2565 buddha Jayanti ADV

काठमाडौं रेजर्स एफसी नेपाल सुपर लिग च्याम्पियन

नेवा: अनलाइन न्युज – ललेन्द्र शाक्य | २०७८ जेठ २, आइतबार १५:३९:०८

धनगढी एफसीयात बुकाः काठमाडौं रेजर्स एफसी न्हापांगु संस्करणया नेपाल सुपर लिग (एनएसएल) फुटबलया च्याम्पियन जूगु दु । धनगढीयात १–० गोल अन्तरं बुकाः काठमाडौं रेजर्स एनएसएलया न्हापांगु उपाधि त्याकेत ताःलाःगु खः ।

त्रिपुरेश्वरय् च्वंगु दशरथ रंगशालाय् जूगु उगु फाइनल कासाय् काठमाडौं रेजर्सया नितिं विदेशी कासामि मेसौके ओलोमोउं निर्णायक गोल याःगु खः । वं कासाया २१ औं मिनेटय् उगु गोल याःगु खः । ओलोमोउ हे लिगय् मुक्कं च्यागू गोल यासें कासाया सर्वाधिक गोलकर्ता तकं जूगु खः । उपाधिलिसें काठमाडौं रेजर्सं ३५ लख तका सिरपाः त्याकूगु दु । उपविजेता धनगढीं १५ लख तका त्याकूगु दु ।

कासाया २९ औं मिनेटय् ओलोमोउया फ्रि किक प्रहार गोलपोष्ट लिक्कपाखें पिहाँ वःगु खः । कासाया ३० औं मिनेटय् छिरिङ गुरुङं ह्वःताः काःसां नं गोल यायेगुपाखें चुकेजुल । न्हापांगु हाफया इन्जुरी इलय् नं काठमाडौंया ओलोमोउ नं प्रहार याःगु बल गोलय् परिणत जूइमफुत ।

मध्यान्तर लिपा कासाया ५५ औं मिनेटय् धनगढीया अशोक खवासया प्रहारयात काठमाडौंया गोलकिपर विकेश कुथुं बचेयाःगु खः । कासाया ६५ औं मिनेटय् काठमाडौंया स्टेफेन बिनोङं थ्वाःगु बलयात धनगढीया गोलकिपर किरण चेम्जोङं गोल जुइगुपाखें पंगु खः ।

अथेहे, कासाया ७५ औं मिनेटय् कोठमाडौंया ओलोमोउया लङ सुट प्रहार सितिं वंगु खः । कासाया ८२ औं मिनेटय् धनगढीया टंक बस्नेत गोल यायेगुपाखें चुकेजूगु खः । कासाया ९० औं मिनेटय् काठमाडौंया बिनोङं थ्वाःगु बल गोलय् परिणत जुइमफुत ।

काठमाडौं नं धनगढीलिसे लिग चरण व प्लेअफय् ब्यहोरेया ःगु हारया बदला म्हिगः शनिवाःया फाइनल कासाय् काःगु खः । फाइनल कासाया उदीयमान कासामि काठमाडौंया राजन गुरुङ घोषित जूगु खः । अथेहे, काठमाडौंया हे फ्लोरेन्ट कारा प्लेयर अफ दि म्याच घोषित जूगु खः ।

निम्हेस्यां म्हतिं २५,००० तका लिसें ट्रफी कायेत ताःलाःगु दु । नेपाल स्पोर्टस एण्ड इभेन्टस् म्यानेजमेन्टं ग्वसाः ग्वःगु कासाय् ७ गू फ्रेन्चाइज पुचलं ब्वति काःगु खः । कोभिड १९ या हुनिं कासाय् दर्शकपिन्त कासा स्वयेत अनुमति मब्यूगु खः ।

थ्वहे बैशाख ११ गतेनिसें न्ह्यागु कासाय् काठमाडौं व धनगढीलिसें एफसी चितवन, विराटनगर सिटी एफसी, ललितपुर सिटी एफसी, पोखरा थन्डर्स व बुटवल लुम्बिनी एफसी दथुइ धेंधेंबल्ला जूगु खः । राउण्ड रोबिन लिगलिपा शीर्ष प्यंगू पुचलं प्ले अफ म्हिताः फाइनलतक थाय् दयेकूगु खः ।

Categorized in कासा