2565 buddha Jayanti ADV

ओलीयात नेपाःया ‘महाराधिराज’ घोषित यायेफूगु आपालं खतरा –दिनेश त्रिपाठी

नेवा: अनलाइन न्युज – ललेन्द्र शाक्य | २०७८ जेठ २८, शुक्रबार १५:२६:०७

मन्त्रिपरिषदया बिहिवाः हाकनं विस्तार यानाः प्रधानमन्त्री केपी शर्मा ओलीं संविधानयात हाकनं घातक प्रहार याःगु दु । 

संसद भंग यायेधुंकाः सरकारयात न्हिथं प्रशासन चलेयायेगु बाहेक मेगु छुं नं ‘म्यान्डेट’ प्राप्त जुइमखु । राष्ट्रपतिपाखें सोमवाः जारी याःगु विज्ञप्तिइ ‘नेपाःया संविधान कथं प्रधानमन्त्रीया सिफारिसय्’ मन्त्रिपरिषद विस्तार याःगु दु धकाः छुं नं धारा तकं उल्लेख जुइफूगु मदु । थुकिं थ्व ज्या ख्वालं हे गैरसंवैधानिक जूगु स्पष्ट जू । 

जिं थःगु बहसय् संविधान कथं धकाः कन्हय् राष्ट्रपतिपाखें सर्वोच्च अदालत हे खारेज जुल धकाः विज्ञप्ति पिकाल धाःसा छु यायेगु ? अथे नं केपी ओलीयात नेपाःया ‘महाराजधिराज’ घोषित यानाबियागु दु धकाः कन्हय् राष्ट्रपतिपाखें विज्ञप्ति पिहाँ वइगु प्रचुर खतरा खनेदत ।

नेपाःया संविधानयात आः पूर्ण रुपं मृत्यु शैयाय् थ्यंकूगु दु । उकुन्हु जक याःगु मन्त्रिपरिषद विस्तार सम्बन्धय् जिं सर्वोच्च अदालतय् रिट दायर यानागु खः । गुकी सर्वोच्च अदालतं सोमवाः सुनुवाई यासें थःगु आदेशय् रिटय् गम्भीर संवैधानिक व कानूनी न्ह्यसः ल्ह्वंगु तथ्ययात स्वीकार यासें अन्तरिम आदेशया सहलहया नितिं असार ८ गते सरकारयात अदालतय् उपस्थित जुइगु आदेश जारी याःगु दु ।

तर सरकार अदालतय् उपस्थित जुइगु पलेसा गैर संवैधानिक कथं हाकनं मन्त्रिपरिषद विस्तार याःगु दु । थुकिं आः थ्व सरकार पूर्ण रुपं संवैधानिक अनुशासनया घेरासिबें पिहाँ वनेधुंकूगु स्पष्ट प्रमाण खः ।

थ्व मुलुकय् सर्वोच्च अदालत नं दु धैगु खँया छुं नं हेक्का थ्व सरकारं तःगु खनेमदु । आः थ्व सरकार पूर्ण रुपं अधिनायकवादया लँपुइ वनेधुंकूगु दु ।

Categorized in राजनीति