prabhu baink new

कार्तिकनिसें वांछ्वयेगु जुइ फोहोर बञ्चरे डाँडाय् ः राज्यमन्त्री रामबीर मानन्धर

नेवा: अनलाइन न्युज – ललेन्द्र शाक्य | २०७७ आश्विन ४, आइतबार १५:१६:३२

शहरी विकास राज्यमन्त्री रामवीर मानन्धरं जनताया चाहना कथं सरकारं विकासया ज्यायात तीव्रता ब्यूगु धाःगु दु ।

आइतवाः नुवाकोट धादिंगया सीमा क्षेत्रय् च्वंगु बञ्चरे डाँडाय् थ्यंकूम्ह मन्त्री मानन्धरं असोज महिना दुने ल्याण्डफिल्ड साईटया न्हापांगु चरणया निर्माण क्वचाइगु दाबी याःगु दु । वं कार्तिक न्हापांगु वानिसें फोहोर वांछेवयेगु धाःगु दु ।

कोभिड १९ संक्रमणया हुनिं निर्माणय् छुं लिपा लाःवंगु धासें मन्त्री मानन्धरं आः लच्छिया दुने साइट निर्माण क्वचाइगु दाबी याःगु दु । फयांफतले मोहनी न्ह्यः हे फोहोर विसर्जन यायेगु धासें मन्त्री मानन्धरं माःगु पूर्वाधार निर्माण तीव्र गतिइ जुयाच्वंगु जानकारी ब्यूगु दु । न्हापांगु फेजया नितिं ३४ करोडया ठेक्काय् ज्या जुयाच्वंगु दु ।

स्वनिगःया फोहोर व्यवस्थापनया नितिं दीर्घकालीन योजना लिसें सरकारं स्यानेटरी ल्याण्डफिल्ड साईट दयेकाच्वंगु दु । सामान्य अवस्थाय् फोहोर विसर्जन यायेबलय् २५ दँ व स्यानेटरी ल्याण्डफिल्ड यायेबलय् कम्ती नं ५० दँया नितिं उगु थासय् स्वनिगःया फोहोर व्यवस्थापन जुइफइगु मन्त्री मानन्धरं जानकारी ब्यूगु दु ।

कोरोना संक्रमणया हुनिं छुं लिपा लाःवंगु धासें मन्त्री मानन्धरं ज्यायात तीव्रता बिइत नं निर्देशन ब्यूगु दु ।

सरकारं माःगु फुक्क पूर्वाधार व बजेट व्यवस्थापन याःगुलिं आः नं बहानाबाजी यायेगु छूट सुयात नं मदुगु धासें मन्त्री मानन्धरं ज्याय् लिपा लाःवंसा सम्बन्धित निकाय व ठेकेदार कम्पनीयात कारवाही यायेगु ख्याच्वः तकं ब्यूगु दु ।

सुं ठेकेदारया लापरवाहीया हुनिं सरकारया छुं ज्याय् प्रभावकारिता खनेमदुगु धासें लिपा लाःवनीगु कथं ज्याय् सम्झौता मजुइगु प्रष्ट याःगु दु मन्त्री मानन्धरं । वं गुणस्तर कायम जुइगु कथं क्वःछ्यूगु तिथि दुने ज्या क्वचायेकेत निर्देशन ब्यूगु दुसा स्वनिगःया शहरी व्यवस्थापनया नितिं बञ्चरे डाँडा लाइफलाइन जूगु धाःगु दु ।

मन्त्री मानन्धरं स्वनिगःया जीवनलिसे स्वानाच्वंगु ल्याण्डफिल्ड साईट निर्माणय् छुं पंगः मदूगु धासें स्थानीय जनताया जनगुनोसो नं सम्बोधन यायेगु प्रतिबद्धता प्वंकूगु दु । जनताया सरकारं जनताया गुनासो न्यनीगु व कार्यान्वयन तकं याइ धासें मन्त्री मानन्धरं सरकार जनताया अधिकार रक्षाया नितिं सदां तयार दूगु धाःगु दु ।

निर्माण कम्पनी सप्तकोशी जलाधारया साईट इञ्चार्ज कमल पोखरेलं न्हापांगु फेज निर्माणया ज्या ८५ प्रतिशत तक क्वचाःगु व असोज लिपांगु ईतकया दुने निर्माण क्वचाइगु जानकारी ब्यूगु दु ।

पोखरेलं निर्माणया झ्वलय् कोभिड भाइरस व वा वःगु पंगः जूगु धासें आः लच्छिया दुने न्हापांगु फेज सरकारयात लःल्हायेगु धाःगु दु ।

Categorized in स्थानिय-समाज