nepal investment baink

कात्ति प्याखंयात वर्ल्ड रेकर्डय् छ्वयेगु कुतः

नेवा: अनलाइन न्युज – विजयरत्न | २०८० माघ २२, सोमबार १३:५७:३५

यल देयया धार्मिक व सांस्कृतिक महत्वं जाःगु कात्ति प्याखंयात वर्ल्ड रेकर्डय् छ्वयेगु कुतः जुयाच्वंगु खँ शनिवा: जूगु कात्ति प्याखं समापन ज्याझ्वलय् जानकारी बिउगु दु ।

बागमति प्रदेशया उद्योग,वाणिज्य, भुमि तथा प्रशासन मन्त्री माननीय रामकृष्ण चित्रकारया मूपाहाँसुइ शनिवा: जूगु उगु ज्याझ्वलय् थ्व वर्ल्ड रेकर्डय् छ्वयेगु कुतः जुयाच्वंगु खँ उदघोष याःगु खः ।

थौंकन्हे झिंनिन्हु क्यना: वयाच्वंगु कात्ति प्याखं थथे वर्ल्ड रेकर्डय् तयेत आकिवं वा मेमेगु दँय् नं थ्व प्याखंयात म्हतिं नं नीन्हेन्हु (२७ दिन) तक क्यनेगु ग्वसाः जुयाच्वंगु खँ नं ज्याझ्वलय् जानकारी ब्यूगु दु ।

मूपाहाँ माननीय मन्त्री चित्रकारं झीगु संस्कृति धइगु झीगु म्हसिका खः धका: धासें कात्ति प्याखं विशेष महत्वं जाःगु प्याखं जुगुलिं उकिया संरक्षण सम्बर्द्धन व प्रबर्द्दन यायेगु सकसिया जिम्मेवारी खः । थ्व जिम्मेवारीयात प्रदेश सरकारपाखें नं सदां पुवंके धका: धयादिल ।

कात्ति नाच संरक्षण समितिया ग्वसालय् जूगु उगु ज्याझ्वलय् समितिया न्वकु प्रतापधर शर्मा राजोपाध्यायं लसकुस नुगःखँ तयादीगु खः । उगु ज्याझ्वलय् समितिया छ्यान्जे विजय तण्डुकारं दच्छिया प्रगति विवरण व ज्याझ्वः न्ह्यब्वयादीगु खःसा दाँभरीं उत्तमरत्न शाक्यं आर्थिक विवरण न्ह्यब्वयादीगु खः ।

समितिया नायः किरण चित्रकारया सभानाय:सुइ जूगु उगु ज्याझ्वलय् यलय् बुंगद्यःया जात्राथें हे तुं  यल दुनेया दक्वः नेवाः जातिया संलग्नता दूगु जातिय समावेशीतां जाःगु प्याखं खः धका: सः थ्वःगु खः ।

समापन ज्याझ्वलय् कात्ति प्याखंयात थीथी कथं ग्वाहालि याःपिन्त हनाबना तसें सुभाय् पौ नं देछा:गु खः ।

 

Categorized in कला