प्रयोगशालाय् पीसीआर परीक्षण देय् न्यंकंया आपालं दूगुलिं किपू नगरपालिकाया रिपोर्ट वइगु आइतवाःया दुने वइगु जानकारी अस्पतालं जानकारी ब्यूगु दु । आशा दु, वइगु आइतवाः दुने किपू नगरपालिकाया उपिं प्यम्हेसिगु पीसीआर रिपोर्ट सार्वजनिक जुइ धैगुलि आशावादी जुयागु दु ।”

अथेहे, जेष्ठ ६ गतेया परीक्षणय् किपू नगरपालिकाया जनप्रतिनिधिलिसें कर्मचारीपिनिगु कोरोना परीक्षणय् प्यम्ह जनप्रतिनिधिलिसें छम्ह कर्मचारी यानाः न्याम्हेसिगु आरडिटी रिपोर्ट नं पोजेटिभ पिहाँ वःगु खःसा उगु रिपोर्ट नं टेकु अस्पतालया प्रयोगशालाय् ‘क्यू’ दुने हे लानाच्वंगु दु ।

तर जेष्ठ ७ गते मध्यपुर थिमि नगरपालिका दुने लाःगु नेपाल कोरियन मैत्री अस्पतालपाखें किपू नगरपालिका भवनय् वयाः किपू नगरपालिकाया जनप्रतिनिधि व कर्मचारीपिनिगु स्वाब टेष्ट पीसीआर परीक्षण याःगु खःसा उगु परीक्षणय् जेष्ठ ६ गते आरडिटी परीक्षणय् पोजेटिभ पिहाँ वयाः पीसीआर परीक्षण टेकु अस्पतालया प्रयोगशालाय् छ्वःपिं प्यम्ह जनप्रतिनिधि व छम्ह कर्मचारींं नं हाकनं पीसीआर परीक्षण याःगु खः । नेपाल कोरियन मैत्री अस्पतालं उगु पीसीआर रिपोर्ट जेष्ठ ८ गते हे सार्वजनिक याःगु खः । उगु रिपोर्ट कथं किपू नगरपालिकाया प्यम्ह जनप्रतिधि व छम्ह कर्मचारीया पीसीआर रिपोर्ट नेगेटिभ पिहाँ वःगु सार्वजनिक याःगु खः । थथे जनप्रतिनिधि व कर्मचारीपिनिगु पीसीआर रिपोर्ट नेगेटिभ पिहाँ वयेधुंकाः किपूया बासिन्दां लसताया सासः नं ल्हाःगु दु ।

टेकु अस्पतालपाखें पीसीआर रिपोर्ट आःतक पिहाँ मवःसां नं थौं हाकनं क्वारेन्टाइनय् च्वनाच्वंपिं प्यम्ह फोहरमैलाया कर्मचारीपिनिगु हाकनं याःगु आरडिटी रिपोर्ट नेगेटिभ पिहाँ वयेधुंकाः किपू नगर दुने कोरोना संक्रमणया ग्याःचिकु छुं भच्चा शान्त जूगु दु । टेकु अस्पतालपाखें सार्वजनिक जुइगु पीसीआर रिपोर्ट आइतवाःतक धैर्य यानाः पीमालीगु जानकारी किपू नगरपालिकाया स्वास्थ्य विभाग प्रमुख शान्तमान मानन्धरं जानकारी बियादीगु दु ।

अथेहे, मध्यपुर थिमिया नेपाल कोरियन मैत्री अस्पतालपाखें प्यम्ह जनप्रतिनिधि व छम्ह कर्मचारीया पीसीआर रिपोर्ट नेगेटिभ पिहाँ वःगु जानकारी सार्वजनिक याःसां आधिकारिक प्रमाणित भ्वँ मवःनिगुलिं उपिं जनप्रतिनिधि व कर्मचारी किपूया ९ वडा छुंगामय् दयेकातःगु राराहिल स्कूलया क्वारेन्टाइनय् हे च्वनाः च्वनादीगु जानकारी किपू नगरपालिकां जानकारी ब्यूगु दु ।

किपू नगरपालिकाया मेयर रमेश महर्जनं आरडिटी परीक्षणय् पोजेटिभ पिहाँ वःसां पीसीआर परीक्षणय् नं नेगेटिभ हे पिहाँ वःगुलिं किपू नगरपालिका कोरोना भाइरस संक्रमणपाखें मुक्त जूगु विचाः प्वंकूसें सकल जनसमुदाययात सचेत व सतर्क जुयाः लकडाउनयात पूर्ण रुपं पालना यानाः कोरोना संक्रमण रोकथामया नितिं थःथवय् छप्पं जुयाः ग्वाहालि यायेत इनाप यानादीगु दु ।

Categorized in राष्ट्रिय