nepal investment baink

किपुलिइ रञ्जना लिपिं साईनबोर्ड तःपिं ८० म्हेसित हन, बरिष्ठ संगीतकार तिर्थ मालीयात नं हन

नेवा: अनलाइन न्युज – ललेन्द्र शाक्य | ने.सं. ११४४ सिल्लागा अस्तमि (२०८० फागुन २० गते)

देय् न्यंकंया नेवाः समुदायया मंकाः राष्ट्रिय संगठन नेवाः देय् दबू किपू नगर समितिया निक्वःगु बुसादँया लसताय् किपू नगर दुने रञ्जना लिपि छ्यलाः साइनबोर्ड तयातःगु सरकारी ज्याकू, संघ संस्था, खलः पुचः, पसःनिसें स्कूल, कलेज अले रञ्जना लिपि हे छ्यला छेँया नां तयातःपिं, रञ्जना लिपि छ्यलाः पत्रिका पिथनाच्वंगु व सार्वजनिक सवारीसाधनय् तकं रञ्जना लिपि छ्यलाच्वंपिं यानाः मुक्कं ८० गू संस्था व मनूतय्त हंगु दु ।

शनिवाः नेवाः देय् दबू किपू नगर समितिया नायो बुद्धिलाल ज्यापुया नायोसुइ नेवाः देय् दबू स्वनिगः विशेष प्रदेशया नायो श्रीकृष्ण महर्जनया मूपाहाँसुइ हनेज्या जूगु खः ।

किपू भाजंगःया भैलः द्यःया देगःयात कालु पाण्डेया स्तूप धकाः गलत कथं प्रचार यानातःगु अवस्थाय् उगु गलत प्रचारयात खण्डन यायेगु सन्देश बिइत वहे भैलःद्यः दुगु थासय् मुना नेवाः ध्वाँय् ब्वयेकाः ¥याली याना अजूचाइपुगु दिप कथं नालातःगु भाजंगःया दिप दुगु विष्णुदेवी देगः लनगाय् थ्यंकाः समारोह जूगु खः । भाजंगःया उगु दिप दुगु लागाया सांस्कृतिक भूमि संरक्षणया नितिं नेवाः समुदाय आन्दोलित जुयाच्वंगु अवस्थाय् थःपिनिगु नं एक्यबद्धता दु धकाः सन्देश बिइगु कथं अनहे नेवाः देय् दबूपाखें ज्याझ्वः याःगु खः ।

ज्याझ्वलय् मूपाहाँ नेवाः देय् दबू स्वनिगः विशेष प्रदेश समितिया नायो श्रीकृष्ण महर्जनं नेवाः देय् दबू किपू नगर समितिं सकल नेवाःतय्त सन्देश बिइगु कथं ज्याझ्वः यानाः वयाच्वंगु दु धयादिसें विगतय् बागमती प्रदेशय् नेपालभाषायात सरकारी कामकाजी भाषाया रुपय् लागू याकेगु नितिं सतकय् तकं क्वाहां वःगु लिसें थीथी गतिविधि यानाच्वंगु च्वछाय् बहःजू धयादिल ।

अथे हे विशेष पाहाँ नेवाः देय् दबू स्वनिगः विशेष प्रदेशया सचिवालय् दुजः अधिवक्ता नरेश श्रेष्ठं नेवाःतसें सामुहिक अधिकारया नितिं न्ह्याःवनेमाःगु खँय् बः बियादल । अथेहे भाजंगःया दिप व पीगं संरक्षणया नितिं जनस्तरं नीस्वंगु समितिया नायो श्रीकृष्ण महर्जनं लँ दयेकेगु नामय् संकत वइगु संभावना दुगु भाजंगःया दिप व पीगं संरक्षणया नितिं माःगु कथं पहल यायेत न्ह्याःवनाच्वनागु दु धकाः धयादिल ।

अथेहे पाहाँपिं नेवाः देय् दबू येँ जिल्लाया छ्याञ्जे धनवीर महर्जन, ज्यापु महागुथि किपू नगर समितिया नायो रामभोला महर्जनपिन्सं नेवाः देय् दबूया ज्याया बारे खँ कनादीगु खः । ज्याझ्वलय् सच्छिपुं मल्याक नेवाः म्येय् नापं नेवाः राष्ट्रिय म्येय् लय् तयादीम्ह तीर्थ मालीयात दोसल्लां न्ययेकाः नापं हनापौ लःल्हाना हनेज्या याःगु खः ।

ज्याझ्वलय् ज्यापु महागुथिया पुलांम्ह केन्द्रीय नायो नापं लोककवि राजभाई जकःमि, कविपिं अर्जुन नेपाःमि व कुलबहादुर महर्जनं चिनाखँ न्यंकादीगु खः । किपुलिइ नेवाः भाषा, संस्कृति, लिपि नापं थीथी विषययात कया ज्याझ्वः याना वनेगु नितिं नेवाः देय् दबू किपू नगर समितिय ब्यागलं कथं कोष दयेकाः वनेगु धकाः घोषणा याःगु खःसा उगु कोषया नितिं शनिवाः हे छगू लख व स्वीद्धःसिबें अप्वः ध्यबा मुंकेगु ज्या नं जूगु खः ।

Categorized in नेवाः