nepal investment baink

कर्णालीया मुख्यमन्त्री राजकुमार शर्मां राजीनामा बिइगु

नेवा: अनलाइन न्युज – ललेन्द्र शाक्य | ने.सं. ११४४ चिल्लागा नवमि (२०८० चैत्र २१ गते) बुधवाः

लिपांगुखुसी वयाः कर्णाली प्रदेशया मुख्यमन्त्री राजकुमार शर्मा राजीनामा बिइत तयार जूगु दु ।

आः थौं च्वनीगु प्रदेशसभा बैठकयात सम्बोधन यानाः राजीनामा बिइगु शर्माया तयारी दु ।

सत्ता गठबन्धनय् जूगु भागबन्डाय् कर्णाली प्रदेशया मुख्यमन्त्री एमालेया भागय् लाःगु खः । तर माओवादी केन्द्रया संसदीय दलया नेता तकं जुयाच्वंम्ह मुख्यमन्त्री शर्मा सरकार त्वःतेत तयार मजूगु खः । प्रदेश सभापाखें विश्वासया मत कायेधुंकाः जक केन्द्रय् जूगु सहमति कार्यान्वयन यायेगु माओवादी सांसदपिनिगु अडान दूगु खः ।

तर प्रधानमन्त्री तकं जुयाच्वंम्ह मोओवादी केन्द्रया नायः पुष्पकमल दाहाल प्रचण्डं फोनपाखें एमालेयात नेतृत्व हस्तान्तरण यायेत निर्देशन ब्यूगु खः । प्रचण्डया फोनलिपा मुख्यमन्त्री शर्मां एमालेया नेतापिंलिसे तकं सहलह ब्याकूगु खः ।

वधुंकाः मुख्यमन्त्री शर्मा राजीनामा बिइत तयार जूगु खः । माओवादी प्रदेश इञ्चार्ज कालीबहादुर मल्लं धाःगु दु, ‘सदनयात सम्बोधन यानाः वय्कलं राजीनामा बिइ ।’

Categorized in राजनीति