prabhu baink new

ओलीया सत्तारोहण व राष्ट्रवादया सवाल

 

  • सानुराजा शाक्य

केपि ओली प्रधानमन्त्री जुइ फइगु संभावना निक्वःगु संविधानसभाया चुनाव धुंकाःनिसें क्यंगु खः । उकिसनं कांगेस व एमालेया दथुइ संविधान दयेकेगु, सत्ता इना कायेगु खँय् सहमति जूसां निसें हे सुशील कोइराला धुंकाः केपी प्रधानमन्त्री धइगु चर्चा एकोहोरो प्रवाहित जुयाच्वंगु हे खः । थुकथंया चर्चां सुशील धुंकाः ओली हे प्रधानमन्त्री खः धइगु मनोवैज्ञानिक प्रभाव अन्ततः ओलीया नितिं फाइदाजनक जुल मेखे थ्व चर्चाया खास हे खण्डन मयाःगु कारणं कांग्रेसया नितिंं तःधंगु घाता सिद्ध जुल ।

प्रधानमन्त्री पदय् केपि ओलीया जित व सुशील कोइरालाया हारयात नेपाल व भारतया जित हारया रुपय् सामाजिक सञ्चालय् काःगु खनेदत । विशेष यानाः ओली समर्थकतसें ओलीया जितयात भारतं चाहे मजुइक नं प्रधानमन्त्री जुइत सफल जूम्ह कथं क्यनेगु ज्यात सामाजिक सञ्जालय् एमाले समर्थकतसें याःगु खनेदत । अझ कमल थापा व पुष्पकमल दाहालं तकं केपीया जितयात भारतयात “क्यना” बियागु अर्थय् काःगु उमिगु अभिव्यक्तिइ खनेदु । पुष्पकमल दाहालं न्हापा नं भारतयात क्यनेगु नितिं धकाः एमालेया झलनाथ खनालयात प्रधानमन्त्री पदय् त्याका बिउगु इतिहास दु तर थुज्वःगु ज्यां राष्ट्रयात खास हे फाइदा मजूगु इतिहास दु । आखिरय् लिपा वनाः पुष्पकमल दाहाल भारतनाप स्यंगु सम्बन्ध भिंकेत भारतीय नेतातय्त साष्टांग दण्डवत यानाः जुइत वाध्य जुल । एमाले दुने केपी ओलिया पृष्ठभूमि धइगु भारत विरोधी मखु भारतपरस्त नेताया रुपय् दु । ओलीया भारतीय “रअ” नाप क्वातूगु सम्बन्धया बारे पत्रकार सुधीर शर्माया प्रयोगशाला किताबय् स्पष्ट यानातःगु दु । एमाले दुने नं ओलीयात भारत परस्त, झलनाथ खनाल वामदेव गौतमपिं भारत विरोधी व माधव नेपाल भचाभचा भारत परस्त नेताया रुपय् कायेगु याः । केपी ओली व विद्या भण्डारीं चले यानातःगु मदन भण्डारी फाउण्डेशनय् भारती राजदूतावासपाखें तप्यंक दँय्दँसं दसौं करोड ध्यबा हयाः एमाले दुने भारतया पक्षपोषण अले थःगु गुटयात शक्तिशाली यायेगुलिइ छ्यलाच्वन धइगु एमाले दुने हे माधव नेपाल व झलनाथपिनि आरोप खः ।

एमाओवादी दुने डा. बाबुराम भट्टराईयात भारतपरस्त नेता कथं गुकथं क्यनीगु खः एमाले दुने नं भारत परस्त शीर्ष नेताया रुपय् केपीओलीयात एमालेया हे नेतातसें काइगु खः । एमाले दुने केपीयात भारतीय एजेन्ट धकाः तकं आरोप बिइगु याः । थुकथंया आरोप व केपी ओलीया भारतनापया सम्बन्ध महाकाली सन्धीया इलंनिसें विशेष जूगु खः । महाकाली सन्धीया पक्षय् एमालेयात हयेगु ज्याय् केपीया विशेष भूमिका दु । महाकाली सन्धीया हे कारणं राष्ट्रघात जूगु विवादं अन्ततः उगु इलय् एमाले कुचा दला वामदेवं माले दयेकूगु खः । उबले वामदेव व माले धइगु दल राष्ट्रघाती महाकाली सन्धीया विरोध यानाः एन्टी इण्डिएन दल कथं माले व वामदेवं थःगु चरित्र निर्माण यात । उम्ह हे वामदेव थौं केपीया दलकय् भलसा दुम्ह पासा जुल । केपीयात संसदीय दलया नेतानिसें एमालेया नायः दयेकेगु व अन्ततः प्रधानमन्त्री दयेकेगु भूमिका सशक्त रुपं म्हितूम्ह पात्र जुल ।

