ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

कांग्रेस व देउवा भारतया परम्परागत पासा : भारतीय पत्रिकाया सम्पादकीय

नेवा: अनलाइन न्युज – ललेन्द्र शाक्य | २०७८ आषाढ ३०, बुधबार १०:३९:०७

‘नेपाःया प्रजातन्त्रयात न्यायालयं उद्धार यात, आः भारतं थःगु कोर्स हिलेमाः’

नेपाली कांग्रेसया सभापति शेरबहादुर देउवा प्रधानमन्त्रीइ नियुक्त जूगु विषययात भारतीय पत्रपत्रिकातसें प्राथमिकताया लिसें पिथंगु दु ।

मू अंग्रेजी न्हिपौंतसें सम्पादकीय हे च्वःगु दु । दि इन्डियन एक्स्प्रेसं थःगु सम्पादकीयस संसद भंगया विषयस राष्ट्रपति विद्यादेवी भण्डारीं पक्षधरता क्यंगु न्ह्यथनातःगु दु । उगु सम्पादकीयस धयातःगु दु, ‘राष्ट्रपति विद्यादेवी भण्डारीं ओलीं चाहेजू कथं हे हाकनं संसद भंग यानाः खुला पक्षपाती पलाः ल्ह्वन । देउवां २७५ मध्ये १४९ म्हेसिगु ल्हाःचिं लःल्हाःसां नं प्रधानमन्त्री नियुक्त यायेत अस्वीकार यात गुगु अजूचायापूगु खँ जुल ।’

उगु सम्पादकीयस नेपाली कांग्रेस व देउवा सुं अपरिचित व्यक्ति मजूगु व भारतीय राजनीतिक संस्थापनया परम्परागत पासा जूगु तकं न्ह्यथनातःगु दु । सम्पादकीयस धयातःगु दु, ‘पश्चिमी लदाख क्षेत्रया लाइन अफ कन्ट्रोलय् चिनियाँ सेनाया सम्बन्धय् भारत हाई अलर्टय् दूगु इलय् काठमाडौं मित्र जुयाः थुकिं निश्चय नं ग्वाहालि याइ ।’

न्हूदिल्लीं देउवालिसेया मित्रतायात आपालं बढाइचढाइ यायेमज्यूगु व इपिंलिसे अस्वाभाविक अपेक्षा याये नं मज्यूगु तकं न्ह्यथनातःगु दु । सम्पादकीयस धयातःगु दु, ‘नेपाःया सुं नं राजनीतिज्ञं दिल्लीलिसे लिक्कया सम्बन्ध दूगु क्यनेफइमखु । काठमाडौंया सुं नं सरकारं भारतलिसे गुलि लिक्कया सम्बन्ध जूसां नं चीनयात इन्कार यायेफइमखु छाय् धाःसा चीनं नेपाःया पूर्वाधारय् आपालं लगानी याःगु दु ।’

टाइम्स अफ इन्डियां थःगु सम्पादकीयस न्हूदिल्लीं नेपाःया राजनीतिक घटनाक्रमया सम्बन्धय् तटस्थ अडान कायेमाःगु व भारतय् विकासया परियोजनायात गति बिइमाःगु न्ह्यथंगु दु । उगु पत्रिकां न्हूदिल्लीं सन् २०१५ स संविधान जारी यायेधुंकाः गुकथं हस्तक्षेप याःगु खः, अथे यायेमज्यूगु न्ह्यथंगु दु । उगु सम्पादकीयस धयातःगु दु, ‘सन् २०१५ या हस्तक्षेपं नेपाली समाजया छगू हिस्सायात चीनपाखे घ्वानाबिल ।’

दि हिन्दुस्तान टाइम्स न्हिपतिं नेपाःया प्रजातन्त्रयात न्यायालयं उद्धार यात शीर्षकय् सम्पादकीय पिथंगु दु । उगु पत्रिकां भारतं केपी ओलीयात समर्थन यानाः थः हे प्रजातान्त्रिक मूल्य व मान्यताया गलत दिशाय् दंगु तर आः उगु कोर्स हिलेमाःगु न्ह्यथंगु दु । नेपाःया अदालतं संविधानवादयात न्ह्यःने यंकूगु धासें उगु पत्रिकां आः भारतं थःगु कोर्स हिलेमाःगु न्ह्यथंगु दु ।

 

Categorized in पत्रपत्रिका