नेवा: अनलाइन न्युज – ललेन्द्र शाक्य | २०७९ जेठ १८, बुधबार १४:३९:१२

सिरहाय् छवाः न्ह्यः जूगु अबु काय् हत्याय् दुथ्याःगु द्वपनय् स्वम्हेसित ज्वंगु दु । हत्याया द्वपनय् सीम्हेसिया भौ शान्तिदेवीलिसें स्वम्हेसित प्रहरीं ज्वनाः सार्वजनिक याःगु खः ।

शान्तिदेवीलिसें गिरफ्तारीइ लाःपिं जनिफ मियाँ व बेचु पाल खः । इमिगु साथं हत्याय् छ्यःगु खुकुरी व खुकुरी तयातःगु झोला व प्यंगः थान मोबाइल तकं प्रहरीं बरामद याःगु दु ।

थःगु हे छेँय् देनाच्वंगु इलय् जेठ ७ गते बहनी चन्द्रेश्वर पाल व वया काय् सन्तकुमारया ज्वःगु ल्वाभः छ्यलाः हत्या याःगु खः ।

सन्तकुमारया ब्याहा जेठ ११ गते क्वःछिनातःगु खः । सन्तकुमारयात क्वसः स्वरुप मिसा पक्षं १ लख नगद, ८ आना लुँ व मोटरसाइकल बिइगु सहमति जूगु खः ।

थ्वसिबें न्ह्यः उम्ह मिसाया बेचु पालया काय् लिसे ब्याहा यायेगु तयारी जूगु खः । तर छक्वलं बेचुया काय् ब्याहा याये मानेमजुइधुंकाः सन्तकुमारलिसे ब्याहा जुइत्यंगु खः । थः काय् लिसे ब्याहा जुइमफयेधुंकाः बेचु पाल व चन्द्रेश्वर पालदथुइ रिसिइबी अप्वःगु प्रहरीं प्रारम्भिक अनुमान याःगु दु ।

मेखे सीम्हेस्या साहिँली भौ काय् म्ह्याय् ज्वनाः गोलबजार च्वनाः वयाच्वंगु खः । ससःअबुं भौयात किजाभतया ब्याहा भ्वजय् वयेमते धाःगु खः ।

व थःहे थः छेँजःलिसे तँम्ह्वयाच्वंम्ह खः । वया भाःतं विदेश वंबलय् कलाःयात ग्वाहालि यायेत भाला बियातःम्ह जनिफ मियाँ नं प्रहरीया फन्दाय् लाःगु दु ।

Categorized in अन्तर्राष्ट्रिय