एमाले दुने छगू इलय् केपी व वामदेवया सम्बन्ध लः व मिया जूथें नेपालय् तःभुखाय् ब्वये न्ह्यः तक ओली व पुष्पकमल दाहालया सम्बन्ध नं लः व मि बराबर खः । वं वयात वं वयात व्यक्तिगत तहलय्तक नं आरोप प्रत्यारोप यायेगु याः । खस आर्य ब्राम्हण नेतातय्पाखें मधेसी आदिवासी नेतातसें सयेकेमाःगु छगू पक्ष थ्व खः । खस ब्राम्हण नेतात छगू इलय् घोर शत्रु कथं क्यंसां गुलि याकनं सहज रुपं मित्र नं याकनं जू । केपी ओली व पुष्पकमलया उदाहरण थुकिया नितिं कुगाः । न्याला न्ह्यः तक शत्रुतापूर्ण व्यवहार यानाः च्वंपिं थौं छगू हे भूतुलिइ ज्यना यानाः सत्ताभोग यायेगु नितिं तयार जुल । मेखे मधेसी व आदिवासी जनजाति नेतातय् दथुइ छकः ल्वापु जुइवं उमिगु ल्वापु जिन्दगी भर हे ल्वानाः माःगु इलय् तकं मिले जुइ मफइगु संस्कार त्याग याये फुगु खनेमदुनि ।

छगू खँ छु सिइकेमाः धाःसा मू दलया फुक्क धइथें शीर्ष नेतात भारतनाप टक्कर कयाः नेपाः न्ह्याके धइगु विश्वास दुपिं नेतात मखु । उमिसं गुगु नं कथं भारतया समर्थन थःयात दयेमाः धकाः न्हिं चां बिचाः याना जुइपिं खः । संविधान जारी जुइधुंकाः नेपाः भारत सिमा नाकाय् जूगु अवरोधं गुकथं नाकाबन्दीया अवस्था पिदन उकियात कयाः संविधान पिदंगु खुसीयाली जूगु सभाय् केपी ओली व पुष्पकमल दहालं भारतयात कयाः टिप्पणी याःगु खः । उगु टिप्पणीयात केपी ओलीं निप्यघौ नं थःगु अडान कथं तया तयेमफुत लिपा थःगु अभिब्यक्तियात सुधार यानाः थःपिं छिमेकी देय् नाप बाांलागु सम्बन्ध तयातये न्ह्यापिं  धकाः न्ववाना भारतया विरोध यायेगु त्वःता बिल ।

नेपाःया इतिहासय् हे संविधानसभां संविधान वया नं असन्तोषया कारणं देसया दक्षिण भूभागय् बन्द नाकाबन्दी आन्दोलनं देस हे तहस नहस जुयाच्वंगु अवस्था दु । मेखे संविधान जारी जूसांनिसें छिमेकी देय् भारतनापया सम्बन्ध नं नेपाःया नितिं पिडादायक जुयाच्वंगु अवस्था खः । थ्व निगू समस्यायात तत्काल समाधान यायेगु चुनौति न्हूम्ह प्रधानमन्त्री केपी ओलीया ब्वहलय् दु । थ्व समस्यायात छुं दिन लिपा जक क्वजियेके धाये फइगु सुविधा ओलीया नितिं मदु ।

केपी ओलीयात थुगु पदय् च्वनेधुंकाः न्हापा थें छगू दलया शीर्ष नेतां थें आदिवासी जनजाति, मधेसी व भारतयात चुनौति बियाः लाक्व पाक्व कमेन्ट याये फइगु अवस्थाय् प्रधानमन्त्री मदु । उकिं थः प्रधानमन्त्री जुइवं बिउगु व्यक्तव्यय् दकलय् न्हापां हे थः मधेसी, आदिवासी जनजाति विरोधी मखु धइगु स्पष्टिकरण बिइत वाध्य जुल । आः स्पष्टिकरण जक बियां गाःगु अवस्थाय् प्रधानमन्त्री मदु । न्हापां नेपाःया तराई मधेसया मागयात सम्बोधन यायेगु चुनौति दु । उकिया नितिं संविधान संशोधन यायेमाःगु वाध्यता दु । कांग्रेस प्रतिपक्षय् च्वं वंगु अवस्थाय् संविधान संशोधन यायेत दकलय् न्हापां कांगे्रसया सहमति कायेगु व संविधान संशोधनया बुँदाय् मधेस केन्द्रीत दलतय्त सहमति हयेगु प्रमुख जिम्मेवारी म्हितेमाःगु थासय् केपी ओली थ्यंगु दु । केपीया धात्थेंया परिक्षण आः शुरु जूगु जक खः ।