नेवा: अनलाइन न्युज – ललेन्द्र शाक्य | २०७९ श्रावण ३१, मंगलबार १६:२२:२७

दँय्–दसं भाद्र १ गते न्यायेकाः वयाच्वंगु किपूया बाघभैरव द्यःया जात्रा कन्हय् भाद्र १ गते बुधवाः तःजिक न्यायेकीगु जूगु दु । मेमेगु जात्रा नेपाल संवतया तिथि कथं न्यायेकाः वयाच्वंगु खःसा थुगु बाघभैरव जात्रा बिक्रम संवतया मिति कथं प्रत्येक दँया भाद्र १ गते न्यायेकाः वयाच्वंगु खः ।

किपू क्षेत्रय् जक मखु संसार न्यंकं हे नांजाःगु बाघभैरव देगः दुनेया बाघभरैव द्यः छुं दँ न्ह्यः जक न्हूधाः यानाः न्हूम्ह द्यः थापना याःगु खः । थुगु बाघभैरव देगः वंगु २०७२ साल बैशाख १२ या तःभुखाचं छुं लिच्वः लाःगु खनेमदु ।

किपू नगरपालिका १ वडाय् लाःगु बाघभैरव द्यःया जात्रा देगः दुने च्वंम्ह द्यःया जात्रा याइमखु, जात्रा यायेत मेम्ह हे बाघभैरव द्यःया प्रतिमा दयेकाः जात्रा यानाः वयाच्वंगु दु । अथेहे, बाघभैरव द्यः छम्ह चीचाधिकःम्ह हाकु ‘चा’याम्ह खः । थुम्ह द्यःयात बाघभैरवलिसें सम्बन्धित निकायपाखें सुरक्षित यानाः स्वथना तःगु दु ।

थ्व ल्याखं बाघभैरव द्यः स्वम्ह दु । छम्ह जात्रा याइम्ह, छम्ह देगः दुने विराजमान जुयाच्वंम्ह व छम्ह मू द्यः कथं ‘चा’याम्ह गुगु सुरक्षित यानाः स्वथनातःम्ह खः ।

खय्तला बाघभैरव द्यःयात जात्रा यानाः किपू देय् चाःहिकेगु परम्परा उलि पुलांगु मखु । थ्यंमथ्यं पीदँ पीनिदँ न्ह्यःनिसें जक किपू नगर चाःहीकेगु परम्परा न्ह्याःगु खँ अनया स्थानीय बासिन्दापिन्सं धायेगु याः । तर न्हापांनिसें हे बाघभैरव द्यःया जात्रा यायेगु परम्परा न्ह्यानाः वयाच्वंगु खः । स्थानीय बासिन्दापिनिगु धापू कथं किपू नगर चाःहीकाः जात्रा याये न्ह्यः न्हापा बाघभैरव देगः जक द्यःयात चाःहीका जात्रा याइगु चलन न्ह्यानाच्वंगु खः । लिपा थ्यंमथ्यं पीदँ पीनिदँ न्ह्यःनिसें जक बाजागाजालिसें किपू देय् चाःहीकेगु चलन न्ह्याःगु खः धकाः धाःगु दु ।

थुगु बाघभैरव जात्राया इलय् कन्हय् बुधवाः सुथय् बाघभैरव लागां क्वसं च्वंगु बुंगाचाय् बाजागाजालिसें जात्रा यानाः जात्रा याइम्ह बाघभैरव द्यःयात म्वः ल्हुइके यंकी । म्वः ल्हुइके क्वचाये धुंकाः हाकनं जात्रा यानाः बाघभैरव देगः न्ह्यःने दिकातइगु खतय् जात्रा याइम्ह बाघभैरवयात विराजमान याकाः बान्हितक पूजाआजा यानाः सनिलपाखे थीथी त्वाःया बाजागाजालिसें जात्रा यानाः किपू देय् चाःहीकीगु चलन दु ।

किपू देय् चाःहिइकेगु न्ह्यः बाघभैरव देगःया पिने च्वंगु हिफःद्यःया न्ह्यःने गुरुजुपाखें पूजाआजा यानाः न्याम्ह पशुपंछीया पंचबली बिइगु चलन दु । उकथं गुरुजुपाखें पुजाआजा यानाः पंचबली बिइधुंकाः पूजा क्वचाःगु जुइ । थथे पूजा क्वचायेधुंकाः तिनि खःयात किपू देय् परिक्रमाया ज्याझ्वः न्ह्याइ ।

बाघभैरव जात्राया न्हि कन्हय् भाद्र १ गते बुधवाःया दिं बाघभैरव देगः परिसरय् तःजिक उत्सव हे जुइ ।

थथे जात्राया झ्वलय् किपूया थीथी त्वालं मिसापिं सुकुन्दा ज्वनाः मत बियाः वनीगु चलन नं दुसा किपूया थीथी त्वालय् च्वंगु धिमे, दाफा, भजन खलःपिं नं जात्रा लिसेलिसें चाःहिलीगु याइ ।
किपूया मूजात्रा इन्द्रायणी द्यःया जात्रा खः । थुगु बाघभैरव द्यःया जात्रायात नं किपूया छगू मूजात्राया रुपं कयातःगु दु ।

Categorized in स्थानिय-समाज