coved ad

कासामिपिन्त याःगु कारवाहीपाखें क्रिकेटया विकासय् पंगः ब्वलनेफु : सिप्यान

नेवा: अनलाइन न्युज – ललेन्द्र शाक्य | २०७८ पौष ५, सोमबार १४:३०:५२

क्रिकेट खेलाडी संघ नेपाल (सिप्यान) पाखें क्रिकेट कासामिपिन्त याःगु कारवाहीपाखें नेपाली क्रिकेटया विकासय् पंगः ब्वलनेफूगु अवस्था वःगु जानकारी ब्यूगु दु ।

नायः मनिषराज पाण्डे व महासचिव पारस खड्कां मंकाः कथं विज्ञप्ति सार्वजनिक यासें कासामिपिनिगु सः व भावना सम्बोधन यायेगु पलेसा इमित कारवाही याःगुलिं ध्यानाकर्षण जूगु जानकारी ब्यूगु दु ।

क्रिकेट कासामिपिनिगु योगदानया हुनिं विश्व क्रिकेट जगतय् विशेष म्हसीका दयेकेत ताःलाःगु खँ लुमंकूसे सिप्यानं धाःगु दु, ‘कासामिपिन्सं थःगु भावना व सःयात न्ह्यःने तयेत्यंबलय् उगु मागया उचित सम्बोधन यायेगु पलेसा कासामिपिन्त हे याःगु कारवाहीपाखें नेपाली क्रिकेटया विकासय् पंगः जुइगु अवस्था ब्वलंगु दु ।’

सिप्यानं क्रिकेट कासामिपिनिगु वर्गीकरणथें जाःगु महत्वपूर्ण विषययात पारदर्शी, तर्कसम्मत व त्रुटीरहिन यायेत माग तकं याःगु दु । ‘वर्गीकरणथें जाःगु महत्वपूर्ण विषयवस्तुयात पारदर्शी रुपं निश्चित मापदण्ड क्वःछिनः अवलम्बन यासें तर्कसम्मत व त्रुटीरहित यायेत तथ्यपरक, वस्तुपरक व वैज्ञानिक यायेमाःगु आवश्यकता हाकनं दोहोरे यायेमाःगु आवश्यकता खनेदु’, विज्ञप्तिइ धयातःगु दु ।

वंगु मंसीर २९ गते नेपाल क्रिकेट संघ (क्यान)पाखें राष्ट्रिय क्रिकेट टिमया कप्तान ज्ञानेन्द्र मल्ल व उपकप्तान दीपेन्द्र सिंह ऐरीलिसें प्यम्ह क्रिकेटरपिन्त कारवाही याःगु खः । इमिसं वर्गीकरणबारे थःपिनिगु असन्तुष्टि सार्वजनिक याःगु खः ।

नेकपा माओवादीया नायः पुष्पकमल दाहाल प्रचण्डं क्रिकेट कासामिपिन्त याःगु कारवाहीबारे प्रधानमन्त्री शेरबहादुर देउवाया ध्यानाकर्षण तकं याकूगु खः ।

Categorized in कासा