नेवा: अनलाइन न्युज – ललेन्द्र शाक्य | नेपाल संवत ११४४ तृतिया (२०८१ जेष्ठ १३ गते ) आइतवाः

प्रधानमन्त्री पुष्पकमल दाहाल प्रचण्ड व प्रमुख प्रतिपक्षी दल नेपाली कांग्रेस सभापति शेरबहादुर देउवादथुइ सहलह जूगु दु ।

निम्ह शीर्ष नेतापिं दथुइ देउवा निवास भुइजःसिइ भेटवार्ता जूगु खः । देउवा व प्रचण्डदथुइ थ्यंमथ्यं ४० मिनेट वार्ता जूगु खः ।

सहकारी प्रकरण छानविनया नितिं नीस्वनेगु धाःगु संसदीय समितिया कार्यादेश व क्षेत्राधिकारया विषयस सहमति कुतः जुयाच्वंगु इलय् नेकपा माओवादी केन्द्रया नायः तकं जुयाच्वंम्ह प्रधानमन्त्री प्रचण्ड व प्रमुख प्रतिपक्षी दल कांग्रेसया सभापति देउवादथुइ भेटवार्ता जूगु खः ।

थौं आइतवाः सुथय् प्रधानमन्त्रीया सरकारी निवास बालुवाटारय् प्रधानमन्त्री प्रचण्ड, देउवा व सत्तारुढ एमालेया नायः केपी शर्मा ओलीदथुइ सहलह यायेगु तय जूगु खः । तर देउवा अस्वस्थ जूगुलिं उगु बैठक हे भुइजःसिइ सारेयाःगु खः । विरामी देउवायात नापलायेत थ्यंकूम्ह प्रचण्डयात कांग्रेसं धाःसा निराश यानाः छ्वःगु खः । छानविन समितिइ उपप्रधान व गृहमन्त्री रवि लामिछानेया नां तये हे माःगु अडानपाखें टसमस मजुइगु निर्णय कांग्रेसं याःगु सांसद जीवन परियारं जानकारी ब्यूगु दु ।

सांसद परियारं भेटवार्ताबारे जानकारी बिसें संचारकःमिपिन्त धाःगु दु, “जिमिसं तयागु खँय् प्रधानमन्त्री गम्भीर जूगु दु । प्रधानमन्त्रीं शीर्ष नेतादथुइ हाकनं सहलह यानाः थौं आइतवाः हे बहनी व कन्हय् सोमवाः सुथय् तक सहमति यायेगु धाःगु दु ।”

सत्तापक्षं रवि लामिछानेया नां च्वये मज्यूगु धासें वयाः च्वंसां नं कांग्रेसं थःपिनिगु अडान मत्वःतेगु परियारं धाःगु दु ।

वं धाःगु दु, “गोर्खा मिडिया नेटवर्कया नां जक कयाः ला मगाः नि । कम्ती नं अन दुथ्याःपिं व्यक्तिपिं सु सु खः धैगु विषयस नं न्ह्यमथंसे छानविन जुइफइमखु धैगु जिमिगु अडान कायम हे दु ।”

तर, सत्ता पक्षया नेतापिन्सं संस्थाया नां न्ह्यथंनेधुंकाः व्यक्तिया नां न्ह्यथनेम्वाःगु अडान तःगु दु । उकी कांग्रेस सहमत जूगु मदु ।

Categorized in राजनीति