नेवा: अनलाइन न्युज – ललेन्द्र शाक्य | २०७८ श्रावण १९, मंगलबार ११:३३:२१

दक्षिणी धादिङया ताल्तीइ च्वंगु हुरेय् सोमवाः छम्ह मिजं नं थः कलाःया हत्या यानाः थःम्हं नं आत्महत्या याःगु दु । 

बेनिघाट रोराङ गाउँपालिका २ ताल्तीइ च्वंगु हुरेया ४५ दँया तीर्थबहादुर विक नं बुइँ ज्या यायेत वनाच्वंगु इलय् ४२ दँया थः कलाः भीममाया विकया हत्या याःगु खः ।

बुइँ ज्या यायेत वनाच्वंगु इलय् विक नं थः कलाःयात त्वःकू व ईंचा प्रहार यानाः हत्या याःगु खःसा कलाःया हत्या यायेधुंकाः थःम्हं नं खिपःया स्वचापाँय् दयेकाः सिमाय् यःगायाः आत्महत्या याःगु जिल्ला प्रहरी ज्याकुथि धादिङया प्रहरी प्रमुख उपरीक्षक महेन्द्र खड्कां जानकारी ब्यूगु दु ।

जलाखलापिनिगु कथं इमिसं सुथय् छेँय् नापं च्वनाः अयलाः त्वंगु खः । बुइँ ज्या दु धकाः वनेधुंकाः लँपुइ थःथवय् विवादया हुनिं कलाःया हत्या याःगु जलाखलापिन्सं धाःगु दु ।

घटनाया विस्तृत अनुसन्धान जुयाच्वंगु जानकारी बिसें प्रहरी उपरीक्षक खड्कां निम्हेसिगु सीम्ह परीक्षणया नितिं प्राथमिक स्वास्थ्य चौकी गजुरीइ यंकूगु खः ।

Categorized in दुर्घटना-अपराध