Newa Ekata Diwas Gosthi Adv

ओलीया पलाः असंवैधानिक : भारतीय मिडियाया निष्कर्ष

नेवा: अनलाइन न्युज – ललेन्द्र शाक्य | २०७७ पौष ७, मंगलबार १३:२९:०३

संसद भंग यानाः निर्वाचनय् वनेगु प्रधानमन्त्री केपी शर्मा ओलीया निर्णयपाखें नेपाःयात राजनीतिक अनिश्चयस यंकीगु निष्कर्ष लिसें भारतया मू अंग्रेजी पत्रिकातसें मंगलवाः सम्पादकीय पिथंगु दु ।

दि इन्डियन एक्सप्रेसं थःगु सम्पादकीयस धाःगु दु, पार्टी दुनेया थः नेतापिनिगु मागप्रति झुकेजुयाः शक्ति संरचनाय् इमित एकामोडेट यानाः वनेगु पलेसा ओलीं संसद भंग यायेगु विकल्प ल्यःगु दु ।

उगु पलाखं नेपाःयात अनिश्चयया लँपुपाखें यंकूगु उगु पत्रिकां न्ह्यथंगु दु ।

उगु सम्पादकीयस ओलीं मधेशीलिसेंया विषययात सम्बोधन यायेगु पलेसा शक्ति केन्द्रीकरण यायेत्यंगु, भारत विरोधी पलाः ल्ह्वंगु व चीनपाखे लिक्क जूगु न्ह्यथंगु दु ।

उगु पत्रिकां आःया नेपाःया आन्तरिक मामिलाय् भारत. यायेफूगु अतिकं म्हो जक खँ जूगु धासें भारतं कोर्स गुकथं न्ह्यःने वनी वाच यायेमाःगु न्ह्यथनातःगु दु ।

मेगु अंग्रेजी न्हिपौ दि हिन्दुस्तान टाइम्सं धाःसा ओलीं असंवैधानिक व अप्रजातान्त्रिक पलाः ल्ह्वंगु न्हयथनातःगु दु । उगु पलाखं ओलीया क्रिडेन्सियल खत्तम याःगु न्ह्यथनातःगु दु । उगु पत्रिकां धाःगु दु, थुकिं छु पाठ स्यंगु दु धाःसा थःत सर्वोच्च तायेकीम्ह नेता गुम्हेस्यां जातीय सर्वोच्चता व उग्र राष्ट्रवादय् विश्वास याइ, इमिगु कुतः अप्रजातान्त्रिक जुइगु जुइ ।

उगु पत्रिकां चीनया आशा अःखः कम्युनिष्ट पार्टी कुचा जुइत्यंगु तर थ्व प्रजातन्त्रया नितिं बांलाः जुइगु उगु सम्पादकीयस न्ह्यथनातःगु दु । उगु पत्रिकां नेपालय् जूगु राजनीतिक घटनाक्रमयात बांलाःगु ढंगं थुइकेमाःगु तर ओलीयात ब्याक यायेमज्यूगु तकं न्ह्यथनातःगु दु ।

अथेहे, दि हिन्दुं प्रधानमन्त्रीया संसद भंगलिसें नेपालय् राजनीतिक उथलपुथल ब्वलंगु शीर्षकय् सम्पादकीय पिथंगु दु ।

नेकपाय् विभाजनलिसें देसय् राजनीतिक अस्थिरता ब्वलनीगु उगु सम्पादकीयस धयातःगु दु । ओलीं राजनेता जुइगु ह्वःताः काःगु तर उकियात गुमेयाःगु तकं सम्पादकीयस न्ह्यथनातःगु दु ।

Categorized in पत्रपत्रिका