zero media family planning adv

कन्हय् बिहिवाः किपुली ‘लायकू दरबार रेष्टुरेन्ट एण्ड हेरिटेज होम’ उलेज्या

नेवा: अनलाइन न्युज – ललेन्द्र शाक्य | २०७६ माघ २९, बुधबार १६:१३:४५

फागुन १ गते बिहिवाः निसें ३ गते शनिवाःतक स्वन्हुयंकं उलेज्या समारोह, सांगितिक गजल लाईभ ज्याझ्वः जुइगु

किपूया १ वडा लायकु त्वालय् ‘लायकू दरबार रेष्टुरेन्ट एण्ड हेरिटेज होम’ कन्हय् फागुन १ गते बिहिवाः सुथसिया १० ता इलय् उलेज्या जुइगु ज्याझ्वः तयातःगु दु ।

फागुन १ गते बिहिवाःनिसे फागुन ३ गते शनिवाःतक उलेज्या ज्याझ्वः जुइगु उगु ‘लायकू दरबार रेष्टुरेन्ट एण्ड हेरिटेज होम’या प्रमुख नवीन प्रधानं नेवाः अनलाईनन्यूजयात जानकारी बियादीगु दु ।

किपूया १ वडा लायकू त्वालय् च्वंगु उगु ‘लायकू दरबार रेष्टुरेन्ट एण्ड हेरिटेज होम’ फागुन १ गते बिहिवाः सुथसिया १० ता इलय् उलेज्या जुइगु ज्याझ्वः दूगु जानकारी भाजु प्रधानं बियादीगु दु ।

फागुन १ गते बिहिवाः उलेज्याया झ्वलय् न्हिनसिया २ ता ईनिसें सांगितिक ज्याझ्वःया ग्वसाः ग्वयातःगु दु । उगु सांगितिक ज्याझ्वलय् किपूया नांजाःम्ह म्येहालामि राजेश महर्जन नेवाः व सुविन श्रेष्ठं सांगितिक ब्वज्या याइगु जूगु दु ।

अथेहे, फागुन २ गते शुक्रवाः सांगितिक ज्याझ्वःया झ्वलय् राजेश महर्जन नेवाः व सुविन श्रेष्ठं हे सांगितिक ब्वज्या याइगु जूगु दुसा फागुन ३ गते शनिवाः थिमिया नांजाःम्ह उस्ताद सुफी गजल गायक विजय कायस्थया गजल लाईभ ज्याझ्वः जुइगु जानकारी नं ‘‘लायकू दरबार रेष्टुरेन्ट एण्ड हेरिटेज होम’या प्रमुख नवीन प्रधानं बियादीगु दु ।

भिजिट नेपाल दँ २०२० या लसताय् उगु‘‘लायकू दरबार रेष्टुरेन्ट एण्ड हेरिटेज होम’ उलेज्या जुइत्यंगु खःसा भिजिट नेपाल दँ २०२० स किपू नगर अवलोकनया नितिं वइपिं आन्तरिक व वाह्य पर्यटकपिन्त विशेष रुपं किपूया नेवाः नसाज्वलंपाखें सत्कार सम्मान यायेगु जानकारी भाजु प्रधानं बियादीगु दु ।

तःधंगु बजेट व न्हूगु आयाम लिसें न्हूगु सोंच ज्वनाः पलिस्था याःगु उगु ‘लायकू दरबार रेष्टुरेन्ट एण्ड हेरिटेज होम’या मू आज्जु धैगु किपूया सांस्कृतिक, सामाजिक, धार्मिक, ऐतिहासिकलिसें किपूया रहन सहन, नसाज्वलंयात मू प्राथमिकता बियाः पर्यटकलिसें ग्राहकपिन्त किपूया म्हसीका न्ह्यब्वयेगु व छगू कथं आर्थिक आय आर्जनया नितिं नं ‘लायकू दरबार रेष्टुरेन्ट एण्ड हेरिटेज होम’ संचालन जुइगु जानकारी भाजु नवीन प्रधानं बियादीगु दु ।

मुक्कं नेवाः नसात्वसाया परिकारयात प्राथमिकता बियाः ग्राहकलिसें पर्यटकपिन्त साक्क व स्तरीय नसाज्वलं नकेगु जुइ धकाः धासें भाजु प्रधानं ‘लायकू दरबार रेष्टुरेन्ट एण्ड हेरिटेज होम’या नसाज्वलंया मू सकल सर्वसाधारणपिन्त पायछि जुइगु कथं ‘रिजनेबल प्राईस’ जुइगु जानकारी बिसें वइगु फागुन १ गते बिहिवाः निसें ३ गते शनिवाःतक जुइगु ‘लायकू दरबार रेष्टुरेन्ट एण्ड हेरिटेज होम’ उलेज्या ज्याझ्वलय् सहभागिताया नितिं सकलसित इनाप यानादीगु दु ।

Categorized in नेवाः