2565 buddha Jayanti ADV

कञ्चनपुरय् १९ दँया मिसायात सामूहिक बलात्कारया द्वपं, छम्ह ज्वन

नेवा: अनलाइन न्युज – ललेन्द्र शाक्य | २०७८ जेठ २८, शुक्रबार १०:१२:४९

कञ्चनपुरय् १९ दँया मिसायात सामूहिक बलात्कार जूगु प्रहरीं जानकारी ब्यूगु दु ।

जिल्लाया वेदकोट नगरपालिका ५ य् स्थानीय मिसायात निम्ह मिजंपिन्सं बलात्कार याःगु जिल्ला प्रहरी ज्याकुथि कञ्चनपुरं जानकारी ब्यूगु दु ।

बलात्कार याःगु द्वपं लाःम्ह वेदकोट नगरपालिका ६ या थ्यंमथ्यं २३ दँया धनबहादुर विकयात ज्वनागु कञ्चनपुरया प्रवक्ता लिसे प्रहरी नायव उपरीक्षक अमरबहादुर थापां जानकारी ब्यूगु दु । मेम्ह बलात्कार आरोपी वहे थासय् च्वनीम्ह थ्यंमथ्यं २३ दँया हे मिजं बिस्युं वनाच्वंगुलिं वया मालेगु ज्या जुयाच्वंगु प्रहरी नायव उपरीक्षक थापां जानकारी ब्यूगु दु ।

बिहिवाः स्थानीय नर्सरी जंगलय् इपिं मिजंपिं लिसे चाःह्यूवंगु इलय् मिसायात निम्हेस्या जबरजस्ती करणी याःगु द्वपं पीडित मिसां ब्यूगु दु । बहनी थ्यंमथ्यं ९ ता ईपाखे सामूहिक बलात्कार याःगु खबर वयेधुंकाः जिल्ला प्रहरी ज्याकुथिपाखें खटेजूगु टोलीं बलात्कारी मध्येया विकयात शुक्रवाः सुथय् ज्वंगु खः ।

मिसाया बहनी हे स्वास्थ्य परीक्षण याःगु दुसा रिपोर्ट वयेल्यंदनीगु प्रहरी नायव उपरीक्षक थापां धाःगु दु । जंगलय् निम्हेस्यां अय्लाः त्वनाः थःत बलात्कार याःगु मिसां धाःगु दु । बिस्युं वंम्ह मिजंया मालेगु ज्या लिसें घटनाबारे अनुसन्धान जुयाच्वंगु प्रहरीं जानकारी ब्यूगु दु ।

Categorized in दुर्घटना-अपराध