2565 buddha Jayanti ADV

कालिमाति तरकारी बजार – लकडाउन नो प्रोब्लम : १२ म्ह संक्रमित लूसां नं हूलमूल

नेवा: अनलाइन न्युज – ललेन्द्र शाक्य | २०७८ जेठ ६, बिहिबार १०:५६:४८

सरकारं कोरोना भाइरसया महामारी नियन्त्रणया नितिं धासें बैशाखया निगूगु वाःनिसें स्वनिगलय् लकडाउन जारी याःगु दु । तर, लकडाउनया इलय् नं कालिमाति तरकारी व फलफूल बजारय् धाःसा न्हिथं तरकारी मिइपिं न्याइपिनिगु आपालं हूलमूल जुयाच्वंगु दु । न्हिथं सुथंनिसें हे न्हाय् तकं त्वःपुयाः मवःसे मास्क तयाः वइपिं व्यवसायी लिसें मेमेपिनिगु कालिमातिइ न्हिथं मेला हे जुयाच्वंगु दु ।

प्रहरी माइकिङ यानाः वइ । छझाः तितरवितर जूथें जुइ, वधुंकाः हाकनं जात्राय् थें हे मनूत मुनी, अन तरकारी बजारय् उपस्थित जुइपिं ।

कालिमाति प्रहरी वृत्तया डिएसपी अपिल बोहोरा कालिमातिइ तरकारी न्यायेत वइपिन्त गुलि जक आग्रह याःसां नं अनया भीड नियन्त्रणय् कायेमफूगु धाःगु दु । बोहोरां धाःगु दु, ‘छुं दिं न्ह्यः ला जिमिसं लाठीचार्ज तकं यानाः । अन बजारय् १२ म्ह कोरोना संक्रमि लुयावल धाःसां नं सुं हे ग्याःगु मखु ।’

निन्हु न्ह्यः कालिमाति तरकारी बजारय् येँ महानगरपालिकां याःगु थ्यंमथ्यं ४०० म्हेसिगु पीसीआर परीक्षणया झ्वलय् १२ म्ह संक्रमित लुयावःगु खः । गुकी १० म्ह मिजं व २ म्ह मिसा खः । 

डिएसपी बोहोरां छगू किलो आलु न्यायेत नं कालिमाति तरकारी बजारय् हे वइपिं आपालं दूगु खँ धाःगु दु । बोहोराया कथं आः न्हिथं प्रहरीं अन माइकिङ यानाः वयाच्वंगु दु ।

Categorized in बजाः