zero media family planning adv

काठकाडौं प्लाजा खाली यायेत नेपाट ट्रष्टया ताकेता

नेवा: अनलाइन न्युज – ललेन्द्र शाक्य | २०७७ चैत्र २६, बिहिबार १२:४०:५१

नेपाल ट्रष्ट कमलादीइ च्वंगु काठमाडौं प्लाजा खाली यायेत लिपांगुखुसि धासें ख्याच्वः ब्यूगु दु । वंगु असार ३ गते हे खाली जुइमाःगु काठमाडौं प्लाजाय् विवाद सल्टे मजूबलय् ट्रष्टं सुचं सार्वजनिक यासें चैत्र ३१ गते दुने खाली यायेत धासें सुचं सार्वजनिक याःगु दु । कानून कथं भवन खाली याकेबलय् जुइगु क्षतिया जिम्मेवार स्वयं व्यवसायी हे जुइगु ट्रष्टं धाःगु दु ।

थ्वसिबें न्ह्यः प्लाजा संचालनया भाला काःगु कन्सेप्ट डेभलपर्स प्रा.लि.लिसे न्हूगु सम्झौता जूगु मदुसा येँ महानगरपालिकायात बालं बिइगु निर्णय नं कार्यान्वयन जुइफूगु मदुनि ।

थ्व अलमल जूगु झिलाया इलय् थ्यंमथ्यं साढे ६ करोड तका दां बालं गुमेजुइगु जोखिम दु ।

२०५० असार ३ गते तत्कालीन राजकीय सम्पत्ति कोष विभागया तत्कालीन सहसचिव शंकरराज विष्ट व येँ महानगरपालिका वडा ल्याः ७ चाःबहीया सुवासराज काफ्ले दथुइ वडा ल्याः ३१ या कित्ता ल्याः २२३५ या ५ रोपनी २ पैसा जग्गा व्यापारिक प्रयोजनया नितिं आधुनिक भवन निर्माण यायेत करारनामा जूगु खः ।

काफ्लेया दायित्व कन्सेप्ट डेभलपर्स प्रा.लि.इ हस्तान्तरण जुइधुंकाः २०६६ पुस २३ गते नेपाल ट्रष्ट ऐन, २०६४ कथं पुलांगु करारनामाया अधीनय् च्वनाः हाकनं करारनामा जूगु खः । उगु इलय् व जग्गा पूर्व राजपरिवारया जूगुलिं नेपाल ट्रष्टया स्वामित्वय् वयेधुंकूगु खः ।

२०६६ पुस २३ गते नेपाल ट्रष्टया ज्याकुथिया पाखें तत्कालीन उपसचिव टिकाराम घिमिरे व कन्सेप्ट डेभलपर्स प्रा.लि.या पाखें प्रबन्ध संचालक सुनिलभक्त श्रेष्ठदथुइ सम्झौता नं जूगु खः । उगु सम्झौताया अवधि २०७७ असार २ तक खः । सम्झौता सिधइगु जुइधुंकाः कन्सेप्ट डेभलपर्सं प्रति महिना ८ लख बिइगु कथं न्हूगु प्रस्ताव यात । चल्तीया सिबें म्हो मू कबोल याःगु धासें ट्रष्टं हाकनं सम्झौता मयायेगु निर्णय याःगु खः ।

वधुंकाः कन्सेप्ट डेभलपर्सं २०७७ जेठ २८ गते मर्मत सम्भारय् ८ करोड खर्च यायेगु व सरकारी मूल्यांकनसिबें २ लख अप्वः (प्रति महिना ६२ लखतक) बालं बुझेयायेगु न्हूगु प्रस्ताव छ्वःगु खः ।

उगु ईतक ट्रष्टं धाःसा व भवन येँ महानगरपालिकायात बिइगु निर्णय मन्त्रिपरिषदपाखें हे याकेधुंकूगु खः । येँ महानगरयात मासिक ६० लख बालं कथं बिइगु निर्णय जूगु दु ।

तर ट्रष्ट व महानगरदथुइ आःतक सम्झौता जूगु मदुनि । महानगरयात बालं बिइगु निर्णयविरुद्ध काठमाडौं प्लाजाया व्यवसायी व कन्सेप्ट डेभलपर्स अदलात वंगु खः, गुकी तत्काल सम्झौता मयायेत अन्तरिम आदेश ब्यूगु दु । थ्व मुद्दाया लिपांगु ईतक नं क्वचाःगु मदुनि ।

अदालतपाखें सम्झौता यायेगु खुल्ला यायेगु कथं लिपांगु फैसला वःसां नं महानगरया नितिं सहज मजुइगु खनेदूगु दु ।

छाय् धाःसा मन्त्रिपरिषदं स्वंगूगु पक्षयात बालं मबिइगु कथं महानगरयात बालं बिइगु निर्णय याःगु दु । जबकि महानगरया कर्मचारीपिनिगु दाउ भवनया बच्छि हिस्सा बालं बिइगु खः ।

थ्व भवन बालं कायेगु निर्णय याःसां नं महानगरं ११ गू थासय् ज्याकुथि संचालन याःबलय् सर्वसाधारणयात असहज जूगु लिसें महिनाया २८ लख अप्वः बालं पुलेमाःगुलिं प्लाजा बालं कयाः बच्छि थःपिनसं उपभोग यायेगु व ल्यंदूगु भाग बालं बियाः ट्रष्टयात पुलेमाःगु रकम मिलेयायेगु धाःगु खः । तर, मन्त्रिपरिषदं बालंया दामय् चलखेल जुइफूगु धासें भवनया पूर्ण उपभोग महानगरपालिका थःम्हं हे यायेमाःगु कथं निर्णय यायेधुंकाः महानगर मछिंगु अवस्थाय् लाःगु खः ।

अय्सां महानगर भवन छ्यलाबुलाया नितिं तयार जूगु धाःगु दु । नेपाल ट्रष्टया सहसचिव भीष्मकुमार भुसालं ब्यूगु तिथितक भवन खाली मयात धाःसा कानूनी प्रक्रिया कथं न्ह्यःने वनेगु धाःगु दु ।

Categorized in बजाः