zero media family planning adv

कासा ख्यलय् बजेट क्वपाल, कासामिपिं निराश !

नेवा: अनलाइन न्युज – ललेन्द्र शाक्य | २०७७ जेठ २०, मंगलबार ०८:५१:३३

सरकारं आर्थिक दँ २०७७–७८ या नितिं युवा तथा खेलकुद मन्त्रालयस २ अर्ब ३६ करोड तका दांया बजेट विनियोजन याःगु दु ।

अर्थमन्त्री डा. युवराज खतिवडां संघीय संसदय् विहिवाः न्हूगु आर्थिक दाया बजेट सार्वजनिक यासें खेलकुद ख्यःयात २ अर्ब ३६ करोडया बजेट विनियोजन जूगु जानकारी ब्यूगु खः ।

खेलकुद पूर्वाधारया अभाव जूगु कर्णाली प्रदेशय् खेलकुद संचालन जुइफइगु कथं राष्ट्रिय पूर्वाधार विकास यायेगु अर्थमन्त्री खतिवडां धाःगु दु । अथेहे, कर्णाली प्रदेशय् उच्च पर्वतीय कासा ज्याझ्वः संचालन व फुक्क स्थानीय तहलय् खेलग्राम विकास यायेगु बजेटय् न्ह्यथनातःगु दु ।

अथेहे, सरकारं अन्तर्राष्ट्रिय क्रिमेट रंगशाला निर्माणया नितिं माःगु बजेट विनियोजन याःगु दु । वंगु दँया हे ज्याझ्वः फुक्क स्थानीय तहलय् खेलग्राम दयेकेगु योजनायात निरन्तरता ब्यूगु दु ।

अथेहे, ९औं राष्ट्रिय खेलकुद कासाया नितिं माःगु बजेट विनियोजन याःगु नं मन्त्री खतिवडा धाःगु दु ।

सरकारं थुगु दँ युवा तथा खेलकुद मन्त्रालयया बजेट क्वपाःगु खः । सरकारं वंगु आर्थिक दँ युवा तथा खेलकुद मन्त्रालययात ३ अर्ब ९९ करोड तका दां विनियोजन याःगु खः ।

वंगु दँया तुलनाय् थुगु दँया बजेट १ अर्ब ६३ करोडं म्हो जूगु खः । हलिंन्यंकं कोरोना भाइरस महामारीया त्रासया इलय् वःगु थुगु बजेटं खेलकुदयात आपालं महत्व ब्यूगु आशा मदु । तर अत्यावश्यक ज्याया नितिं नं बजेट अपुग जुइगु खनेदूगुलिं कासामि व खेल पदाधिकारीपिं निराश जूगु दु ।

बजेट भाषणय् कासा ख्यःयात सम्बोधन याःगु मुक्क. निगू बुँदा दु :

१. निर्माणाधीन अन्तर्राष्ट्रिय क्रिकेट मैदान व मेमेगु क्रिकेट रंगशालाय् अन्तर्राष्ट्रिय स्तरया खेलकुद परिसर निर्माण व प्रादेशिक रंगशाला निर्माण सुरु यायेत माःगु रकम विनियोजन याःगु दु । फुक्क स्थानीय तहलय् खेलग्रामया विकास यायेगु ज्यायात निरन्तरता ब्यूगु दु ।

२. ९औं राष्ट्रिय खेलकुद कासा संचालन यायेत माःगु पूर्वाधार निर्माण व व्यवस्थापनया नितिं रकम विनियोजन याःगु दु ।

वंगु दँ नेपालय् ग्वसाः ग्वःगु १३ औं दक्षिण एसियाली खेलकुद कासा सागय् नेपालं ५१ गू स्वर्णलिसें ऐतिहासिक सफलता न्ह्यब्वःगु खः ।

राष्ट्रपतिं छुं दिं न्ह्यः सार्वजनिक याःगु नीति व ज्याझ्वलय् कासामिपिन्त प्रोत्साहन यायेगु न्ह्यथंगु खः । उकिं कासामिपिं छुं जुइ कि धैगु आशाय् दूगु खः ।

बजेट सार्वजनिक जुइधुंकाः कासामिपिंके निराशा ब्वलंगु दु । आः विनियोजित बजेट कासामिपिन्त प्रोत्साहन व कासा पूर्वाधार निर्माणया नितिं पर्याप्त मजू ।

Categorized in कासा