कलंकीइ नक्कली कस्मेटिक उत्पादन याइगु कारखानाय् छापा
नेवा: अनलाइन न्युज – ललेन्द्र शाक्य | २०७७ चैत्र २५, बुधबार १०:५८:५६
कलंकीइ नक्कली कस्मेटिक पदार्थ उत्पादन याइगु छगू कारखानाय् वाणिज्य विभाग व अपराध महाशाखाया मंकाः पुचलं छापा मारेयाःगु दु ।
विभागया कथं ब्राण्डेड कस्मेटिक हलंज्वलंया खोलय् अप्रमाणित रसायन छ्यलाः कस्मेटिक दयेकाः मिइगु ज्या यानाच्वंगु सुचंया आधारय् पुचलं मंगलवाः छापा मारेयाःगु खः ।
हानीकारक कस्मेटिक दयेकाः बजारय् मिइगु यानाच्वंगु द्वपनय् अनुगमन पुचलं छम्ह संचालकयात तकं नियन्त्रणय् काःगु वाणिज्य, आपूर्ति व उपभोक्ता संरक्षण विभागया प्रवक्ता शिवप्रसाद सेडाईं जानकारी ब्यूगु दु । वया कथं नक्कली कस्मेटिक उत्पादन, भण्डारण व मिइगु यानाः वयाच्वंगु स्वखा छेँ तकं सिल याःगु दु ।
वं धाःगु दु, बजारय् नां चलेजूगु ५१ गू कथंया कस्मेटिक हलंज्वलंया ब्राण्डेड खोलय् अप्रमाणित रसायन छ्यलाः कस्मेटिक उत्पादन जुइगु जुयाच्वंगु खनेदत ।
प्रवक्ता सेडाईं धाःगु दु, मेहन्दी व मलतानी चा प्याकिंग यायेगु धकाः चायेकुगु उद्योगं उज्वःगु हलंज्वलंत उत्पादन यायेगु यानाच्वंगु खः ।
कलंकीइ च्वंगु मू कारखाना, लिक्क च्वंगु भण्डारण स्टोर व न्हूगु सतकय् च्वंगु मिइगु केन्द्रय् नं सिल याःगु व थप अनुसन्धान न्ह्याकूगु विभागं जानकारी ब्यूगु दु ।
गिरफ्तारीइ लाःम्ह मनू प्रहरीया निण्न्त्रणय् दूगु व म्हसीका स्पष्ट मजुनिगु प्रवक्ता सेडाईं नं धाःगु दु । उत्पादन केन्द्रपाखें आपालं थीथी नांया मेहेन्दी व कालाकोला ब्राण्डया क्लिजिंग क्रिम, भ्यास्लिन, वोकल िह्वाइनिंग, विस्पर प्याड व यासा नां लिसलिसेंया उत्पादन दु ।
Categorized in दुर्घटना-अपराध