2565 buddha Jayanti ADV

कलास्टार अनलाइन प्रतिभा खोजीया टप १० प्लस २ सार्वजनिक (भिडियो)

नेवा: अनलाइन न्युज – ललेन्द्र शाक्य | २०७८ जेठ १९, बुधबार १४:३०:३८

कोभिड १९ कोरोना भाइरस संक्रमण महामारीया हुनिं जुयाच्वंगु लकडाउनया ई छ्यलेगु नितिं बरिष्ठ संगीतकःमि शान्तबहादुर शाक्यया संयोजनय् न्ह्यानाच्वंगु कलास्टार अनलाईन प्रतिभा खोजी २०७८ सांगितिक ज्याझ्वःया टप १० प्लस २ ल्यज्या ज्याझ्वः थौं बुधवाः क्वचायेकाः टप १० प्लस २ दुने लायेत ताःलाःपिं प्रतिभापिनिगु नां धलः सार्वजनिक याःगु दु ।

थुगु कलास्टार अनलाइन प्रतिभा खोजी ज्याझ्वः आः नकतिनि जक मदुम्ह गोल्डेन भ्वाइस अफ नेपाल प्रेमध्वज प्रधानयात श्रद्धाञ्जलि देछायेगु कथं न्ह्याकूगु खःसा मदुम्ह बरिष्ठ संगीतकःमि प्रधान मदुगु ४५ दिं लत्याया पूण्यतिथि असार ५ गते ग्राण्ड फिनाले जुइगु कथं न्ह्याकूगु खः ।

थौं जेष्ठ १९ गते बुधवाः सार्वजनिक याःगु कलास्टार अनलाइन प्रतिभा खोजीया टप १० प्लस २ दुने लायेत ताःलाःपिं प्रतिभापिं कन्टेष्ट ल्याः १० ललेन्द्र शाक्य, कन्टेष्ट ल्याः २५ मचाराजा महर्जन, कन्टेष्ट ल्याः २९ सुरज मानन्धर, कन्टेष्ट ल्याः ३७ रितु सिवा, कन्टेष्ट ल्याः ४१ सुरेश मानन्धर, कन्टेष्ट ल्याः ४४ मैंया मुनिकार महर्जन, कन्टेष्ट ल्याः ४८ छाँया पिया, कन्टेष्ट ल्याः ७१ रविकुमार महर्जन, कन्टेष्ट ल्याः ७४ प्रकाश हमाल, कन्टेष्ट ल्याः ७६ सुरेन्द्र खड्गी, कन्टेष्ट ल्याः ७८ शुद्धलक्ष्मी श्रेष्ठ व कन्टेष्ट ल्याः ७९ सुरज मानन्धर खः ।

कलास्टार अनलाइन प्रतिभा खोजी २०७८ ज्याझ्वलय् न्हापांगु चरणय् ८२ म्ह कासामि प्रतिभापिन्सं ब्वति काःगु खः । उगु ८२ म्ह कासामिपाखें ३० म्ह ल्ययाः निगूगु चरणय् टप ३० ल्यःगु खःसा टप ३० पाखें टप १० प्लस २ कथं १२ म्ह कासामि प्रतिभापिं ल्यःगु खः ।

अथेहे, ग्वसाः खलःया संयोजक शान्तबहादुर शाक्यं बियादीगु जानकारी कथं यदि लकडाउनपाखें पंगः मथन धाःसा असार ५ गते येँया बालाजुइ च्वंगु अष्टनारायण हलया दबुली कलास्टार अनलाइन प्रतिभाया ग्राण्ड फिनाले ज्याझ्वः तःजिक सामाजिक दूरी कायम यानाः जुइगु जानकारी बियादीगु दु ।

संयोजक भाजु शाक्यया कथं उगु ग्राण्ड फिनाले ज्याझ्वलय् टप १० प्लस २ दुने लायेत ताःलापिं प्रतिभापिनिगु पाखें लाईभ म्ये ब्वज्या जुइगु व उगु लाईभ म्ये ब्वज्यापाखें निर्णायक मण्डलया पुचलं उत्कृष्ट कलास्टार प्रतिभापिं ल्यज्या जुइगु जानकारी नं बियादीगु दु ।

अथेहे, कजि भाजु शाक्यं असार ५ गतेया कलास्टार ग्राण्डफिनाले ज्याझ्वलय् कलास्टार अनलाइन प्रतिभा खोजी २०७८ ज्याझ्वलय् दकले न्हापां ब्वति कयाः इन्ट्री जुयादीपिं स्वम्ह प्रतिभापिं रविन्द्र श्रेष्ठ, सिद्धार्थ बज्राचार्य व सुमन बज्राचार्यपिन्त व उगु ज्याझ्वलय् विदेशं ब्वति कयादीपिं बैंग्लोरपाखें पुनम अमात्य, अष्ट्रेलियापाखें हरिओम व युकेपाखें राजेश मानन्धरपिन्त कलास्टार सम्मान यायेगु ज्याझ्वः दूगु खँया जानकारी बियादीगु दु ।

थ्वहे झ्वलय् कलास्टार अनलाइन प्रतिभा खोजी २०७८ ज्याझ्वलय् ब्वति कयादीपिंमध्ये कलास्टार युट्युब च्यानलय् दकले अप्वः भ्यूअर्स कायेत ताःलाःपिं प्रतिभापिं मिनर्वा शाक्य, पवित्रकुमार महर्जन व सृजना बज्राचार्यपिन्त नं कलास्टार सम्मान यायेगु ज्याझ्वः दूगु जानकारी बियादिसें संयोजक भाजु शाक्यं उगु ग्राण्ड फिनाले ज्याझ्वलय् कलास्टार अनलाइन प्रतिभा खोजी ज्याझ्वलय् ब्वति कयादीपिं कल्पना श्रेष्ठ, रेशम थापा, राजु शाक्य व सुमन शाक्यपिन्त विशेष सम्मानपाखें सम्मानित यायेगु ज्याझ्वः नं दूगु जानकारी बियादीगु दु ।

आः कलास्टार अनलाइन प्रतिभा खोजी २०७८ ज्याझ्वलय् टप १० प्लस २ दुने लायेत ताःलाःपिं प्रतिभापिन्सं गोल्डेन भ्वाइस अफ नेपाल प्रेमध्वज प्रधानया म्ये, कासाय् थःम्हं महालानागु म्ये लाईभ हालेमाःगु जानकारी नं ग्वसाः खलः कजि बरिष्ठ संगीतकःमि शान्तबहादुर शाक्यं जानकारी बियादीगु दु ।

(थन क्लीक यानाः टप १० प्लस २ लायेत ताःलाःपिनिगु नां  धलः स्वयादिसँ)

Categorized in कला