zero media family planning adv

ओलीया रणनीति : प्रचण्ड व नेपालयात राष्ट्रघाती धकाः क्यनेगु

नेवा: अनलाइन न्युज – ललेन्द्र शाक्य | २०७७ आषाढ १५, सोमबार १२:५६:४४

प्रधानमन्त्री केपी शर्मा ओलीं सुं सुं नेतापिं थःत सत्तापाखें चिइकेत जुयाच्वंगु द्वपं ब्यूगु दु । ओलीं नां तोकेमयाःसे भारतनिसें नेपाःया होटलतक थःत चिइकेगु नितिं बैठकत जुयाच्वंगु धाःगु दु । थःत चिइकेत जुयाच्वंपिं नेपाःया नेतापिन्सं भारतलिसे साँठगाँठ याःगु धैगु ओलीया आशय खः ।

ओलीं थःत चिइकेत्यंगुया हुनि न्हूगु नक्सा जारी यानाः लिम्पियाधुरा, लिपुलेख व कालापानी लितकायेत्यनागु हे जूगु दाबी यात । थः राष्ट्रवादी जूगु व राष्ट्रियताया पक्षय् ज्या यानागुलिं प्यदँ न्ह्यः ९ महिनाय् हे सत्ता क्वःथःगु व आः नं अथेहे यायेत्यंगु ओलीं द्वपं ब्यूगु दु ।

नेकपाया नायः पुष्पकमल दाहाल प्रचण्डं असार ९ गते बालुवाटारय् ओलीयात सरकारपाखें लिहाँ वयेत धाःगु व पार्टीया प्रभावशाली नेतापिं छप्पं जुयाः ओलीविरुद्ध पलाः न्ह्याकेधुंकाः ओलीं राष्ट्रियता व राष्ट्रवादया अस्त्र क्ययेकूगु खः । ओलीं थःत चिइकेत स्वःपिं भारतलिसे मिलेजूगु धायेत स्वल । थथे ओलीं थःत चिइकेत्यंपिन्त भारतपरस्त व राष्ट्रघाती क्यनेत्यंगु दु ।

ओलीं नां तोकेमयाःसे धाःसां नं नेकपा नेतापिं प्रचण्ड व माधवकुमार नेपालयात संकेत यासें भारतलिसे मिलेजुयाः थःत चिइकेत्यंगु द्वपं ब्यूगु दु । निम्हं नेता ओलीया विरोधय् छप्पं जुयाः क्वाहाँ वयाच्वंगु दु । ओलीयात सरकारपाखें लितसःतेगु तकंया तयारी नेकपा दुने दु ।

ओलीं राष्ट्रवादया अस्त्र त्वःतीगु खनेदयाः हे न्वकू बामदेव गौतमं असार १३ गते स्थायी कमिटी बैठकय् विगतय् ओलीं भारतलिसे महाकाली सन्धी यायेत भूमिका म्हितूगु व उकिया विरोधय् थः क्वाहाँ वयाबलय् कारवाही फयेमाःगु विषय ल्ह्वंगु खः । गौतमं महाकाली सन्धी राष्ट्रघाती खः व गम्भीर गल्ती खः धकाः पार्टीं निर्णय यायेमाःगु धारणा तःगु दु । उगु इलय् थःत सन्धीया विरोध यानाबलय् पार्टीपाखें हे निष्कासन याःगु प्रसंग नं गौतमं लुमंकूगु दु ।

ओलीं राष्ट्रवादया अस्त्र क्ययेकाः पार्टी दुनेया विरोधीयात कमजोर यायेत स्वयाच्वंबलय् गौतमं वया न्ह्यः हे महाकाली सन्धीया विषय ल्ह्वंगुयात अर्थपूर्ण कथं काःगु दु । आः नेकपा दुने सु राष्ट्रवादी ? व सु राष्ट्रघाती ? या बहस केन्द्रीत जुइगु खनेदूगु दु ।

ओली सुनां थःत चिइकेत स्वइ व राष्ट्रघाती खः धकाः क्यनेत स्वयाच्वंगु दु । थःम्हं राजीनामा बिइधुंकाः राष्ट्रियताया विषय मेपिन्सं मल्ह्वनीगु व अतिक्रमित भूमि नं लितकाये मफइगु ओलीया दाबी दु । थथे ओलीं नक्सालिसेंया विषय राजनीतिक अस्त्रया रुपं छ्यलाच्वंगु पुष्टि जुयाः वयाच्वंगु दु ।

Categorized in राजनीति