2565 buddha Jayanti ADV

कर्मचारीपिन्त तलब नकेमाःगु जूगुलिं चिइकल लकडाउन

नेवा: अनलाइन न्युज – ललेन्द्र शाक्य | २०७८ जेठ २६, बुधबार १४:४८:१७

हुम्ला जिल्लाया उत्तरी क्षेत्रय् च्वंगु नाम्खा गाउँपालिका ६ या लिमीइ मंगलवाःनिसें लकडाउन चिइकूगु दु ।

वडाध्यक्ष पालजोर तामाङङा अध्यक्षताय् च्वंगु बैठकं असार मसान्त लिक्क वयाच्वंगु हुनिं ज्याया चाप अप्वः जुइगु जूगुलिं लिमीइ ज्या यानाच्वंपिं सरकारी व गैरसरकारी कर्मचारीपिनिगु नितिं मंगलवाःनिसें वडा ल्याः ६ लिमी दुहाँ वयेदइगु जूगु दु ।

तील, जाङ, हल्जी गांया न्ह्यलुवाःया उपस्थ्तििइ कर्मचारीपिन्त जक दुकाइगु जूगु दुसा मेमेपिं लिमी उपत्यकाया भ्रमणय् वइपिं आन्तरिक पर्यटकपिन्त दुमकायेगु यथावत् हे जूगु लिमी स्वास्थ्य चौकीया निमित्त ज्याकुथि प्रमुख लोकनाथ बोहरां धाःगु दु ।

वडा ल्याः ६ स ज्या यानाच्वंपिं कर्मचारीपिन्त तलब नकेमाःगु व थीथी योजनाया ज्या यायेमाःगु जूगु हुनिं मेमेपिं नागरिकपिन्त दुमकायेगु जूसां नं कर्मचारीपिन्त दुकायेगुलि मंगलवाःनिसें खुल्ला याःगु वं धाःगु दु । उत्तरी नाम्खा गाउँपालिकाय् आःतक सुयाके नं कोरोना संक्रमण खनेमदुनि ।

अथेहे, खार्पुनाथ गाउँपालिका ५ य् च्वंगु बाम्टा गामय् नं लकडाउन चिइकूगु दु । छुं दिं न्ह्यः बाम्टाय् परीक्षण याःबलय् निम्हेसिके संक्रमण पुष्टि जूगु खः । इमिगु मंगलवाः हाकनं परीक्षण याःबलय् कोरोन रिपोर्ट नेगेटिभ वयेधुंकाः लकडाउन चिइकूगु धाःगु दु । आः बाम्टाय् वडा ल्याः ५ या स्थानीयबासी वयेवने दइगु जूगु दु ।

Categorized in राष्ट्रिय